ول – ءبىر ەمەس، بەس ەمەس، ون ءتورت رەت انا اتانعان ايەل. بار عۇمىرىن ۇرپاعىنا ارناعان اسىل جار، اياۋلى انا. جەتىسۋ وبلىسى، كەربۇلاق اۋدانى، سارىوزەك كەنتىندە گۇلناز شاكەنوۆا ەسىمدى انا ون ءتورت پەرزەنتتى دۇنيەگە اكەلىپ، سولاردىڭ ءارقايسىنا مەيىرىمىن، ۋاقىتىن، ءومىرىن ارناپ كەلەدى. قىزىعى وتباسىندا ەگىز، ۇشەمدەر جوق. كوپ بالالى انا Aqshamnews.kz تىلشىسىنە انالار كۇنىنە وراي ون ءتورت بالانىڭ اناسى بولۋدىڭ قانداي سەزىم ەكەنىن اڭگىمەلەپ بەردى.
گۇلناز شاكەنوۆا - جەتىسۋ وبلىسى، كەربۇلاق اۋدانى، سارىوزەك كەنتىندە 1979 جىلى دۇنيەگە كەلگەن. كوپ بالالى انا ءوزى دە 10 بالا تاربيەلەنگەن ۇلكەن اۋلەتتەن شىققان. ءقازىر 10 قىز، 4 ۇلدىڭ اناسى، 9 نەمەرەنىڭ اپاسىنا اينالعان اياۋلى جار.
كوپ بالالى انانىڭ ءبىر كۇنى قالاي وتەدى؟
گۇلناز شاكەنوۆا دۇكەندە ساتۋشى بولىپ جۇمىس ىستەيدى. بالا تاربيەسىنە دە، جۇمىسىنا دا ۇلگەرىپ جۇرگەن ول كوپ بالالى وتباسى بولۋدىڭ قيىن دا قىزىق تۇستارى جايلى جانە ءوزىنىڭ ءبىر كۇنى قالاي وتەتىنىن اڭگىمەلەپ بەردى.
«مەن 1995 جىلى العاش انا اتانىپ، تۇڭعىش ۇلىمدى دۇنيەگە اكەلدىم. بالالارىمنىڭ اراسى 2-3 جىلدان بولىپ، 2008 جىلى جەتىنشى بالامدى بوساندىم. سول جىلى التىن القا الىپ، رەسمي تۇردە كوپ بالالى انا بولدىق. ال ون ءتورتىنشى بالامدى 2021 جىلى ومىرگە اكەلدىم. ۇلكەن ۇلىم مەن ءۇش قىزىم وتباسىن قۇرىپ، ءۇبىرلى-شۇبىرلى بولىپ وتىر» دەيدى ول.
گۇلناز حانىمنىڭ ايتۋىنشا، ءار ۋاقىتتى ءتيىمدى جۇمساساڭ بارىنە ۇلگەرۋگە بولادى.
«مەنىڭ كۇنىم تاڭەرتەڭنەن كۇيەۋىمنىڭ، بالالارىمنىڭ تاماعى دەپ ويانۋدان باستالادى. ولاردى ساباققا، بالاباقشاسىنا جىبەرىپ، باسقا دا ءۇي شارۋاسىنا ۇلگەرەمىن. ءتۇس بولسا تۇسكى تاماقتىڭ قامى دەيمىز. تۇستەن كەيىن كىشى بالالارىمدى ءبىر ۇيىقتاتىپ الامىن. بالالاردىڭ ءۇي تاپسىرمالارىنا دا ۋاقىت ءبولۋ كەرەك. سونان سوڭ كەشكى تاماققا كىرىسەمىز. سەنبى-جەكسەنبى بولسا ءۇيدىڭ كۇيبەلەڭ تىرلىگى كۇتىپ تۇرادى» دەيدى گۇلناز شاكەنوۆا.
«ءبارى قارسى بولعاندا كۇيەۋىم قولداۋ ءبىلدىردى»
گۇلناز شاكەنوۆا ءسابيلى بولۋ جولىندا ءتۇرلى قيىندىقتار بولعانىن ايتتى. جاقىندارى تاراپىنان ونى تۇسىنبەي، ءتۇرلى سوزدەر ايتقاندار دا تابىلعان.
«انا بولۋ – ۇلكەن باقىت قوي. دەسە دە بىزگە «ءوزىڭدى ويلا، وسى بالادان كەيىن توقتاڭدار» دەگەن سياقتى سوزدەر دە ايتىلدى. تۋعان-تۋىستار اراسىندا ءبىزدى تۇسىنبەگەندەر دە بولدى. الايدا ءبارى قارسى بولعاندا كۇيەۋىم قولداۋ ءبىلدىردى. «بالا دەگەن باقىت. اللانىڭ بەرگەن سىيى. ودان ەشقاشان باس تارتۋعا بولمايدى. بالانى باعاتىن ولار ەمەس، ءبىز عوي. ەش مۇڭايما، ءار بالا ءوز نەسىبەسىمەن كەلەدى» دەپ مەنى قولداپ وتىردى» دەيدى گۇلناز حانىم.
«ءار بالا – وزىنشە ءبىر تۇلعا»
كوپ بالالى وتباسىندا وتباسى شىعىندارى دا ءبىر توبە اڭگىمە. ءار بالا ءوز نەسىبەسىمەن بولادى دەسەك تە، ولاردىڭ كەلەشەگى جەكە ينۆەستيسيانى تالاپ ەتەدى. گۇلناز حانىم، وسى تۇستا بالا تاربيەسىندەگى ماتەريالدىق جانە مورالدىق كوڭىل بولۋگە قالاي ۇلگەرەتىنىن ايتىپ بەردى.
«ءار بالا وزىنشە ءبىر تۇلعا عوي. ءارقايسىنىڭ مىنەزى ءار ءتۇرلى. ولارعا جەكە-جەكە كوڭىل ءبولىپ، ءتىلىن تاۋىپ سۇراعانىن الىپ بەرىپ وتىرۋعا تىرىسامىز. اسىرەسە جاسىراتىنى جوق مەكتەپ جاسىنداعى بالالارىمىزعا كوبىرەك قارجىلاي كوڭىل ءبولۋ كەرەك بولادى. قاتارىنان قالماسىن دەپ قالاعانىن، سۇراعاندارىن الىپ بەرۋگە تىرىسامىز. بولماي جاتسا، دۇرىستاپ ءتۇسىندىرىپ وتىرامىز» دەيدى كوپ بالالى انا.
«مەملەكەتكە تۋعان بالاڭدى مىندەتسىنۋ – دۇرىس ەمەس»
- بالا تاربيەسىندە ۇستاناتىن باستى قاعيداڭىز قانداي؟
- بالالارىمدى ۇنەمى مەيىرىمدىلىككە، ىزەتتىلىككە، كىشىپەيىلدىككە باۋلىپ وتىرامىن. ارينە كوپ بالالى انا بولۋ وڭاي نارسە ەمەس. ءار بالاعا كوڭىل ءبولىپ، دۇرىس تاربيە بەرۋىمىز كەرەك. دەسە دە، كوپ ادامعا بەرىلمەي جاتقان انا بولۋ دەگەن ۇلكەن باقىتتى تۇسىنە ءبىلىپ، ونى باعالاپ، ءار بالاعا جەتكىلىكتى تاربيە بەرۋ العاشقى مىندەتىمىز»
گۇلناز شاكەنوۆا مەملەكەتتىڭ كوپ بالالى انالارعا جاساپ وتىرعان جاعدايىنا ريزا ەكەنىن ايتتى. ونىڭ سوزىنشە، ءار انا بالانى ەل ءۇشىن ەمەس، اۋەلى ءوزى ءۇشىن ومىرگە اكەلەدى.
«مەملەكەت تاراپىنان كوپ بالالى انالارعا جاسالعان جاعدايعا كوڭىلىم تولادى. التىن القامدى دا، جاردەماقىمدى دا الىپ وتىرمىن. ءار انا دۇنيەگە بالا اكەلسە ءوزى ءۇشىن، وتباسى ءۇشىن اكەلەدى. مەملەكەت وعان ەشتەڭە بەرۋگە مىندەتتى ەمەس. سول سەبەپتى قيسىنسىز دۇنيەلەر سۇراپ، قازاقتىڭ سانىن كوبەيتىپ جاتىرمىز دەپ مىندەتسىنۋ - دۇرىس ەمەس سەكىلدى. ەڭ باستىسى سول دۇنيەگە اكەلگەن بالالارىڭا دۇرىس تاربيە بەرىپ، ءوسىرىپ، جەتىلدىرىپ، سولاردىڭ قىزىعىنا تويماي جۇرگەنىڭ - ناعىز باقىت» دەيدى گۇلناز شاكەنوۆا.
ەسكە سالايىق، ەلىمىزدە مامىر ايىنىڭ ەكىنشى جەكسەنبىسى انالار كۇنى اتالىپ وتەدى. بۇل اتاۋلى داتانى ۇكىمەت 2023 جىلى ماۋسىمدا مەرەكە كۇنتىزبەسىنە سايكەس قوسىمشادا بەكىتىپ، وعان قول قويدى.