مۇناي وڭدەۋ زاۋىتتارىن جاڭعىرتۋ جۇمىسىنىڭ ناتيجەلەرى قانداي؟
«قازمۇنايگاز» ۇك اق الاڭىندا قمگ باسقارما ءتوراعاسىنىڭ ورىنباسارى دميتريي ماكەيەۆ ۇلتتىق كومپانيانىڭ مۇناي وڭدەۋ سالاسىنداعى جۇمىسى، قازىرگى احۋالى مەن وسى باعىتتاعى جوسپارلارىنا ارنالعان پرەسس-كونفەرەنسيا وتكىزدى.، دەپ حابارلايدى Almaty-akshamy.kz.
قمگ مۇناي وڭدەۋ زاۋىتتارىندا 2018 جىلى اياقتالعان جاڭعىرتۋ جۇمىسى قازاقستانعا كەدەن وداعىنىڭ تەحنيكالىق رەگلامەنتىنىڭ تالاپتارىنا ساي، ك-4 سۇرىپتى وتىن ءتۇرىن شىعارۋعا مۇمكىندىك بەردى. جوعارى ەكولوگيالىق ستاندارتتى مۇناي ونىمدەرىن ءوندىرۋ ارقىلى قورشاعان ورتا مەن حالىققا تيەتىن زياندى اسەر ازايدى. سونىمەن قاتار، بەنزول جانە پاراكسيلول سياقتى قوسىمشا قۇنى جوعارى ەكسپورتقا شىعاتىن ونىمدەر وندىرىلە باستادى.
جالپى، مۇناي وڭدەۋ زاۋىتتارىن جاڭعىرتۋ جۇمىسى قازمۇنايگازعا ءوندىرىس كولەمىن جانە سالىق تولەمدەرىن ارتتىرۋعا، سونداي-اق ەكولوگيالىق كورسەتكىشتەردى جاقسارتۋعا مۇمكىندىك بەردى. بىلتىر وتاندىق مۇناي وڭدەۋ جانە مۇناي ونىمدەرىن شىعارۋ تاريحىندا بولماعان رەكوردتىق كورسەتكىشتەرگە قول جەتكىزىلدى. ماسەلەن، 2022 جىلى مۇناي وڭدەۋ كولەمى 17،8 ملن تونناعا جەتتى (2015 جىلى – 14،2؛ 2018 جىلى – 15،4 ملن توننا). اۆتوبەنزين ءوندىرىسى 5 ملن تونناعا جەتتى (2015 جىلى – 2،8؛ 2018 جىلى – 4 ملن توننا)، اۆياوتىن – 666 مىڭ توننا (285؛ 379 مىڭ توننا)، بيتۋم – 775 مىڭ توننا (202؛ 294 مىڭ توننا)، ديزەل وتىنى – 5،2 ملن توننا (3،9؛ 4،4 ملن توننا).
ءۇش كاسىپورىن (اتىراۋ مۇناي وڭدەۋ زاۋىتى (ءاموز)، پاۆلودار مۇناي-حيميا زاۋىتى (پمحز)، شىمكەنت مۇناي وڭدەۋ زاۋىتى (پقوپ) بويىنشا جيىنتىق سالىق تولەمدەرى 2022 جىلى 400 ملرد تەڭگەگە جەتتى، 2017-2019 جىلدارى بۇل كورسەتكىش 100 ملرد تەڭگەدەن اسپاعان.
جانار-جاعارماي ساپاسىن ارتتىرۋ ەسەبىنەن اۆتوكولىكتەردەن بولىنەتىن گاز قۇرامىنداعى زياندى زاتتار كولەمى كۇرت تومەندەدى: موتور وتىندارىنداعى كۇكىرت مولشەرى 10 ەسە، بەنزيندەردەگى بەنزول مولشەرى 5 ەسە، حوش ءيىستى كومىرسۋتەكتەر (قارا ءتۇتىن كوزى) 1،5 ەسە ازايدى.
زاۋىتتاردىڭ وپەراسيالىق تيىمدىلىگىن ارتتىرۋ
وتاندىق مۇناي وڭدەۋ زاۋىتتارى 2017 جىلعا دەيىن جىل سايىن كۇردەلى جوندەۋ جۇرگىزۋگە قويىلاتىن ەسكىرگەن تالاپتارمەن جۇمىس ىستەپ كەلدى. قمگ باستاماسىمەن جوندەۋ جۇمىستارىن جۇرگىزۋدىڭ زاماناۋي ەرەجەلەرى – «ۇلتتىق ستاندارت» تالاپتارى ەنگىزىلدى. جاڭا ەرەجەلەر مەن جوندەۋ ارالىق كەزەڭنىڭ ۇزارۋىنا بايلانىستى كاسىپورىنداردىڭ كۇردەلى جوندەۋگە جابىلۋ ۋاقىتى 120-دان 60 تاۋلىككە دەيىن قىسقاردى. 2017 جىلى زاۋىتتار جوندەۋگە بايلانىستى جۇمىسىن 140 كۇنگە توقتاتسا، بىلتىر تەك 41 كۇنگە جابىلدى.
ونىمدىلىكتى ارتتىرۋ جولىندا قولعا الىنعان ماڭىزدى شارالاردىڭ ءبىرى – كاسىپورىندار جۇمىسىن دەربەس جۇرگىزۋ مۇمكىندىگى. ماسەلەن، قمگ اتىراۋ مۇناي وڭدەۋ زاۋىتى تۇراقتى جۇمىس ىستەۋ ءۇشىن ەلەكتر قۋاتىمەن قامتاماسىز ەتەتىن جەكە ستانسيا سالۋ جوسپارلانۋدا.
مۇناي وڭدەۋ كولەمىن ارتتىرۋ
قمگ-نىڭ مۇناي وڭدەۋدەگى ستراتەگيالىق ماقساتتارىنا جانار-جاعارمايعا ارتقان سۇرانىستى وتەۋ جانە شىعاراتىن ءونىم تۇرلەرىن كوبەيتۋ جاتادى. بۇعان قول جەتكىزۋ ءۇشىن كاسىپورىنداردا وزىق تەحنولوگيالار ەنگىزىلىپ، تەحنولوگيالىق پروسەستەردى اۆتوماتتاندىرۋ، كادرلىق الەۋەتتى دامىتۋ، ۇزارتىلعان جوندەۋ ارالىق كەزەڭگە كوشۋ سەكىلدى شارالار ىسكە اسىرىلىپ جاتىر.
قازىرگى ۋاقىتتا بۇل ماقساتتا مۇناي وڭدەۋ زاۋىتتارىندا كەلەسى جوبالار قولعا الىندى: پقوپ – كاسىپورىن قۋاتىن ارتتىرۋ، ءاموز – مازۋتتى تەرەڭ وڭدەۋ ەسەبىنەن جەڭىل مۇناي ونىمدەرىن شىعارۋدى ۇلعايتۋ، پمحز – قىسقى ديزەل ءوندىرىسى، سۇيىتىلعان گاز قۇرامىندا كۇكىرتتى ازايتۋ.