الەمنىڭ بىرنەشە ەلى قالىپتان تىس جوعارى تەمپەراتۋرادان زارداپ شەگىپ وتىر. بۇدان بولەك، ەۋروپانىڭ وڭتۇستىگىندە، سونداي-اق اقش پەن قىتايدا اۋا تەمپەراتۋراسى 50 گرادۋستان جوعارى كوتەرىلدى، دەپ حابارلايدى Almaty-akshamy.kz ۆۆس-گە سىلتەمە جاساپ.
سينوپتيكتەر تەمپەراتۋرا اپتانىڭ ورتاسىنا دەيىن كوتەرىلەدى دەپ سانايدى.
بولجامعا سايكەس، سارسەنبىگە قاراي يتالياداعى ساردينيا ارالىنىڭ وڭتۇستىگىندە اۋانىڭ تەمپەراتۋراسى 46°C بولادى، ال قۇرلىقتىق يتاليانىڭ وڭتۇستىگىندە ەڭ جوعارى تەمپەراتۋرا - 43°C.
سوڭعى بولجامعا سايكەس، يسپانيانىڭ وڭتۇستىگىندە ماكسيمالدى تەمپەراتۋرا 46°C، ال فرانسيانىڭ وڭتۇستىگىندە - 40°C جەتەدى.
اقش-تىڭ وڭتۇستىك-باتىسىندا دا اپتاپ ىستىق بولادى. مەتەورولوگتار 38 قالادا تەمپەراتۋرا رەكوردى جاڭارۋى مۇمكىن دەپ ەسكەرتتى.
ۇلتتىق مەتەورولوگيا قىزمەتىنىڭ مالىمەتىنشە، جەكسەنبىدە لاس-ۆەگاستا (نيەۆادا شتاتى) تەمپەراتۋرا 46،6°C-قا جەتتى.
اريزونا شتاتىنىڭ فەنيكس قالاسىندا اۋا تەمپەراتۋراسىنىڭ رەكوردتىق 47،2°C دەيىن كوتەرىلەتىنى بولجانىپ وتىر.
جەكسەنبىدە ەڭ جوعارى تەمپەراتۋرا كاليفورنياداعى ءولىم القابىندا تىركەلگەن. عالامشارداعى ەڭ جىلى جەرلەردىڭ بىرىندە 53،9°C ىستىق بولدى.
ماماندار جىلۋ تولقىنىنىڭ باستى پروبلەماسى كۇندىزگى اۋا تەمپەراتۋراسىنىڭ جوعارىلاۋىندا ەمەس، تۇندە جەتكىلىكتى تۇردە تومەندەمەيتىنىندە دەپ سانايدى.
جاقىن ارادا، اريزوناداعى تۇنگى تەمپەراتۋرا 32°C-تان تومەندەمەيدى دەپ بولجانىپ وتىر.
بريتاندىق مەتەورولوگيالىق ورتالىقتىڭ مالىمەتىنشە، جەكسەنبىدە قىتايدا ەل تاريحىنداعى ەڭ جوعارى تەمپەراتۋرا تىركەلدى - شىڭجاڭ پروۆينسياسىندا تەرمومەتر باعاناسى 52،2°C دەيىن كوتەرىلدى.
وڭتۇستىك كورەيادا اۋا رايىنىڭ كۇرت وزگەرۋىنەن نوسەر جاۋىن جاۋىپ، كوشكىن مەن سۋ تاسقىنىنا ۇلاستى، ال جاپونيادا كەم دەگەندە 60 ادامعا ىستىق ءوتتى.
جاپون ارالدارىنداعى رەكوردتىق تەمپەراتۋرا (41،1°C) 2018 جىلى كۋماگايا قالاسىندا تىركەلگەن. بيىلعى جازدا الدىڭعى رەكورد جاڭارۋى ابدەن مۇمكىن.
بۇۇ-نىڭ مامانداندىرىلعان بولىمشەسى - دۇنيەجۇزىلىك مەتەورولوگيالىق ۇيىم جەرورتا تەڭىزى ايماعىندا قالىپتاسقان جىلۋ اعىمداعى اپتانىڭ ورتاسىنا قاراي كۇشەيىپ، تامىز ايىندا جالعاساتىنىن ەسكەرتتى.
كەلەسى اپتادا ماروككودا تەمپەراتۋرا 49°C دەيىن كوتەرىلۋى مۇمكىن.