"توبىلعى جارعان" امالى كەلدى. 2-3 كۇنگە سوزىلعان سۋىق جەل سوعادى. وسى كەزدە ءتۇز اعاشى – توبىلعى بۇرشىك جارىپ، وسىمدىكتەر تامىر جايادى. ارى قاراي شۋاقتى كوكتەمنىڭ شىرايى كىرە باستايدى
ءساۋىر ايىنىڭ سوڭعى كۇندەرى سۋىق جەل سوعىپ، ول 2-3 كۇنگە سوزىلادى. وسى كەزدە توبىلعى اعاشى بۇرشىك جارىپ، وسىمدىكتەر تامىر جايادى. جەرگە كوك شىعادى. بۇرىنعى كونەكوز قاريالار تابيعاتتىڭ بۇل قۇبىلىسىن «توبىلعى جارعان» دەپ اتاعان...
«ءساۋىر ايى – جاۋىن ايى» دەپ بەكەر ايتپاسا كەرەك، ايدىڭ جاۋىن-شاشىنى مول بولىپ تۇر. وتكەن پايىمىمىزدا: «...ءساۋىر ايىنىڭ 25-ىنەن «ءساۋىر» دەگەن امال باستالادى. نايزاعاي ويناپ، جاڭبىر جاۋىپ، قاتتى جەل تۇرادى...» دەگەن بولاتىنبىز. سونداي-اق، بۇل امالدىڭ جاقسىلىعىنا باقسا، التى كۇنگە، جاقسىلىعىنا باقپاسا، الپىس كۇنگە سوزىلاتىن ءقاۋىپتى ەكەنىن، «قىرىق ساۋىرىك، ءبىر مىرزا» دەپ اتالعان قايعىلى اڭىز وسى امالدىڭ ىشىندە ەكەنىن ەسكەرتكەنبىز. بولجامىمىز اينا-قاتەسىز كەلدى. ۇزدىكسىز جاۋىن-شاشىن بولىپ، الاتاۋ بوكتەرلەرىندە جاڭبىردىڭ سوڭى قارعا ۇلاستى.
الماتىدا 25 ساۋىردە نوسەر جاۋىننىڭ سالدارىنان 50-دەن استام ۋچاسكە سۋ استىندا قالدى. جەرگىلىكتى جەرلەردە كوممۋنالدىق قىزمەتتەر مەن مەردىگەرلىك ۇيىمدار جەدەل جۇمىس ىستەۋگە ءماجبۇر بولدى. وسى ورايدا، قالا كاسىپورىندارى مەن مەكەمە جەتەكشىلەرىنىڭ قالانىڭ باس باسىلىمى – «Almaty aqshamy» گازەتىن وقىپ وتىرعانى ابزال دەر ەدىك.
جوعارىدا ايتقانىمىزداي، ءساۋىر ايىنىڭ سوڭعى كۇندەرى سۋىق جەل سوعىپ، ول 2-3 كۇنگە سوزىلادى. بۇل «توبىلعىنىڭ بۇرشىك جارۋى». كەڭشىلىك اقىن (مىرزابەكوۆ) ءوزىنىڭ «توبىلعى سايعا بارعاندا» دەگەن ولەڭىندە:
«ءدۇر ەتىپ لەزدە، ءبۇر جارعان كەزدە دۇزگەن، تال،
توبىلعى سايعا تورىڭدى سايلاپ قىزبەن بار.
قولاڭ شاعىر مەن قولامتا كۇلگىن كوكپەكتىڭ
اراسىندا ارشىن تۇياقتار تيگەن ىزدەر بار.
تۇياقتار تەۋىپ تاستاعان تاسپا توپىراق
قياقتار كومىپ، قاڭقاسى كەۋىپ جاتىپ اپ،
شاڭقاي تۇستە شەكەسى شىپ-شىپ قىزعاندا
قالقالايدى كەپ قىزعانشاق تۇيەجاپىراق...»، – دەپ جىرلاپتى. «توبىلعى جارعان» امالىنىڭ بار بولمىسى وسى 8 شۋماققا سىيىپ تۇر.
اسپان دەنەلەرىندە ۇزدىكسىز قوزعالىس ورىن الۋدا. بۇل وسى اي بىتكەنشە جاۋىن-شاشىننىڭ بولا بەرەتىنىن اڭعارتسا كەرەك. وتكەندە تۋعان جاڭا ايدى كورگەنىمىز بار. باسى عانا قىلتيىپ، شالقالاپ جاتىر ەكەن. ءساۋىردىڭ قۇبىلمالى، شارۋاعا قولايسىز بولاتىنىن ول دا اڭعارتىپ جاتقانداي.
ءقازىر الماتىدا جەمىس اعاشتارىنىڭ ءبارى گۇلدەپ، تۇينەك سالا باستادى.
«بوزقاراعان كوردىڭ بە، بوزقاراعان،
بوزقاراعان بۇتاعىن قوزعاما، ادام!
بوزقاراعان ىشىنەن بوزبالالار
بويجەتكەنگە بوزارىپ كوز قاداعان...»، – دەپ قايران مۇقاعالي جىرلاعان بوزقاراعان گۇلدەپ، الماتىنىڭ ءسانىن كىرگىزىپ تۇر.
كۇن رايى بۇزىلا قالعان جاعدايدا ولاردىڭ قاۋىپسىزدىگىن ويلاستىرۋ كەرەك. كەيبىر باعباندار ب ا ق ىشىندە تۇتىندىك سالعان. ءتۇتىننىڭ جىلۋىمەن جەمىس اعاشتارىن ساقتاپ قالعان.