كورمەگە سۋرەتشىنىڭ 200-دەن استام تۋىندىسى قويىلادى
ق ر مەملەكەتتىك ورتالىق مۋزەيىندە ەلىمىزگە تانىمال كاريكاتۋراشى-سۋرەتشى، ق ر مادەنيەت قايراتكەرى، ق ر سۋرەتشىلەر، جۋرناليستەر، جازۋشىلار وداقتارىنىڭ مۇشەسى نۇرازحان ەركىن يبراگيم ۇلىنىڭ «كاريكاتۋرا تارلانى» اتتى كورمەسى اشىلادى.
ەركىن نۇرازحان – قازاق بەينەلەۋ ونەرىندە كاريكاتۋرا، شارج (دوستىق ءازىلدى پورترەت) جانرىنىڭ قالىپتاسىپ، دامۋىنا وزىندىك قولتاڭباسىن قوسقان، بۇگىندە تانىمال كوشباسشىسى سانالاتىن بەلگىلى سۋرەتشى.
1982 جىلدان بەرى ادەبيەت، ونەر، قوعام قايراتكەرلەرىنىڭ ءازىل پورترەتتەر گالەرەياسىن جاساپ كەلەدى. ول ەلىمىز تاۋەلسىزدىك العان جىلدار ىشىندە الەۋمەتتىك-ەكونوميكالىق، ساياسي ومىرىمىزدەگى كەلەڭسىز قۇبىلىستاردى سىنعا العان ساتيرالىق سۋرەتتەر توپتاماسىن دۇنيەگە اكەلدى. سونداي-اق، وقىرماندارعا وزەكتى ماسەلەلەردى كوتەرگەن ماقالالارى جانە دەرەكتى دۇنيەلەرىمەن تانىلعان قالامگەر.
سۋرەتشىنىڭ بارعان تاقىرىپتارى ءار الۋان، بەينەلەگەن كەيىپكەرلەرى ساڭ قىرلى مىنەز-قۇلىقتى بولسا، سۋرەت سالۋداعى تەحنيكاسى تىم قاراپايىم. قاعاز، قالامۇش، تۋش، اكۆارەل بوياۋى، گەلدى قالام، ءتۇرلى-تۇستى قارىنداشتار. كاريكاتۋراشىنى شىعارماشىلىققا جەتەلەگەن دە – ءومىردىڭ ءوزى.
قوعام مەن ادام، ساياسات پەن زامان كەڭىستىگىندە قايشىلاسقان مۇددەلەر مايدانى مەن كەراعار كوزقاراستاردى ءجىتى باقىلاپ، اق-قاراسىن انىقتاپ، ىشكە جيعان-تۇيگەنىن ەل نازارىنا ۇسىنادى.
كورەرمەنىن بەيجاي قالدىرماي، قوعامىمىز بەن زامانىمىزدىڭ كىلتيپانىن تابۋعا ۇندەپ، سول پروسەستەرگە قاتىسۋعا، وي تۇيۋگە، اركىم ءوز تۇعىرىن ( پوزيسياسىن) انىقتاپ الۋعا شاقىرادى. سودان دا سۋرەتشىنىڭ ازاماتتىق پوزيسياسى انىقتالا تۇسەدى. ول ادىلدىك پەن ادالدىق، شىندىق پەن اقيقات جاعىندا بولسا، قارا حالىقتىڭ مۇڭ-مۇقتاجىن ايتىپ، ومىردەگى وزگەرىستەرگە سولاردىڭ تۇرعىسىنان قاراپ باعاسىن بەرە السا، ناعىز حالىقشىل سۋرەتشى، ءوز ەلىنىڭ پاتريوتى دەگەن ءسوز.
«كاريكاتۋرا تارلانى» كورمەسى سونىڭ دالەلىندەي كورەرمەنىن شىنشىل دا ايقىن سىرلارعا تولى دۇنيەتانىمىمەن تابىستىرادى. تاۋەلسىزدىك العان ەلىمىزدىڭ دامۋىنا كەدەرگى كەلتىرەر كەرىتارتپا كۇشتەردى كەلەكەلەپ كوز الدىمىزعا اكەلەدى. بىزدەردى بەيعام دا نەمقۇرايلى جۇرمەي، ەلىمىز بەن جەرىمىز ءۇشىن بەلسەندى كۇرەسكەر بولۋعا شاقىرادى.«وزىنە ءوزى كۇلە بىلگەن حالىق - ۇلى حالىق» دەپ فرانسۋزدار ايتقانداي، كۇلە ءبىلۋدىڭ ءبىر جولى وسى كاريكاتۋرالىق تۋىندىلار. كاريكاتۋرا – اششى ايتىلعان سىن. دەگەنمەن، ەركىن يبراگيم ۇلى اششى شىندىقتى استارلاپ، تۋىندىلارىندا وبرازدار ارقىلى وي تۋدىرىپ، بولمىسىمىزدىڭ كۇنگەيى مەن كولەڭكەسىن كورسەتە بىلگەن. «كۇلكىنىڭ ار جاعىندا مازاق ەمەس – مازاسىزدانۋ، جازعىرۋ ەمەس – جان اشۋ جاتقانىن جۇرت تۇسىنسە دەيمىن. قۇلاعاندى تۇرعىزۋ، قيراعاندى بۇتىندەۋ، جىلاعاندى جۇباتۋ، كەرەناۋدى وياتۋ، مۇڭايعاندى ەزۋ تارتقىزۋ – ساتيرالىق سۋرەتتەردىڭ ابزال بورىشى بولىپ قالا بەرمەك» - دەيدى سۋرەتشى.
2023 جىلدىڭ 17 قاڭتارىندا، ساعات 15.00-دە مۋزەي قورىنا 500-دەن استام ەڭبەكتەرىن سىيعا تارتقان سۋرەتشىنىڭ 200-دەن استام تۋىندىلارى كورمەدە ورىن الادى.
كورمە 2023 جىلدىڭ 31 قاڭتارىنا دەيىن جۇمىس ىستەيدى.