ەلىمىزدە پاكىستانعا تىكەلەي ۇشاتىن رەيس اشىلدى. الماتى-لاحور باعىتىنداعى اۋە كەمەسى 8 شىلدە كۇنى العاشقى جولاۋشىلارىن تاسىمالدادى، دەپ حابارلايدى Almaty-akshamy. kz
اۆياكومپانيا باسشىلىعى ۇسىنعان اقپاراتقا سايكەس، Boeing-737 ۇشاعى اپتاسىنا 2 رەت، سارسەنبى جانە سەنبى كۇنى قاتىنايدى. ۇشۋ ۋاقىتى - 2،5 ساعات.
«بۇل باستاما ەكى ەل اراسىنداعى اۋە قاتىناسىن نىعايتىپ قانا قويماي، ساۋدا-ەكونوميكالىق، ينۆەستيسيالىق، تۋريستىك جانە مادەني ىنتىماقتاستىقتى دامىتۋدى جەدەلدەتەدى»، دەلىنگەن الماتى حالىقارالىق اۋەجايى تاراتقان اقپاراتتا.
ايتا كەتەيىك، جاڭا رەيستىڭ اشىلاتىنى تۋرالى مەملەكەت باسشىسى قاسىم-جومارت توقايەۆ پەن پاكىستان پرەمەر-مينيسترى شاحباز ءشاريفتىڭ تەلەفون ارقىلى ىنتىماقتاستىق ماسەلەسىن تالقىلاۋىنان كەيىن بەلگىلى بولدى. كەيىن ەلىمىزدىڭ يندۋستريا جانە ينفراقۇرىلىمدىق دامۋ مينيسترلىگىنىڭ ازاماتتىق اۆياسيا كوميتەتى پاكىستاننىڭ اۆياسيالىق بيلىك ورگاندارىمەن بىرلەسىپ، تۇراقتى جولاۋشىلار رەيسىن اشۋ ماسەلەسىن قولعا العان ەدى.