پرەمەر-مينيستردىڭ ورىنباسارى ۇكىمەتتىڭ كەڭەيتىلگەن وتىرىسىنان كەيىنگى بريفينگتە مىندەتتى الەۋمەتتىك مەديسينالىق ساقتاندىرۋ جۇيەسىنە قاتىستى ساۋالعا جاۋاپ بەردى، دەپ حابارلايدى اlmaty-akshamy.kz.
«مەديسينالىق ساقتاندىرۋ جۇيەسى الەمدەگى كليەنت ءۇشىن اقشا ۇستانىمىنىڭ جۇزەگە اسىرىلۋىن قامتاماسىز ەتەتىن جالعىز جۇيە سانالادى. ەگەر دۇرىس جولعا قويسا، وندا ءاربىر ەمحانا مەن اۋرۋحانا ادامداردىڭ وزدەرىنە كەلىپ، ساپالى كومەك الۋىنا مۇددەلى بولار ەدى. ءيا، بىزدە پروبلەما بار. ادامدار ساپالى كومەك الۋى ءۇشىن بۇل جۇيەنى وزگەرتۋىمىز قاجەت»، - دەدى ۇكىمەت باسشىسىنىڭ ورىنباسارى.
ايتا كەتەيىك، بۇگىن ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ءمامس جۇيەسىن سىنعا العان بولاتىن.
پرەزيدەنتىڭ ايتۋىنشا، مىندەتتى الەۋمەتتىك مەديسينالىق ساقتاندىرۋ جۇيەسىنىڭ ىسكە قوسىلعانىنا 5 جىل بولدى. سودان بەرى بۇل سالانىڭ بيۋدجەتى ەكى ەسە ارتتى. بيىل 2،6 تريلليون تەڭگە بولىنەدى.
«الايدا، مەديسينالىق كومەكتىڭ ساپاسى ايتارلىقتاي جاقساردى دەپ ايتۋعا بولمايدى. كوپتەگەن قىزمەت ءالى دە قولجەتىمدى ەمەس. بۇدان بولەك، كوپ جاعدايدا رەسۋرستار ءتيىمسىز جۇمسالادى. سونىڭ سالدارىنان بۇل سالاعا قوسىمشا قارجى ءبولىپ، بيۋدجەتكە سالماق سالۋعا تۋرا كەلەدى. ۇكىمەت مەديسينالىق ساقتاندىرۋ جۇيەسىنىڭ قىزمەتىن قاتاڭ باقىلاۋعا الۋى كەرەك. بۇل جۇيە قاراپايىم ءارى تۇسىنىكتى بولۋعا ءتيىس»، - دەدى قاسىم-جومارت توقايەۆ.