قارجىلىق مونيتورينگ اگەنتتىگىنىڭ الماتى وبلىسى بويىنشا دەپارتامەنتى «Eurotransit Nur Zholy» جشس-نە قاتىستى سوتقا دەيىنگى تەرگەپ-تەكسەرۋدى اياقتادى، دەپ حابارلايدى Almaty-akshamy.kz. قازاقپاراتقا سىلتەمە جاساپ.
اتالعان زاڭدى تۇلعا جۇڭگو حالىق رەسپۋبليكاسىنىڭ بەيتاراپ اۋماعىنان قازاقستان رەسپۋبليكاسىنا جۇك تاسىمالداۋشى جالعىز وپەراتور بولا تۇرا، اتالعان قىزمەتكە باعانى زاڭسىز وسىرگەن.
«اتاپ ايتقاندا، كومپانياعا تيەسىلى بوس جۇك ماشينالارى قحر-دىڭ بەيتاراپ جاعىنان تاۋار تيەپ، ج ش س قويماسىنا قايتا ورالىپ وتىرعان. بۇل قىزمەتى ءۇشىن باعانى، ياعني ءبىر رەيسكە (ۇزاقتىعى 3 كم) زاڭسىز جولمەن قىمباتتاتقان. مونوپوليستىك قىزمەتتەن تۇسكەن تابىس 4،2 ملرد تەڭگەنى قۇرادى»، - دەپ جازدى ۆەدومستۆودان.
تەرگەپ-تەكسەرۋ بارىسىندا ءوز كىناسىن مويىنداعان ج ش س باسشىلىعىنان مەملەكەت كىرىسىنە قۇنى 5،3 ملرد. تەڭگەدەن اسا ج ش س اكتيۆتەرىن (اۋماعىندا كولىك-لوگيستيكالىق ۇيىم ورنالاسقان 3،6 گا جەر تەلىمى) اۋدارۋ تۋرالى ءوتىنىشحات ءتۇستى.
اگەنتتىك ادال بيزنەسكە جاساندى كەدەرگىلەر مەن مونوپولياعا قارسى كۇرەس جۇمىستارى جالعاسا بەرەتىنىن مالىمدەدى.