ۇشقىشتاردىڭ قاۋىپسىزدىك پەن ەڭبەك جاعدايىنا شاعىمدانعانىن بۇدان بۇرىن جازعانبىز.
توتەنشە جاعدايلار مينيسترلىگىنىڭ رەسمي وكىلى رۋسلان يمانقۇلوۆ "قازاۆياقۇتقارۋ" اق پيلوتتارىنىڭ جۇمىستان كەتىپ جاتقانىن راستادى، دەپ حابارلايدى Almaty-akshamy.kz
"جۇمىسشىلاردىڭ بىرەۋى سىناق مەرزىمىنەن ءوتىپ جۇرگەن. قالعاندارى بەرگەن وتىنىشتەرىنە قاراي شەشىلەدى. ەشكىمدى ءماجبۇرلى تۇردە جۇمىستان شىعارمايدى. ءبىراق وزدەرى جۇمىستان شىعۋعا نيەت ءبىلدىرىپ تۇرسا، ولاردى ۇستاۋعا دا ەشكىمنىڭ قۇقىعى جوق"، - دەدى يمانقۇلوۆ Sputnik قازاقستان تىلشىسىنە بەرگەن سۇحباتىندا.
ونىڭ ايتۋىنشا، ۇيىم قىزمەتكەلەرىنىڭ جالاقىسىن كوتەرمەيدى. سەبەبى قازىرگى مولشەرى ورتاشا كورسەتكىشتەن جوعارى.
"جالاقىنى كوتەرۋ ماسەلەسى قارالىپ جاتقان جوق. ونىڭ مولشەرى ورتاشا دەڭگەيدەن جوعارى، 640 مىڭ تەڭگە مەن 2،5 ميلليون تەڭگەنىڭ ماڭايىندا بولىپ تۇر"، - دەپ اتاپ كورسەتتى مينيسترلىكتىڭ رەسمي وكىلى.
ايتا كەتەرى، ءساۋىردىڭ باسىندا "قازاۆياقۇتقارۋ" اق پيلوتتارى وسى سالاداعى قاۋىپسىزدىك پەن ەڭبەك جاعدايىنا شاعىمداندى. سول كەزدە 23 پيلوت جۇمىستان كەتۋگە ارىز جازدى. توتەنشە جاعدايلار ءمينيسترى يۋريي يلين بارلىق ارىزدار بويىنشا قىزمەتتىك تەكسەرىس جۇرگىزىلەتىنىن ايتتى.
سونداي-اق جۇمىستان كەتەتىن ءاربىر پيلوتتىڭ وقۋىنا جۇمسالعان بيۋدجەت قارجىسىن قايتارۋ مىندەتى بار ەكەنىن ەسكە سالدى.