شايبالى حوككەيدەن "بارىس" - "دينامو" ماسكەۋ ماچىندا ءاليحان اسەتوۆكە قاتتى ريزا بولدىم. قوناقتار ساپىنداعى سەرگەي بايكوۆ دەگەن قورعاۋشى تىم دورەكى وينادى. اۋەلى دميتريي گۋركوۆ دەگەن شابۋىلشىمىزدى "كۇش-ايلا" قولدانىپ، اۋرۋحاناعا جونەلتتى...
ماچ سوڭىندا 20-عا دا تولماعان، ورىمدەي جاس دىنمۇحامەد قايىرجاندى وقىس كەلىپ، سوعىپ... مۇرتتاي ۇشىردى. سول كەزدە وعان ءاليحان تۇرا ۇمتىلدى.
ءيا، ءاليحان! ەشكىممەن توبەلەسپەيتىن. مۇزايدىن جاقتاۋىندا، قارسى كوماندا ويىنشىسىنىڭ ءبىرى... ءوزىن اڭدىپ كەلىپ، ەكپىنمەن سوققاندا، قاپىدا جاراقات الىپ قالاتىن ءاليحان! توبەلەسكە جوق قوي ول! مۇلدە!
سول ءاليحان الگى بايكوۆتى قاپسىرا قۇشاقتاپ الىپ، توپەلەي جونەلدى. شىر اينالدىرىپ، ۇردى دا، ءبىراز...
گۋركوۆتى سوققاندا، جۇگىرمەپ ەدى، قايىرجان ءجابىر كورگەندە، كوزىن جۇمىپ الىپ، اتىلدى عوي. و، شىركىن! وسى كوزسىز باتىرلىعىنا قالاي ىرزا بولمايسىڭ!؟
كەزىندە، قحل-داعى العاشقى ويىندارىن وتكىزە باستاعاندا، تالعات جايلاۋوۆ تا ءدال وسى ءاليحان ءۇشىن تۇرا ۇمتىلىپ، وعان تيىسكەن ءبىر حوككەيشىنىڭ جاعاسىنا جارماسىپ ەدى... بەۋ، شىركىن، شىنىمەن دە، دۇنيە كەزەك بولادى ەكەن-اۋ، ءا؟..
بۇگىن "دينامو" ماسكەۋ كلۋبى الگى بايكوۆتىڭ ماۋسىم سوڭىنا دەيىن قاتاردان شىعىپ قالعانىن رەسمي تۇردە جاريالادى. ونىڭ قاتارعا قوسىلۋىنا كەمى 12 اپتا كەرەك ەكەن. وتا جاساتۋ ءۇشىن ماسكەۋگە قايتارىپ الىپتى (ءاليحاننىڭ سوققىسى باتا تيمەسە دە، قاتا ءتيدى مە، ول جاعىن انىق بىلمەدىم)...
دەسەك تە، ەندى ءبارى ءبىلىپ ءجۇرسىن! كەز كەلگەن قازاقتىڭ قولى - قاتتى. تەك دامير رىسبايەۆتىڭ عانا سوققىسى قۋاتتى، جۇدىرىعى جۋان ەمەس، "مومىن" دەگەن ءاليحانننىڭ دا سوققىسى پارمەندى!