TikTok مەسسەندجەرىندە قازاقستانعا كەلە جاتقان تروپيكالىق داۋىل تۋرالى ۆيدەو تاراپ ءجۇر.
وندا 2024 جىلعى 9-10 اقپاندا كۇشى ساعاتىنا 100 كم-گە دەيىن جەتەتىن جەل سوعادى دەلىنگەن. «قازگيدرومەت» رمك بۇل اقپاراتقا قاتىستى تۇسىنىكتەمە بەردى، دەپ حابارلايدى Almaty-akshamy.kz Stopfake.kz-كە سىلتەمە جاساپ.
«قازگيدرومەت» رمك حابارلاۋىنشا، ۆيدەودا ءبىرقاتار دالسىزدىكتەر بار.
«روليكتە ايتىلىپ وتىرعان سيكلون قازاقستان اۋماعىندا پايدا بولمايدى، ول قازاقستانعا سكانديناۆيا اۋداندارىنان اۋىسىپ كەلەدى جانە 7 اقپاندا ەل اۋماعىنىڭ باسىم بولىگىن قامتيتىن بولادى. جەلدىڭ كۇشىنە كەلەتىن بولساق، ۆيدەودا ايتىلعان 100 كم/ساع-تى م/س اينالدىرعاندا 27-28 م/س شىعادى. سونداي-اق «قازگيدرومەت» رمك مالىمەتىنشە، 6 اقپاندا داۋىلدى ەسكەرتۋ تاراتىلدى. وعان سايكەس، 2024 جىلعى 06 اقپان ساعات 21:00-دەن 09 اقپان ساعات 21:00 دەيىن № 10 ستيحيالىق مەتەرەولوگيالىق قۇبىلىس ورىن الادى، ياعني جەلدىڭ كۇشى 30 م/س دەيىن كۇشەيەدى. وڭىرلەر: اقمولا وبلىسى، اقتوبە وبلىسى، جامبىل وبلىسى، قوستاناي وبلىسى، پاۆلودار وبلىسى، سولتۇستىك قازاقستان وبلىسى، تۇركىستان وبلىسى. داۋىلدى ەسكەرتۋگە سايكەس، 7-9 اقپاندا كۇندىز قازاقستاننىڭ باسىم بولىگىندە جىلدامدىعى 23-28 م/س جەل سوعادى، كەي جەرلەردە ەكپىنى 30 م/س جەتەدى دەپ بولجانۋدا، ودان ءارى سيكلون قازاقستاننان تىس جەرلەرگە اۋىسادى»، – دەلىنگەن باسپا ءسوز قىزمەتىنىڭ حابارلاماسىندا.
«قازگيدرومەت» رمك قازاقستان تۇرعىندارى مەن قوناقتارىن رەسمي اقپاراتقا عانا سەنۋگە شاقىرادى. ءتيىستى اقپارات توتەنشە جاعدايلار دەپارتامەنتىنىڭ 112 ءبىرىڭعاي كەزەكشى-ديسپەچەرلىك قىزمەتىنەن تارالادى، داۋىلدى ەسكەرتۋلەر سايتىندا جانە DARMEN ءموبيلدى قوسىمشاسىندا جاريالانادى.