بۇگىن «اۋىل» حالىقتىق-دەموكراتيالىق پاتريوتتىق پارتياسى ءتوراعاسىنىڭ ورىنباسارى، قازاقستان رەسپۋبليكاسىنىڭ پرەزيدەنتتىگىنە كانديدات جيگۋلي دايرابايەۆتىڭ سەنىمدى وكىلى نيكولاي ارسيۋتين سولتۇستىك قازاقستان وبلىسىنىڭ قىزىلجار اۋدانى چاپايەۆو ەلدىمەكەنىندە ورنالاسقان «قىزىلجار ءسۇت» ج ش س كاسىپورنىنا بارىپ، ەڭبەك ۇجىمىمەن كەزدەستى. كەزدەسۋ بارىسىندا كانديداتتىڭ ساۋالدى باعدارلاماسىنىڭ نەگىزگى باعىتتارى باياندالىپ، پارتيانىڭ جۇمىسى تۋرالى ەگجەي-تەگجەيلى ايتىلدى، دەپ حابارلايدى Almaty-akshamy.kz.
جيگۋلي دايرابايەۆ ءوزىنىڭ باعدارلاماسىندا قازاقستان شيكىزاتى باي مەملەكەت بولا تۇرا، ءوز حالقىن قولجەتىمدى وتىنمەن جانە ەنەرگەتيكالىق رەسۋرستارمەن قامتاماسىز ەتە الماي وتىرعاندىعىن اتاپ ءوتتى. وسى رەتتە كوپشىلىكپەن كەزدەسكەن نيكولاي ارسيۋتين باعدارلامادا اۋىل شارۋاشىلىعى سالاسىن دامىتۋعا ەرەكشە دەن قويىلعاندىعىنا توقتالدى.
«اۋىل» پارتياسى اۋىلدىق ەلدى مەكەندەردى جاڭعىرتۋ جونىندەگى ۇزاق مەرزىمدى ۇلتتىق ستراتەگيانى زاڭ دەڭگەيىندە قابىلداۋدى ۇسىنىپ وتىر. اسىرەسە، اۋىل شارۋاشىلىعى ەڭبەككەرلەرىنىڭ مارتەبەسىن ارتتىرۋ وتە ماڭىزدى. قالا تۇرعىندارىن كوممەرسيالىق ۇستەمە باعاسىز ازىق-تۇلىك تاۋارلارىمەن قامتاماسىز ەتۋ ءۇشىن مەگاپوليستەردە، مونوقالالاردا، وبلىس جانە اۋدان ورتالىقتارىندا تۇتىنۋ قوعامدارى مەن كووپەراتيۆتەر جەلىسىن قۇرۋ جانە دامىتۋ جوسپارلانعان»، – دەدى نيكولاي ارسيۋتين.
ءوز كەزەگىندە كاسىپورىن قىزمەتكەرلەرى كانديداتتىڭ باستامالارىن تىڭداپ، اتالمىش جوبالار جۇزەگە اسسا سالاداعى قوردالانعان ماسەلەلەر شەشىم تابارىنا سەنىم ءبىلدىردى.
ءوندىرىس وشاعىنان كەيىن پارتيا وكىلدەرى پەتروپاۆل قالاسىنداعى ءسابيت مۇقانوۆ اتىنداعى كىتاپحانادا سايلاۋشىلارمەن كەزدەسۋ وتكىزدى. جيىندا كانديداتتىڭ الداعى ۋاقىتقا جوسپارلارى، «اۋىل» پارتياسىنىڭ جوبالارى توڭىرەگىندە اڭگىمە قوزعالىپ، جۇرتشىلىقتىڭ سۇراقتارىنا جاۋاپ بەرىلدى.