ءال-فارابي اتىنداعى قازاق ۇلتتىق ۋنيۆەرسيتەتىنىڭ دارىلىك وسىمدىكتەردى عىلىمي-زەرتتەۋ ورتالىعىنىڭ بازاسىندا قازاقستان-قىتاي دەنساۋلىققا پايدالى تاعامداردى زەرتتەۋ ورتالىعى اشىلدى.
ورتالىقتى قازۇۋ-دىڭ باسقارما توراعاسى-رەكتور جانسەيىت تۇيمەبايەۆ پەن بەيجىڭ تەحنولوگيا جانە بيزنەس ۋنيۆەرسيتەتىندەگى تاماقتانۋ جانە دەنساۋلىق فاكۋلتەتىنىڭ پروفەسسورى ليۋ سينسي ىسكە قوستى، دەپ حابارلايدى aqshamnews.kz.
اتالعان عىلىمي ورتالىق ەلىمىزدە وسەتىن دارىلىك وسىمدىكتەردى تەرەڭىرەك زەرتتەۋگە جول اشادى. سونىڭ ىشىندە قازاقستانداعى سويا بۇرشاعىنىڭ قاسيەتى مەن قۇرامىنا تالداۋ جانە ساراپتاما جاسالادى. ناتيجەسىندە سويا بۇرشاعىنان ادام اعزاسىنا پايدالى تاعام تۇرلەرىن ازىرلەۋ بويىنشا جۇمىستار جۇرگىزىلەدى.
كەزدەسۋ بارىسىندا جانسەيىت تۇيمەبايەۆ قۇرمەتتى قوناقتارعا قازۇۋ-دىڭ عىلىمي ينفراقۇرىلىمى تۋرالى اقپارات بەرىپ، ۋنيۆەرسيتەتتىڭ جۇڭگو جوو-لارىمەن بىرلەسىپ اتقارىپ جاتقان جۇمىستارعا توقتالدى.
«قازىرگى تاڭدا قازۇۋ 60-قا جۋىق قىتايلىق ۋنيۆەرسيتەتپەن تىعىز بايلانىس ورناتقان. وسى رەتتە بەيجىڭ تەحنولوگيا جانە بيزنەس ۋنيۆەرسيتەتىمەن ىنتىماقتاستىقتى ودان ءارى تەرەڭدەتۋگە نيەتتىمىز. سونىڭ ىشىندە ورتاق عىلىمي جوبالاردى جۇزەگە اسىرۋعا، وقىتۋشىلار مەن ستۋدەنتتەر الماسۋعا، بىرلەسكەن عىلىمي كونفەرەنسيالار مەن سيمپوزيۋمدار وتكىزۋگە دايىنبىز»، – دەدى رەكتور.
ءوز كەزەگىندە جۇڭگو پروفەسسورى ليۋ سينسي ءىلتيپات بىلدىرگەنى ءۇشىن وقۋ ورداسىنىڭ باسشىلىعىنا ريزاشىلىعىن جەتكىزىپ، ءوزىنىڭ عىلىمي-يننوۆاسيالىق جوباسى تۋرالى مالىمەت بەردى.
«بەيجىڭ تەحنولوگيا جانە بيزنەس ۋنيۆەرسيتەتى – بيولوگيا سالاسىندا كوشباسشى جوو-لاردىڭ ءبىرى. ءبىزدىڭ عىلىمي توپ سويا بۇرشاعىنان ادام اعزاسىنا پايدالى نان، ەت، سۋسىن، بالمۇزداق ونىمدەرىن ازىرلەپ شىعاردى. قان قىسىمىن رەتتەۋگە، اسقازان-ىشەك جولدارىن تازارتۋعا كومەكتەسەدى. سونىمەن قاتار ادامعا كۇش-قۋات بەرەدى. قازىرگى ۋاقىتتا بۇل ونىمدەر قىتايدا ساتىلادى. بۇگىندە اتالعان ونىمدەردى قازاقستان نارىعىنا الىپ كەلۋدى كوزدەپ وتىرمىز. بۇگىن ىسكە قوسىلعان ورتالىق قازاقستانداعى سويا بۇرشاعىن جانە وزگە دە پايدالى وسىمدىكتەردى جان-جاقتى زەرتتەۋگە باعىتتالعان»، – دەدى ليۋ سينسي.
كەلىسسوز بارىسىندا تاراپتار سەرىكتەستىكتى ارتتىرۋ، عالىمدار اراسىنداعى ارىپتەستىك بايلانىستى دامىتۋ جونىندە پىكىر الماستى.