الماتىدا الەۋمەتتىك ينفراقۇرىلىم نىساندارىنداعى قاۋىپسىزدىكتى قامتاماسىز ەتۋ بويىنشا كۇشەيتىلگەن جۇمىس جالعاسىپ جاتىر، دەپ حابارلايدى aqshamnews.kz
بيىل الەۋمەتتىك ينفراقۇرىلىم نىساندارىندا تەحنيكالىق قاۋىپسىزدىك تالاپتارىن بۇزۋ دەرەكتەرىن انىقتاۋعا باعىتتالعان پروفيلاكتيكالىق تەكسەرۋلەر جۇرگىزىلدى. ونىمەن 46 جەدەلساتى، 20 ەسكالاتور، 4 تراۆولاتور جانە ەرەكشە قاجەتتىلىگى بار ادامدارعا ارنالعان 29 كوتەرگىش قۇرىلعى قامتىلدى. بۇل تۋرالى الماتى قالاسىنىڭ كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسى مالىمدەدى.
ايتا كەتەيىك، الماتىدا جالپى 14 523 جەدەلساتى بار، ونىڭ 8 420-سى تۇرعىن ءۇي قورىندا جۇمىس ىستەپ تۇر. تەك 45 جەدەلساتى 25 جىلدىق پايدالانۋ مەرزىمىنەن اسىپ كەتكەن. 2025 جىلى اكىمدىكتىڭ جوبالىق كەڭسەسىنىڭ قولداۋىمەن 110 جەدەلساتىنى جاڭارتۋ جوسپارلانعان.
الماتىنىڭ جىلۋ جۇيەسىنە 158 قازاندىق جانە 512 قازان كىرەدى. «الماتى ەلەكتر ستانسيالارى» اق بالانسىندا 3 قازاندىق پەن 33 قازان بار، ونىڭ 32ء-سى نورماتيۆتىك مەرزىمىن وتەگەن. «الماتىجىلۋجايەنەرگو» جشس-نە تيەسىلى 79 قازاندىق پەن 303 قازاننىڭ 27ء-سىن جاڭارتۋ قاجەت. قالادا سونداي-اق 84 تۇرعىن ءۇي كەشەنىندەگى 479 كوپپاتەرلى ءۇيدى جىلۋمەن جانە ىستىق سۋمەن قامتاماسىز ەتەتىن 76 جەكە اۆتونومدى قازاندىق جۇمىس ىستەيدى. ولاردىڭ سانى جىل سايىن ارتىپ كەلەدى. بۇل جابدىقتى كۇتىپ ۇستاۋ باسقارۋشى كومپانيالاردىڭ ەسەبىنەن جۇزەگە اسىرىلادى.
گاز جابدىقتارىنىڭ قاۋىپسىزدىگىن ارتتىرۋ ماقساتىندا تجد، «الماتى گاز» ارس جانە ب ا ق وكىلدەرىمەن بىرلەسىپ جەكە سەكتور مەن كوممۋنالدىق-تۇرمىستىق تۇتىنۋشىلارعا جوسپارلى رەيدتەر ۇيىمداستىرىلىپ جاتىر. قالانىڭ بارلىق اۋدانىندا گاز جۇيەلەرىن پايدالانۋ ەرەجەسىن تۇسىندىرۋگە باعىتتالعان ايلىقتار وتۋدە. بيىل پروفيلاكتيكالىق ىس-شارالارمەن 22 ساۋدا نارىعى، 29 ساۋدا-ويىن-ساۋىق ورتالىعى، اۆتونومدى قازاندىقتارى بار 25 نىسان، گازداندىرىلماعان 24 جاتاقحانا مەن حوستەل، سونداي-اق 83 قوعامدىق تاماقتانۋ ورنى قامتىلدى. ونىڭ 30-ىندا قاۋىپسىزدىك تالاپتارىن بۇزۋ فاكتىلەرى انىقتالدى. كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسىنىڭ مالىمەتىنشە، بارلىق تۇتىنۋشىعا گاز جابدىقتارىن پايدالانۋ ەرەجەسى جانە ولاردى ساقتاماعانى ءۇشىن جاۋاپكەرشىلىك ءتۇسىندىرىلدى. قالانىڭ ينفراقۇرىلىم نىساندارىنداعى تاۋەكەلدى تومەندەتۋ بويىنشا جۇمىس جوسپارلى تۇردە جالعاسىپ جاتىر.