الماتى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى "قازسەلدەنقورعاۋ" مەكەمەسىنىڭ بۇرىنعى باسشىسى كاريم كوكرەكبايەۆقا قاتىستى ۇكىم شىعاردى، - دەپ حابارلايدى aqshamnews.kz.
سوت مالىمەتىنشە، كوكرەكبايەۆ پەن ونىڭ بۇرىنعى ورىنباسارى اسا ءىرى كولەمدە پارا العانى ءۇشىن ايىپتالعان. ال ءۇشىنشى ادام – ج ش س ديرەكتورى اسا ءىرى كولەمدە پارا بەرگەنى جانە ۇرلاۋ ماقساتىنسىز مۇلىكتىك زالال كەلتىرگەنى ءۇشىن جاۋاپقا تارتىلعان.
"سوتتا ك. مەن ا. قىزمەت بابىندا جۇرگەن كەزدە الدىن الا ءسوز بايلاسىپ، ج ش س ديرەكتورى پ.-دان ورىندالعان جۇمىستار اكتىلەرىن كەدەرگىسىز قول قويۋ ءۇشىن اسا ءىرى كولەمدە پارا العانى انىقتالدى. سونداي-اق پ. ءىس جۇزىندە ورىندالماعان قۇرىلىس-مونتاج جۇمىستارىنىڭ اكتىلەرىنە قول قويۋدى ۇيىمداستىرعان"، – دەلىنگەن سوت حابارلاماسىندا.
سالدارىنان مەملەكەتكە 1 987 827 622،63 تەڭگە كولەمىندە زالال كەلتىرىلگەن.
القابيلەردىڭ ۇكىمىمەن كوكرەكبايەۆ پەن ونىڭ بۇرىنعى ورىنباسارى كىنالى دەپ تانىلدى.
"سوت ۇكىمىمەن ك. 12 جىلعا باس بوستاندىعىنان ايىرىلدى، ال ا. مەن پ.-عا 11 جىل جازا تاعايىندالدى. بارلىعى ءومىر بويى مەملەكەتتىك قىزمەتتە لاۋازىم اتقارۋ قۇقىعىنان ايىرىلدى"، – دەپ قوستى سوت وكىلدەرى.
ۇكىم زاڭدى كۇشىنە ەنگەن جوق.
ەسكە سالايىق، جامبىل وبلىسىنىڭ ەكس-اكىمى جانە سول كەزدەگى "قازسەلەزاششيتا" باسشىسى كاريم كوكرەكبايەۆتىڭ ۇستالعانى 2022 جىلعى 27 جەلتوقساندا بەلگىلى بولدى. ول كەزدە انتيكور كوكرەكبايەۆتىڭ پارا الىپ جاتقان ساتىندە ۇستالعانىن حابارلاعان. 2023 جىلعى مامىردا تەرگەۋ ورگاندارى بۇل ىستە فيگۋرانتتار كاسىپكەرلەردەن ورىندالعان جۇمىستار اكتىلەرىن قول قويۋ مەن جالپى قامقورلىق ءۇشىن جالپى سوماسى 396 ميلليون تەڭگە پارا العانىن راستاعان.