الماتى تەحنولوگيالىق ۋنيۆەرسيتەتىندە قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى ستۋدەنت جاستارمەن، وقىتۋشى پروفەسسورلارمەن، قوعام بەلسەندىلەرىمەن جانە جۋرناليستەرمەن، ت.ب. كەزدەستى. جيىندا «اقجول» دەموكراتيالىق پارتياسىنىڭ ءتوراعاسى ازات پەرۋاشيەۆ، ءماجىلىس دەپۋتاتى قازبەك يسا ءسوز الدى. كەزدەسۋدى وقۋ ورنىنىڭ ءبىرىنشى پرورەكتورى باۋىرجان نۇراحمەتوۆ جۇرگىزىپ وتىردى.
شارادا كوللەكتورلىق كومپانيالاردىڭ ماسەلەسى، نەسيە، قاڭتار وقيعاسى جانە الەۋمەتتىك-ەكونوميكالىق باعىتتاعى ماسەلەلەر ءسوز بولدى.
ازات پەرۋاشيەۆ،
«اقجول» دەموكراتييالىق پارتيياسىنىڭ تءوراعاسى:
مەملەكەت باسشىسى قاسىم-جومارت توقايەۆتىڭ جاساپ جاتقان باستامالارى ايقىن. ءبىز ەلدىڭ جاعدايىن جاقسارتايىق دەسەك، ساياسي وزگەرىس قاجەت. كەشەگى قاڭتار وقيعاسى بارىمىزگە ساباق بولدى. وسىنداي سىندارلى شاقتا ءبارىمىز ءبىر اتانىڭ بالاسىنداي، ءبىر قولدىڭ سالاسىنداي تىرلىك ەتۋىمىز كەرەك. بارلىعىمىز جۇدىرىقتاي جۇمىلىپ، ەلدى وركەندەتۋگە اتسالىسايىق. ەگەر ءوزىمىزدى ءوزىمىز قولداماساق، دەمەمەسەك، ءبىزدىڭ تىنىشتىعىمىز باسقالارعا قاجەت ەمەس. بۇل ەلدىڭ تاعدىرى ءوزىمىزدىڭ قولىمىزدا. سوندىقتان بۇلعاق كەزىندە قاتە باسىپ قالعان قاراكوزدەرىمىزگە كەشىرىممەن قاراۋىمىز كەرەك سياقتى. شالىس باسقاندارىن وزدەرى دە ايتۋدا. ءبىز بۇل جونىندە ەكى رەت دەپۋتاتتىق ساۋال جولدادىق. مەملەكەتىمىزدىڭ بولاشاعى - جاستاردىڭ قولدىندا. بىرلىكتى ساقتايىق! ەلىمىزدى دامىتايىق!
قازبەك يسا،
ءماجىلىس دەپۋتاتى:
ءبىز ءۇشىن ءبىلىم، ونىڭ ىشىندە تەحنولوگيالىق ءبىلىم ماڭىزدى. ءوزىمىز دە تەحنولوگيالىق ۋنيۆەرسيتەتتىڭ قابىرعاسىندا كەزدەسىپ وتىرمىز. ەندى قاڭتار وقيعاسى تۋرالى ايتپاي وتە المايمىز. تۇرمەلەردە قامالعان جاستارمەن كەزدەستىك. كەزەكشى پوليسيا ءبارى جاقسى ەكەنىن ايتادى. ءبىراق ءتىزىلىپ تۇرعان جاستاردىڭ كوزىنەن قۇتقارۋشىلار كەلگەندەي ءۇمىت ساۋلەسىن كوردىك. قولدان كەلگەنشە ولاردىڭ ماسەلەسىن شەشۋگە تىرىسۋدامىز. بۇل جاستار - نەگىزىنەن اۋىلدان كەلگەندەر. اياقتارىنا كيگەنى كراسسوۆكا. وسىدان-اق ولاردىڭ الەۋمەتتىك جاعدايدى تۇسىنۋگە بولادى. بۇلىكشى، سودىردان بەيبىت جاستاردى اجىراتا ءبىلۋىمىز كەرەك. ەلدى مەكەننەن كەلگەن جاس ورەندەر ءۇشىن قالادا قازاق ءتىلى جاراي قويمايدى. سوندىقتان مەملەكەتتىك ءتىل تۇعىرىنا قونباي، ءىس ونبەيدى. بىرتىندەپ اتالعان ماسەلەلەر ىسكە اسادى دەگەن ۇمىتتەمىز. وسى باعىتتا بارشا قوعام ۇلەس قوسقانى ابزال. ەلىمىز امان بولسىن!
باۋىرجان نۇراحمەتوۆ،
الماتى تەحنولوگيالىق ۋنيۆەرسيتەتىنىڭ ءبىرىنشى پرورەكتورى:
قاستەرلى وتانىمىزدا ۇلكەن وزگەرىستەر بولىپ جاتىر. ءار تاريحي كەزەڭنىڭ وزىندىك جاڭارۋ جولى بولادى. ءبىز جاستارمەن تىكەلەي جۇمىس ىستەيمىز. وقۋ وردامىزدا تەحنيكالىق باعىتتا ماماندار دايارلانادى. ولاردىڭ كوبىسى جەمىستى قىزمەت ەتىپ ءجۇر. ەلىمىزدىڭ دەپۋتاتتارى ۋنيۆەرسيتەتىمىزدە جاستارمەن، وقىتۋشىلارمەن، ت.ب جۇزدەسىپ وتىر. ءبىزدىڭ ستۋدەنتتەر وزدەرىنىڭ بەلسەندىلىگىن تانىتىپ، ءارتۇرلى تاقىرىپتا ساۋالدارىن جولدادى. جالپى، قازاقستان قوعامىن وركەنيەتكە باستايتىن جاستار. ەندەشە بولاشاعىمىز تاربيەلى، ءبىلىمدى دە بىلىكتى جاستاردىڭ قولىندا بولادى دەپ سەنەمىز.