الماتى قانىش ساتبايەۆتى ەسكە الدى.
ق ر ۇلتتىق كىتاپحاناسىندا كورنەكتى گەولوگ-عالىم، ۇلتتىق عىلىم اكادەمياسىنىڭ نەگىزىن قالاۋشى جانە تۇڭعىش پرەزيدەنتى اكادەميك قانىش ساتبايەۆتىڭ تۋعانىنا 125 جىل تولۋىنا وراي «الەم تانىعان قازاقتىڭ قانىشى» اتتى ەسكە الۋ كەشى ءوتتى، دەپ حابارلايدى Almaty-akshamy.kz
القالى جيىنعا قازاقستان رەسپۋبليكاسى پرەزيدەنتى جانىنداعى ۇلتتىق عىلىم اكادەمياسىنىڭ ءپانارالىق عىلىم ورتالىعىنىڭ ديرەكتورى قۋانتار داۋلەن ۇلى، قانىش ساتبايەۆتىڭ نەمەرەلەرى، گەولوگ الەكساندر ترەتياكوۆ پەن حيميا عىلىمدارىنىڭ دوكتورى، پروفەسسور ءاليما جارماعامبەتوۆا، قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى، گەولوگيا-مينەرالوگيا عىلىمدارىنىڭ دوكتورى سۇلتان وزدويەۆ جانە قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعىنىڭ تاربيە جانە الەۋمەتتىك-قۇقىقتار جۇمىستار باسقارماسىنىڭ وفيسەرى اعا لەيتەنانت ماقسات جاقسىلىقوۆ پەن الماتى گارنيزونىنا قاراستى ۇلتتىق ۇلاننىڭ جەكە قۇرامى، ستۋدەنتتەر مەن وقۋشىلار قاتىستى.
ءىس-شارانىڭ ماقساتى – قازاقتىڭ ماڭدايىنا بىتكەن ءبىرتۋار پەرزەنتى قانىش ساتبايەۆتىڭ عىلىمي مۇراسىن كەڭىنەن ناسيحاتتاۋ. عالىمنىڭ جان-جاقتى، تاباندى، ىزدەنىمپاز كاسيەتتەرىن جاستار اراسىندا دارىپتەۋ.
تاعلىمدى كەشكە جيىلعان قوناقتار ەڭ الدىمەن ۇلتتىق كىتاپحانا قورىنان ۇيىمداستىرىلعان «قانىش – قازاق قازىناسى» اتتى اكادەميالىق كىتاپ جانە مەرزىمدى باسىلىمدار كورمەسىن تاماشالادى. سونداي-اق، ق.ساتبايەۆ اتىنداعى مەموريالدىق مۋزەي ەكسپوناتتارىن، ارحيۆتىك فوتسۋرەتتەر ۇسىنىلعان كورمەنى مۇراجايدىڭ ءبولىم مەڭگەرۋشىسى باقىتجامال ايتمۇحامبەتوۆا جانە ساتپايەۆ ۋنيۆەرسيتەتى مۋزەيىنىڭ جادىگەرلەرىن ساتبايەۆتانۋشى، وسى ءبىلىم ورداسىنىڭ تاريح مۋزەيىنىڭ باس مامانى اسپانديار ادەن ۇلى تانىستىردى.
جيىننىڭ ەكىنشى ءبولىمى دوڭگەلەك ۇستەل باسىندا ءوربىدى. قوناقتار قانىش ساتبايەۆتىڭ ءومىرى مەن عىلىمي جەتىستىكتەرى تۋرالى وي-تولعامدارىمەن ءبولىستى. مۇقاعالي ماقاتايەۆ اتىنداعى №140 گيمنازيانىڭ وقۋشىلارى عالىمعا ارناعان ولەڭ جولدارىن وقىدى.
ۇلتتىق ۇلاننىڭ ساربازدارى، ستۋدەنتتەر مەن وقۋشىلار قازاقستان عىلىمىنا جان-تانىمەن قىزمەت ەتكەن تۇلعانىڭ ءومىرى مەن قىزمەت جولى جايلى ماعلۇمدى مالىمەت الىپ، وي كوكجيەگىن كەڭەيتتى.