قازاقستان مەن وزبەكستاننىڭ مەملەكەتتىك شەكاراسى شەگەندەلدى

بۇل ماسەلە 19 جىلعا سوزىلعان.

بۇل شارت كۇشىنە ەنۋ ءۇشىن 100 راۋندتان تۇراتىن كەلىسسوز جۇرگىزىلگەن، دەپ حابارلايدى Almaty-akshamy.kz

بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى.

«2023 جىلعى 4 شىلدەدە قازاقستان-وزبەكستان مەملەكەتتىك شەكاراسىن شەگەندەۋ تۋرالى شارت كۇشىنە ەندى. شارتقا 2022 جىلعى 22 جەلتوقساندا تاشكەنتتە ەكى مەملەكەتتىڭ باسشىسى قول قويدى. وسى شارتتىڭ كۇشىنە ەنۋى قازاقستان مەن وزبەكستان اراسىنداعى مەملەكەتتىك شەكارانى حالىقارالىق قۇقىقتىق شەگەندەۋدىڭ 19 جىلدىق پروسەسىنىڭ تولىق اياقتالۋىن بىلدىرەدى»، - دەدى ول سىم-دە وتكەن باسپا ءسوز ءماسليحاتىندا.

ونىڭ ايتۋىنشا، قوس مەملەكەتتىڭ اراسىنداعى شارت كۇشىنە ەنۋ ءۇشىن 100 راۋندتان تۇراتىن كەلىسسوز جۇرگىزىلگەن.

«ۇزىندىعى 2 357 شاقىرىم بولاتىن شەكارا سىزىعى 1 301 شەكارالىق بەلگىمەن بەلگىلەنىپ، كولەمى 8 مىڭ پاراقتان اساتىن شەگەندەۋ قۇجاتتارى كورسەتىلدى. وسى وقيعا مەملەكەتتىك شەكارا اۋدانىندا قاۋىپسىزدىك پەن تۇراقتىلىقتى نىعايتۋعا، ەكىجاقتى ءوڭىرارالىق جانە شەكارا ماڭىنداعى ءوزارا ءىس-قيمىلدى تەرەڭدەتۋگە ىقپال ەتەدى»، - دەدى ايبەك سمادياروۆ.