بۇگىن ءتۇن ورتاسىندا جەتى قاراقشى جۇلدىزىنىڭ ءشومىش سابى جوعارى قاراپ، وڭتۇستىك جاقتى كورسەتەدى. بۇل كۇن مەن ءتۇن تەڭەلگەنىن، كوكتەمنىڭ كىرگەنىن، توپىراق جۇلدىزىنىڭ باعى جانعانىن بىلدىرەدى
ناۋرىزدىڭ 15ء-ى كۇنى تۇندە اسپاندا «ءاۋىس-تۇيىس» ورىن الدى. ءىرى-ىرى «قىس» جۇلدىزىنىڭ ورنىن جىپىرلاعان «جاز» جۇلدىزى باستى... ۇكىمەتتە دە، پارلامەنتتە دە ناق وسى كۇنى وزگەرىس ورىن الدى. ءبارى جاڭارىپ جاتىر: جەر دە، ەل دە. جاڭا قازاقستانىمىز بەن جاڭا قوعامىمىزدىڭ جاڭا دا جارقىن قادامى نىق سەنىممەن باستالدى.
ناۋرىز - كوكتەمنىڭ عانا ەمەس، جىلدىڭ دا باسى. جاڭا جىل. تابيعات امالدارى ناۋرىز ايىنان باستالادى. كوكتەم كەلىسىمەن، تابيعاتتا جاۋىندى كۇندەر كوبەيەدى. وسى ايدىڭ 15-ىنەن باستاپ اسپان جۇلدىزدارى اراسىندا «ءاۋىس-تۇيىس» ورىن الدى. مۇنىڭ ءمانىسى: «قىسقى» باداناداي-باداناداي iرi جۇلدىزداردىڭ ورىنىن «جازعى» جىپىرلاعان ۇساق جۇلدىزدار باسادى. قازان ايىنىڭ 15-iنە دەيiن جۇلدىزدار ۇساقتاۋ كورiنەدi. ال قازاننىڭ 15-iنەن باستاپ كوك جۇزىندە قايتادان ۇلكەن جۇلدىزدار قاپتايدى.
ءقاۋىپتى امال «ابدىكەي» بۇگىن بىتەدى. باسقاشا اتالۋى – سيىردىڭ «ورازا ۇستاۋى». بۇلاي اتالۋ سەبەبى: مۇز استىنداعى سۋدان قانىپ ىشە الماعان سيىرلار ەرىگەن قار سۋىنا قانىپ، قاردان شىققان كولدەنەڭ شوپكە تويىپ، ارقاسىن كۇنگە توسىپ، بىرنەشە ساعات جايىلماي تۇراتىن بولعان. وسى كورىنىستى سيىردىڭ «ورازا ۇستاۋى» دەپ اتاعان. كونەكوز قاريالار سيىردىڭ «ورازا ۇستاۋ» ۋاقىتىنا قاراپ، قىس اياعىن بولجايتىن بولعان: قالىڭ قاردىڭ شەتى سوگىلىپ، ەرىپ، سۋ اعادى. قاردان اققان سۋعا تورعاي شومىلاتىنداي بولسا، جاز ەرتە شىعادى دەپ، قاردان اققان سۋ ماردىمسىز بولسا، جاز ءجاي شىعادى دەپ ەسەپتەيدى.
«قاردىڭ باسىن قار الار...» دەگەن ماقالى بار «قۇسقاناتى» امالى ناۋرىزدىڭ 26–28-ىنە ءدوپ كەلەدى. ول كۇندەرى جاپالاقتاپ قار جاۋىپ، ىلە ەرىپ، نە جاڭبىر سىركىرەيتىن بولعان. جەركوكتىڭ ءبارىن سۋ باسقان الاساپىران شاق وسى كەز. الماتىدا اپتاعا سوزىلعان ناۋرىز مەرەكەسى كەرەمەت بولىپ ەرەكشە جاعدايدا ءوتتى. تاجىندەتتىڭ كەسىرىنەن تويلانباي قالعان جىلداردىڭ ەسەسى قايتقانداي بولدى. مەرەكەنىڭ العاشقى كۇندەرى اسپاندى قارا بۇلت بۇركەگەنىمەن قار جاۋمادى، كۇن ايتارلىقتاي سالقىنداعان دا جوق. ءبىراق ناۋرىز مەيرامىنىڭ سوڭعى كۇنى (23.03.22.) مايدالاپ جاۋعان قار الماتىعا اق قاردان شاپان جاپتى. سينوپتيكتەر ءبىر ايدىڭ قارى ءبىر كۇندە جاۋدى دەپ دابىل قاقتى. 2015 جىلى ناۋرىزدىڭ 29-30 ارالىعىندا الماتىدا قالىڭ قار جاۋعان بولاتىن. اۋا رايىن زەرتتەيتىن ورتالىقتىڭ ماماندارى مۇنى الماتىدا سوڭعى 3 جىلدا جاۋعان ەڭ قالىڭ قار دەپ اتاعان ەدى. قالىڭدىعى 35 سانتيمەترگە جەتكەن. بۇل - ءبىر جىلدا جاۋاتىن قاردىڭ ۇشتەن ءبىر بولىگى ەكەن. ەسەسىنە، 2016 جىلعى جاز ايلارى وتە ىستىق بولعانىن الماتىلىقتار ءالى ۇمىتپاعان بولار.
ناۋرىز ايى دا اياقتالۋعا تاياپ قالدى. بۇگىن قولدانىستاعى كۇنتىزبە بويىنشا، ناۋرىزدىڭ 25ء-ى. ال اي ەسەبى بويىنشا، 22ء-سى. قازاقى قيسىنعا سۇيەنسەك، ايدىڭ 8ء-شى كۇنى. اپتا ايدىڭ باسىن دا، ورتاسىن دا، سوڭىن دا قامتىپ تۇر. بۇلاردىڭ اۋا رايىنا اسەرى بولماي قالمايدى. كۇندىز كۇننىڭ كوزى جارقىرىپ تۇرعانىمەن، تۇنگە قاراي سۋىتۋى مۇمكىن. سونىڭ سالدارىنان كۇندىز ەرىگەن قار تۇنگى جانە تاڭعى ايازبەن قاتىپ، مۇزعا اينالىپ، كوكتايعاق ورىن الۋى عاجاپ ەمەس... ويتكەنى، بۇل «قۇسقاناتى» امالى عوي. قۇستار كەلىپ جاتىر مەكەنىنە. قۇستاردىڭ قاناتىمەن جەل كەلەدى، سامال ەسەدى، ولارعا جاڭبىر مەن قار ىلەسەدى...