سوڭعى 3 جىلدا ءمۇعالىمنىڭ جالاقىسى 2 ەسەدەن اسا وسكەن
شىعىس قازاقستان وبلىسىنىڭ حالقىمەن كەزدەسكەن وقۋ-اعارتۋ ءمينيسترى اسحات ايماعامبەتوۆ ءقازىر مۇعالىمدەردىڭ جالاقىعا قاتىستى ماسەلە كوتەرمەيتىندىگىن ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
وقۋ-اعارتۋ ءمينيسترى اسحات ايماعامبەتوۆ شىعىس قازاقستان وبلىسىنا جۇمىس ساپارىمەن كەلىپ، جەرگىلىكتى حالىقپەن كەزدەستى. سونداي-اق ساپار بارىسىندا ول وسكەمەن قالاسىنداعى «جايلى مەكتەپ» جوباسى اياسىندا سالىنىپ جاتقان مەكتەپتەر قۇرىلىسىنا دايىندىق جۇمىستارىمەن تانىسىپ، «راحات» بالاباقشاسىندا بولدى.
«2019 جىلى «پەداگوگ مارتەبەسى تۋرالى» زاڭ قابىلداندى. بۇل زاڭ كوپ نارسەنى وزگەرتتى. مەكتەپ، كوللەدج مۇعالىمدەرىنىڭ، بالاباقشا تاربيەشىلەرىنىڭ جانە قوسىمشا ءبىلىم بەرۋ سالاسى قىزمەتكەرلەرىنىڭ جالاقىسىن كوتەرۋ سياقتى بىرنەشە باعىتتا جۇمىس جۇرگىزىلدى. ۇلتتىق ستاتيستيكا بيۋروسىنىڭ مالىمەتى بويىنشا سوڭعى 3 جىلدا ءمۇعالىمنىڭ جالاقىسى 2 ەسەدەن اسا وسكەن. كەلەسى جىلى قاڭتاردا ءبىلىم بەرۋ قىزمەتكەرلەرى مەن پەداگوگتاردىڭ ەڭبەكاقىسى قوسىمشا تاعى 25 پايىزعا ارتادى»، - دەدى اسحات ايماعامبەتوۆ وبلىس حالقىمەن كەزدەسۋىندە.
مينيستر قازىرگى ۋاقىتتا اتقارىلىپ جاتقان جۇمىستارعا قىسقاشا توقتالىپ، كوپتى تولعاندىرعان ساۋالدارعا دا جاۋاپ بەردى.
«بۇگىندە مۇعالىمدەر جالاقىعا قاتىستى ماسەلەنى ەش كوتەرمەيدى دەۋگە بولادى. ولار تاراپىنان نەگىزىنەن نورماتيۆتىك قۇقىقتىق اكتىلەر، باعالاۋ جۇيەسى جانە ساپانى قامتاماسىز ەتۋ تۋرالى ايتىلىپ جاتادى. ارىپتەستەرىم مەن اتا-انالاردىڭ قويعان سۇراقتارىنىڭ قاتتى وزگەرگەندىگى مەنى قۋانتادى»، - دەدى وقۋ-اعارتۋ ءمينيسترى.