«سيفرلى قۇجاتتار» قىزمەتىندە 18 قۇجات بار.
eGov mobile موبيلدىك قوسىمشاسى ارقىلى «قازپوشتا» اق-دا ەندى جەكە كۋالىكتىڭ سيفرلىق بالاماسىمەن عانا سالەمدەمەنى قابىلداپ الۋعا جانە جولداۋعا بولادى، دەپ حابارلايدى Almaty-aksamy.kz سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنە سىلتەمە جاساپ.
«قازپوشتا» اق تۇتىنۋشىلارى ەلىمىزدىڭ بارلىق وڭىرىندەگى بولىمشەلەردە سالەمدەمەنى قابىلداعاندا جانە جولداعاندا سيفرلىق جەكە كۋالىكتى پايدالانا الادى. بۇل جوبا "قازپوشتانىڭ" پوشتا قىزمەتتەرى ءۇشىن پيلوتتىق رەجيمدە شىعارىلدى. جاڭا قىزمەتتەردى پايدالانۋ ءۇشىن:
- eGov mobile موبيلدىك قوسىمشاسىنا تىركەلىڭىز؛
- «قىزمەتتەر» بولىمىنەن «سيفرلى قۇجاتتاردى» تاڭداڭىز؛
- قاجەتتى قۇجاتتى تاڭداڭىز؛
- قۇجاتقا «قولجەتىمدىلىكتى اشۋ» باتىرماسىن باسىڭىز؛
- «قازپوشتا» وپەراتورىنا سمارتفون ەكرانىندا پايدا بولعان التى ورىندى قىسقا كودتى ايتىڭىز. كود اۆتوماتتى تۇردە جاسالادى جانە ەشقاشان قايتالانبايدى.
وپەراتور ءوزىنىڭ دەرەكتەر بازاسىنا بىرەگەي قىسقا كودتى ەنگىزەدى، وسىدان كەيىن جۇيە اۆتوماتتى تۇردە تۇتىنۋشىنىڭ ءتولقۇجاتىن جۇكتەيدى.
بۇل سايكەستەندىرۋ مەحانيزمى تۇتىنۋشىنىڭ قاۋىپسىزدىگىن قامتاماسىز ەتىپ، ءۇشىنشى تۇلعا تاراپىنان بولۋى مۇمكىن الداۋدىڭ الدىن الادى.
قازىرگى تاڭدا eGov mobile قوسىمشاسىنىڭ «سيفرلى قۇجاتتار» قىزمەتىندە 18 قۇجات بار. ولاردىڭ ىشىندە ەڭ كوپ پايدالانىلاتىنى: جەكە كۋالىك، جۇرگىزۋشى كۋالىگى، ۆاكسينا پاسپورتى، پسر تەست جانە تۋۋ تۋرالى كۋالىك.
بۇدان بولەك، سيفرلىق قۇجاتتاردى ەلىمىزدىڭ بارلىق اۋەجايلارىندا، «قتج» اق-نىڭ تەمىرجول ۆوكزالدارىندا ۆاگونعا وتىرعىزۋ كەزىندە، «وتباسى بانك» اق بولىمشەلەرىندە، Beeline جانە ەكىنشى دەڭگەيلى بانكتەر مەن نوتاريۋس قىزمەتتەرىندە پايدالانۋعا بولادى.