ءال-فارابي اتىنداعى قازاق ۇلتتىق ۋنيۆەرسيتەتىندە «التاي حالىقتارىنىڭ جەر-سۋ اتاۋلارى» ءحى حالىقارالىق سيمپوزيۋمى ءوتتى. ءىس-شارانى التاي قاۋىمداستىعىنىڭ اكادەمياسى مەن ءال-فارابي اتىنداعى قازۇۋ بىرلەسىپ ۇيىمداستىردى.
سيمپوزيۋمنىڭ نەگىزگى ماقساتى – ەجەلگى زاماننان بۇگىنگە دەيىن جازباشا جانە اۋىزشا جەتكەن دەرەككوزدەردى كەڭىنەن زەرتتەۋ، تايپالاردىڭ، جەر-سۋ اتاۋلارىنىڭ فونەتيكالىق جانە مورفولوگيالىق وزگەرىستەرىنىڭ سەبەپتەرىن تالداۋ جانە عالىمداردىڭ حالىقارالىق ىنتىماقتاستىق تراەكتورياسىن كەڭەيتۋ.
جيىندى ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما ءتوراعاسى – رەكتورى جانسەيىت تۇيمەبايەۆ قۇتتىقتاۋ سوزبەن اشتى. سيمپوزيۋمعا قاتىسۋشىلاردى قارسى الا وتىرىپ، قىرعىزستان، تۇركيا، تۇرىكمەنستان، وزبەكستان، ءازىربايجان، رەسەي، جاپونيا، ۆەنگريا، پولشا، تايۆان جانە ت.ب. ەلدەردىڭ عالىمدارىن جيناعان اۋقىمدى عىلىمي شارانىڭ ماڭىزدىلىعىن اتاپ ءوتتى.
«تۇركىتەكتەس عالىمدار مەن شەتەلدىك زەرتتەۋشىلەر جىلدار بويى التاي الەمىن زەرتتەپ كەلەدى. بۇل باعىتتاعى جۇمىستار تاۋەلسىزدىك العاننان كەيىن باستالدى. «حالىقارالىق التاي قاۋىمداستىعى سيمپوزيۋىمى» اتاۋىمەن ءداستۇرلى تۇردە وتكىزىلىپ كەلە جاتقان اكادەميالىق پلاتفورما جىل سايىن تاقىرىپتىق كەڭىستىگىن كەڭەيتۋدە. بۇگىنگى سيمپوزيۋم ەۋرازيا كەڭىستىگىندەگى تۇركى، موڭعول، تۇڭعىس، مانچجۇر، ماجار، جاپون، كورەي جانە باسقا دا حالىقتار اراسىنداعى تاريحي-مادەني بايلانىستار تۋرالى كۇردەلى دە قىزىقتى عىلىمي زەرتتەۋگە جاڭا سەرپىن بەرەدى دەگەن سەنىمدەمىز»، - دەدى رەكتور.
سونداي-اق پلەنارلىق وتىرىستا التاي سيمپوزيۋمدارى كوميتەتىنىڭ ءتوراعاسى، پروفەسسور يلحان شاحين، تۇركيانىڭ قازاقستانداعى باس كونسۋلى الي رىزا اكىنجى، شەرحان مۇرتازا اتىنداعى تاراز يننوۆاسيالىق-گۋمانيتارلىق ۋنيۆەرسيتەتىنىڭ پروفەسسورى، فيلولوگيا عىلىمدارىنىڭ دوكتورى ەربولات ساۋرىقوۆ، حالىقارالىق تۇركولوگيالىق زەرتتەۋلەر ورتالىعىنىڭ ديرەكتورى، ق ر ۇعا كوررەسپوندەنتى ەردەن قاجىبەك جانە ت.ب. ءسوز سويلەپ، ءوز پىكىرلەرىن ورتاعا سالدى.
سيمپوزيۋم اياسىندا التايستيكانىڭ ءتۇرلى باعىتتارى بويىنشا سەكسيالار جۇمىسى ءوتتى.
ءال-فارابي اتىنداعى قازۇۋ-دىڭ باسپا ءسوز قىزمەتى