الاياقتار قولدانعان 6 ءموبيلدى قوسىمشا انىقتالعان
سوڭعى كەزدە ۇلتتىق كومپانيالاردىڭ اتىن جامىلىپ، حالىقتى ينۆەستيسيا سالىپ، وڭاي جولمەن اقشا تابۋعا شاقىراتىن الاياقتىق ارەكەتتەر ءورشىپ تۇر، دەپ حابارلايدى Almaty-akshamy.kz «قازمۇنايگاز» ۇلتتىق كومپانياسىنىڭ باسپا ءسوز قىزمەتىنە سىلتەمە جاساپ.
باسپا ءسوز قىزمەتىنىڭ حابارلاۋىنشا، ينتەرنەتتە، اتاپ ايتقاندا Google، Yandex ىزدەۋ جۇيەلەرىندە، YouTube جانە وزگە دە الەۋمەتتىك جەلىلەردە «مۇنايعا ينۆەستيسيا سالىپ، جوعارى تابىسقا كەنەل» دەگەن جەلەۋمەن جارنامالار جاپپاي تاراتىلا باستاعان، ول سىلتەمەلەر الاياقتار قۇرعان ارنايى سايتتارعا باعىتتايدى.
حالىقتى «قۇرىعىنا» ءتۇسىرۋ ءۇشىن الاياقتاردىڭ سايتىن «ۇلتتىق كومپانيالاردىڭ رەسمي سايتى»، سونداي-اق «قارجىلىق» نەمەسە «ينۆەستيسيالىق» كومپانيالاردىڭ ۆەب-رەسۋرستارى رەتىندە كورسەتەدى. بۇل جالعان قارجىلىق كومپانيالار بەلگىلى ءبىر سوماعا اكسيا ساتىپ الۋدى ۇسىنىپ، بىر-ەكى ايدا ينۆەستيسيالىق تابىس الىپ تۇر دەگەن جەلەۋمەن قىزىقتىرۋعا تىرىسادى.
ال بۇل ارەكەتتەرى نانىمدى بولۋى ءۇشىن ولار ۇلتتىق كومپانيالاردىڭ وسىعان دەيىن جاريالانعان رەسمي بەينەروليكتەرىن قايتا دىبىستاپ قولدانادى. ناتيجەسىندە، الاياقتاردىڭ سايتىنا وتكەندەر كومپانيا اتاۋى بىرنەشە رەت قايتالاناتىن، كاسىبي دىبىستالعان جالعان بەينەروليكتى تاماشالايدى.
الاياق سايتتاردىڭ الگوريتمدەرى ۇقساس. ادەتتە ولاردىڭ دەرەكقورى جوق جانە تۇراقتى HTML سايتتار بولىپ كەلەدى. بۇل ولاردى USB ديسكىنە كوشىرىپ، ءبىر دومەننەن ەكىنشىسىنە وڭاي تاسىمالداۋعا مۇمكىندىك بەرەدى. دەگەنمەن، ءقازىر ماقساتتى اۋديتوريانىڭ سۇرانىسىنا بايلانىستى ءماتىندى جىلدام اۋىستىرا الاتىن، دەرەكقوردى كەڭ، زاماناۋي باعدارلامالىق قۇرالداردى قولداناتىن ديناميكالىق سايتتار دا كەزدەسەدى. بۇل جالعان سايتتاردىڭ اتاۋى .com سەكىلدى حالىقارالىق ايماقتاردا تىركەلەدى.
مىسالعا سوڭعى كەزدە «قازمۇنايگاز» ۇلتتىق كومپانياسىنىڭ اتىن جامىلعان جارنامالار ازايماي تۇر. كومپانيا وكىلدەرى سايتتاردان بولەك، الاياقتار قولدانعان 6 ءموبيلدى قوسىمشا انىقتالعانىن ايتادى.
قازاقستاننىڭ قۇقىق قورعاۋ جانە باسقا دا قۇزىرەتتى ورگاندارى وسى سەكىلدى الاياقتىق جولمەن اشىلعان رەسۋرستاردى انىقتاپ، ولاردىڭ جولىن كەسۋ بويىنشا جۇمىس اتقارىپ جاتقانىن ايتادى. دەگەنمەن، ينتەرنەتتەگى الاياقتاردىڭ ىزىنە ءتۇسىپ، كىنالىنى انىقتاۋ قيىن. ول سايتتار كوپ جاعدايدا شەتەلدىك مەكەنجايلارعا تىركەلگەن بولىپ شىعادى. سوندىقتان قۇقىق قورعاۋ ورگاندارى، قارجىلىق ۇيىمدار، ۇلتتىق كومپانيالار ازاماتتارعا الاياقتاردان ساق بولۋدى ەسكەرتەدى.
قازمۇنايگاز بۇل ماسەلە بويىنشا قارجى مونيتورينگى اگەنتتىگىنە (افم) جانە ۇلتتىق بانككە ءوتىنىش جولداعانىن مالىمدەدى.
«بۇل ءوتىنىش ىشكى ىستەر مينيسترلىگىنە بەرىلدى. ناتيجەسىندە نۇر-سۇلتان قالاسى پوليسيا دەپارتامەنتىنىڭ ەسىل اۋداندىق پوليسيا باسقارماسى قىلمىستىق ءىس قوزعادى. قازمۇنايگاز وسى قىلمىستىق ءىس بويىنشا جابىرلەنۋشى رەتىندە بارلىق دەرەكتەردى ۇسىندى. قازىرگى ۋاقىتتا اتالعان قۇقىق بۇزۋشىلىققا قاتىستى كۇدىكتىلەردى انىقتاۋعا باعىتتالعان تەرگەۋ ارەكەتتەرى مەن جەدەل-ىزدەستىرۋ شارالارى ءجۇرىپ جاتىر. كومپانيانىڭ قىزمەتى تۋرالى سەنىمدى اقپارات تەك www.kmg.kz سايتىندا جانە الەۋمەتتىك جەلىلەردەگى رەسمي اككاۋنتتاردا جاريالانادى»، - دەلىنگەن كومپانيا تاراتقان حابارلامادا.
قازاقستاندىقتار سونداي-اق 1459 ءنومىرى ارقىلى قارجى نارىعىن رەتتەۋ جانە دامىتۋ اگەنتتىگىنە حابارلاسىپ، تۇتىنۋشى رەتىندە قۇقىقتىق كەڭەس الا الادى.