ءماجىلىس دەپۋتاتى نارتاي ارالباي ۇلى قازاقستانداعى فۋتبولدىڭ دامۋى ەمەس، بيۋدجەتكە سالماق ءتۇسىرۋى باستى ماسەلە بولىپ وتىرعانىن ايتتى. ول پرەمەر-مينيستر ولجاس بەكتەنوۆكە جولداعان دەپۋتاتتىق ساۋالىندا مەملەكەت قارجىسىن جەپ وتىرعان فۋتبول كلۋبتارىن جەكەشەلەندىرۋدى تالاپ ەتتى.
"گول سالۋدان بۇرىن قازىناعا قول سالادى"
مەملەكەت باسشىسى جولداۋىندا فۋتبول كلۋبتارىن جەكەشەلەندىرۋدىڭ قاجەتىن اتاپ وتكەن بولاتىن.
"قازاقستاندىق فۋتبول كلۋبتارى قاقپاعا گول سالۋدان گورى، قازىناعا قول سالۋدى جاقسى مەڭگەرگەن. ءبىز ولاردىڭ بيۋدجەتكە ەمەس، جاسىل الاڭعا تالاسقانىن قالايمىز. ويتكەنى قازىرگى ناتيجەلەرى قارىن اشتىرادى"، – دەدى.
ميللياردتار قايدا كەتىپ جاتىر؟
رەسمي دەرەك بويىنشا، 2025 جىلى فۋتبول كلۋبتارىنا بيۋدجەتتەن 31،7 ميلليارد تەڭگە بولىنگەن. ونىڭ ىشىندە:
-
"ورداباسى" – 3،2 ملرد تەڭگە،
-
"اقتوبە" – 2،1 ملرد تەڭگە،
-
"قىزىل-جار" – 2 ملرد تەڭگە،
-
"استانا" – "سامۇرىق-قازىنادان" 5،3 ملرد تەڭگە العان.
ءبىرىنشى ليگاداعى كلۋبتار دا قالىسپاي، جىلىنا 1،2 ملرد تەڭگەگە دەيىن قارجى العان.
جاتتىقتىرۋشىلار جالاقىعا زار
وسى ميللياردتاردىڭ كولەڭكەسىندە قاراپايىم سپورت جاتتىقتىرۋشىلارى ماردىمسىز ايلىققا كۇن كورىپ ءجۇر.
-
2025 جىلى ەڭبەك جولىن ەندى باستاعان جاتتىقتىرۋشىنىڭ جالاقىسى – 117 مىڭ تەڭگە،
-
جوعارى ساناتتى جاتتىقتىرۋشى – نەبارى 145 مىڭ تەڭگە الادى.
سالدارىنان كوپتەگەن مامان ءبىلىم سالاسىنا كەتىپ جاتىر، سەبەبى مەكتەپ مۇعالىمدەرىنىڭ جالاقىسى الدەقايدا جوعارى.
دەپۋتاتتىڭ ۇسىنىستارى
نارتاي سارسەنعالي ۇكىمەتكە مىناداي ناقتى ۇسىنىس جاسادى:
-
بارلىق فۋتبول كلۋبىن جەكەشەلەندىرۋدى جەدەلدەتۋ؛
-
كلۋبتاردىڭ بۇگىنگە دەيىن العان قارجىسىن تولىق تەكسەرۋ؛
-
ۇكىمەتتىڭ №1193 بۇيرىعىنا وزگەرىس ەنگىزىپ، جاتتىقتىرۋشىلاردىڭ جالاقىسىن كوتەرۋ.
دەپۋتاتتىڭ ايتۋىنشا، فۋتبولعا بولىنگەن ميللياردتار ناتيجەسىز كەتىپ جاتىر. ال سول قارجىنى بۇقارالىق سپورتتى دامىتۋعا باعىتتاساق، ەلگە الدەقايدا پايدالى بولماق.