فاكۋلتەت دەكاندارى مەن كافەدرا مەڭگەرۋشىلەرىنىڭ لاۋازىمدارىنا كونكۋرس جاريالاندى
قازاق ۇلتتىق اگرارلىق زەرتتەۋ ۋنيۆەرسيتەتىندە سوڭعى ۋاقىتتا باسقارۋ جۇيەسىندە، ءبىلىم بەرۋ مەن عىلىمدى دامىتۋعا بايلانىستى ۇلكەن وزگەرىستەر ءجۇرىپ جاتىر.
جاڭا زامان تالابىنا ساي حالىقارالىق دەڭگەيدەگى ۋنيۆەرسيتەت اتانۋ ءۇشىن، ەڭ الدىمەن باسەكەگە قابىلەتتى مىقتى كادرلارى بولۋى ءتيىس. بۇل - نارىق زاڭدىلىعى. وسى تالاپتاردىڭ نەگىزىندە ۋنيۆەرسيتەت باسشىلىعىنىڭ ۇسىنىسى بويىنشا، پروفەسسور-وقىتۋشىلار قۇرامىنىڭ (پوق) ەڭبەكاقىسى 45 پايىزعا دەيىن، كافەدرا مەڭگەرۋشىلەرى مەن فاكۋلتەت دەكاندارىنىڭ جالاقىسى 1،5 ەسەگە كوتەرىلدى. عىلىم دوكتورى دارەجەسى بار كافەدرا مەڭگەرۋشىلەرى 450 مىڭ تەڭگەگە دەيىن، فاكۋلتەت دەكاندارى 550 مىڭ تەڭگەگە دەيىن الاتىن بولادى.
وسى اتالعان وزگەرىستەر مەن قولعا الىنىپ جاتقان وزگە دە يننوۆاسيالىق باستامالار تۋرالى ۋنيۆەرسيتەتتىڭ باسقارما توراعاسى-رەكتورى، ق ر ۇعا اكادەميگى اقىلبەك كۇرىشبايەۆ جاس عالىمدارمەن كەزدەسۋدە كەڭىنەن توقتالىپ ءوتتى.
«بۇگىن وزدەرىڭىزبەن اقىلداسۋ ءۇشىن بىرنەشە ماسەلەنى نازارلارىڭىزعا ۇسىنامىن. ەڭ الدىمەن، ۋنيۆەرسيتەتتىڭ باسقارۋ جۇيەسىن جەتىلدىرۋ ماقساتىندا ءبىلىمدى، بىلىكتى جاس كادرلارلارمەن تولىقتىرۋىمىز قاجەت. وسىعان وراي، 6 فاكۋلتەتتىڭ دەكاندارى مەن 27 كافەدرا مەڭگەرۋشىلەرىنىڭ لاۋازىمدارىنا 1 اقپانعا دەيىن كونكۋرس جاريالانىپ وتىر. وسى كونكۋرسقا سىزدەردى جانە جالاقىنىڭ تومەندىگىنە بايلانىستى ەرتەرەكتە باسقا مەكەمەلەرگە اۋىسىپ كەتكەن تانىمال جاس عالىمدارىمىزدى قاتىسۋعا شاقىرامىن»، - دەپ اتاپ ءوتتى اقىلبەك قاجىعۇل ۇلى.
سونداي-اق، كەزدەسۋ بارىسىندا ىرگەلى جانە قولدانبالى عىلىمنىڭ دامۋىنا ەلەۋلى ۇلەس قوسقان جاس عالىمداردىڭ يننوۆاسيالىق ازىرلەمەلەرىن (يدەيالارىن) جانە وزىق جەتىستىكتەرىن قولداۋ، اۋىل شارۋاشىلىعى كەشەنىن دامىتۋعا ىقپال ەتەتىن عىلىمي زەرتحانالار جۇمىسىن كۇشەيتۋ، عىلىم جەتىستىكتەرىن پراكتيكا جۇزىندە وقۋ ۇدەرىسىنە ەنگىزۋ، جاستاردىڭ الەمدىك جەتەكشى جوولاردىڭ ءار باعىتتاعى عىلىمي جوبالارىنا ودان ارى بەلسەنە قاتىسۋ ماسەلەلەرى قىزۋ تالقىلاندى. بۇل رەتتە، ۋنيۆەرسيتەت عالىمدارىنىڭ عىلىمي ىزدەنىستەرىن ماتەريالدىق تۇرعىدا قولداۋ ماقساتىندا KPI جۇيەسى نەگىزىندە ىنتالاندىرۋ شارالارى جالعاسىن تاباتىندىعى اتاپ ايتىلدى.
تاعى ءبىر ماڭىزدى تاقىرىپ – حالىقارالىق ارەنادا قازۇازۋ-دىڭ مارتەبەسىن كوتەرۋ، عىلىم مەن ءبىلىم بەرۋ سالاسىندا، اگروونەركاسىپتىڭ وزەكتى ماسەلەلەرى بويىنشا بىرلەسكەن عىلىمي زەرتتەۋلەر جۇرگىزۋ، جاڭا تەحنولوگيالاردى ترانسفەرت جاساۋ، باسەكەگە قابىلەتتى مامانداردى بىرلەسە دايارلاۋ مۇمكىندىكتەرىنىڭ اياسىن كەڭەيتۋ تۋرالى پىكىر الماسىلدى. سونىمەن بىرگە، ۋنيۆەرسيتەتتىڭ پوق جانە قىزمەتكەرلەرىنە ءوز عىلىمي تابىستارى مەن ەڭبەكتەرىن الەمدىك عىلىمي ورتاعا تانىتۋ، Scopus جانە Web of Science دەرەكقورىنداعى باسىلىمدارعا جاريالانۋ ءۇشىن اعىلشىن ءتىلىن يگەرۋ بويىنشا كۋرستار مەن ارنايى كوۆوركينگ ورتالىعى اشىلاتىنى ايتىلدى.
كەزدەسۋ وتە جىلى جانە ەركىن اڭگىمە جاعدايىندا ءوتتى. جاس عالىمدار قايسار تابىنوۆ، قۋانتار اليحانوۆ، مايرا قۇسايىنوۆا، گۇلسىم ايتقحوجايەۆا، ت.ب. وزدەرىمەن اشىق ديالوگ ۇيىمداستىرعان ۋنيۆەرسيتەت باسشىلىعىنا ريزاشىلىقتارىن ءبىلدىرىپ، زاماناۋي حالىقارالىق دارەجەدەگى اگرارلىق زەرتتەۋ جوعارى وقۋ ورنىن قۇرۋ ءۇشىن بەلسەندىلىكپەن قىزمەت ەتۋگە ءارقاشان دايىن ەكەندىكتەرىن جەتكىزدى.
ۋنيۆەرسيتەتتىڭ باسشىسى اقىلبەك كۇرىشبايەۆ جاس عالىمداردىڭ بارلىق سۇراقتارىنا جاۋاپ بەرىپ، اداعى بىرلەسكەن قىزمەتتە تابىسقا جەتە بەرۋلەرىنە ساتتىلىك تىلەدى.
قازۇازۋ باسپا ءسوز قىزمەتى