الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا «قازترانسگازايماق» اق جانە توتەنشە جاعدايلار دەپارتامەنتى وكىلدەرىنىڭ قاتىسۋىمەن بريفينگ ءوتتى. سپيكەرلەر تابيعي گازدى پايدالانۋ بويىنشا ۇسىنىستار بەرە وتىرىپ، جىلىتۋ ماۋسىمىنا دايىندىق تۋرالى ايتىپ بەردى، دەپ حابارلايدى اlmaty-akshamy.kz.
«قازترانسگاز ايماق» اق الماتى وندىرىستىك فيليالى ديرەكتورىنىڭ ءبىرىنشى ورىنباسارى تالعات بۇرامبايەۆ ءوز سوزىندە بۇگىنگى تاڭدا ولاردىڭ كاسىپورنى 5 521 كم جوعارى، ورتا جانە تومەن قىسىمدى گاز قۇبىرلارىن پايدالاناتىنىن، ونىڭ ىشىندە الماتى قالاسى بويىنشا – 4 767 كم جانە الماتى وبلىسى بويىنشا 754 كم.گاز قۇبىرلارى قاناعاتتانارلىق جاعدايدا ەكەنىن، جەلىلەردىڭ توزۋى 36% قۇرايتىنىن حابارلادى.
ول سونداي-اق كۇز-قىس ماۋسىمىنا جۇمىسقا دايىندىق بويىنشا جوسپارلانعان جۇمىستار 100% - عا اياقتالعانىن اتاپ ءوتتى.
«2023-2024 جج. كۇزگى-قىسقى ماۋسىمنان ويداعىداي ءوتۋ جانە تۇتىنۋشىلاردى ساپالى گازبەن قامتاماسىز ەتۋ ءۇشىن 10 جوندەۋ، سونداي-اق 7 اۆاريالىق بريگادا جۇمىلدىرىلدى. جوندەۋ بريگادالارى قاجەتتى ماتەريالدارمەن، قۇرىلعىلارمەن، قۇرالدارمەن، ارنايى قۇرالدارمەن كيىممەن جانە تەحنيكامەن تولىق قۇرامدا جابدىقتالعان»، - دەدى ت. بۇرامبايەۆ.
سونىمەن قاتار، «ينتەرگاز ورتالىق ازيا» گاز جەلىلەرىن پايدالانۋ قىزمەتى گاز قۇبىرلارىن ارالاپ، حالىقتى تۇرمىستا گازدى ءقاۋىپسىز پايدالانۋ ەرەجەلەرى تۋرالى حاباردار ەتەدى. سونداي-اق، اپاتتىق وتىنىمدەرگە بارعان كەزدە اپاتتىق-ديسپەچەرلىك قىزمەت قىزمەتكەرلەرى جادىنامالار تاراتا وتىرىپ، تۇرمىستا تابيعي گازدى ءقاۋىپسىز پايدالانۋ جونىندە نۇسقاۋلىق بەرەدى.
بريفينگكە «قازترانسگازايماق» اق الماتى وندىرىستىك فيليالىنىڭ وندىرىستىك-تەحنيكالىق ءبولىمىنىڭ باستىعى دىلدابەك كۇلتىمىروۆ تە قاتىستى. ونىڭ ايتۋىنشا، ولار تابيعي گاز بەن كومىرتەگى توتىعى اعىپ كەتكەن كەزدە گاز بەرۋدى توقتاتاتىن گاز دابىلدارىن ورناتۋدى ۇسىنادى. گاز جابدىعىنىڭ دۇرىس جۇمىس ىستەمەۋى، ءتۇتىن مۇرجالارى مەن ۆەنتكانالداردى ۋاقتىلى تەكسەرمەۋ جانە ولارعا قىزمەت كورسەتۋ ءتۇتىن مۇرجاسىندا تارتۋدىڭ بولماۋىنا بايلانىستى كومىرتەگى توتىعىمەن ۋلانۋعا اكەلۋى مۇمكىن.
«قازترانسگازايماق» اق الماتى وندىرىستىك فيليالى وندىرىستىك-تەحنيكالىق ءبولىمى باسشىسىنىڭ ورىنباسارى عالىم بەكەن تابيعي گازدى پايدالانۋ بويىنشا ۇسىنىستار بەردى.
«پەشتەردى پايدالانۋعا ءوز ىس-ارەكەتتەرىن باقىلامايتىن جانە پەشتەردى پايدالانۋ ەرەجەلەرىن بىلمەيتىن بالالار مەن ادامداردى جىبەرۋگە تىيىم سالىنادى. گازدى قىزدىراتىن قۇرىلعىعا ءوز بەتىنشە قانداي دا ءبىر وزگەرىستەر ەنگىزۋگە، جىلىتۋ ءۇشىن گاز اسپاپتارىن پايدالانۋعا، جابىق تەرەزەلەردە پەشتەردى پايدالانۋعا، گاز اسپاپتارى ورناتىلعان ءۇي-جايدا ۇيىقتاۋعا جانە دەمالۋعا بولمايدى. گازدىڭ اعىپ كەتۋىنە كۇدىك تۋىنداعان جاعدايدا گاز قىزمەتىنە «104» نومىرىنە قوڭىراۋ شالۋ قاجەت، سونداي - اق پاتەردە گازدىڭ ءيىسى بولعان كەزدە بارلىق گاز كراندارىن دەرەۋ جاۋىپ، ءۇي-جايدى تەكسەرىپ، اشىق وتتى پايدالانباۋ، ەلەكتر قۇرالدارىن قوسپاۋ قاجەت»، - دەپ قورىتىندىلادى عالىم بەكەن.