ءىس-شارا UNECA-داعى جىل سايىنعى ديپلوماتيالىق بازار اياسىندا ءوتتى.
قازاقستاننىڭ تاۋەلسىزدىك كۇنى قارساڭىندا بۇۇ-نىڭ افريكا ەلدەرىنە ارنالعان ەكونوميكالىق جانە الەۋمەتتىك كوميسسياسىنىڭ (UNECA) الاڭىندا العاش رەت قازاقتىڭ كيىز ءۇيىنىڭ تۇساۋكەسەرى بولدى، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
ءىس-شارا UNECA-داعى جىل سايىنعى ديپلوماتيالىق بازار اياسىندا ءوتتى. تۇساۋكەسەرگە ادديس-ابەباداعى بۇۇ ورگاندارىنىڭ، افريكا وداعى كوميسسياسىنىڭ، ەفيوپيانىڭ مەملەكەتتىك ورگاندارىنىڭ قىزمەتكەرلەرى، ادديس-ابەبادا اككرەديتتەلگەن شەت مەملەكەتتەردىڭ ەلشىلەرى، سونداي-اق افريكاداعى قازاقستاننىڭ دوستار كلۋبىنىڭ مۇشەلەرى قاتىستى.
تۇساۋكەسەردە قازاق حالىق بيلەرىنەن «قاماجاي» جانە «قارا جورعا»، ابايدىڭ پوەزيالىق شىعارمالارىنان تۇراتىن مادەني باعدارلاما كورسەتىلدى.
ۇلتتىق ويۋ-ورنەكتەرمەن، قازاق مۋزىكالىق اسپاپتارىمەن، تۇرمىستىق زاتتارمەن جانە ۇلتتىق كوستيۋمدەرمەن بەزەندىرىلگەن قازاق كيىز ءۇيى ءىس-شاراعا قاتىسۋشىلاردىڭ ەرەكشە قىزىعۋشىلىعىن تۋدىردى. قوناقتارعا قازى، باۋىرساق، جەنت جانە باسقا دا قازاق ۇلتتىق تاعامدارى ۇسىنىلدى.
افريكا ەلدەرىن مادەنيەتىمىزبەن جانە يۋنەسكو-نىڭ ماتەريالدىق مادەني مۇرا تىزىمىنە ەنگەن كيىز ۇيمەن تانىستىرۋ بيىل اياقتالاتىن قازاقستان باستاماسىمەن بەلگىلەنگەن بۇۇ مادەنيەتتەر جاقىنداسۋىنىڭ حالىقارالىق ون جىلدىعى، سونداي-اق مادەنيەتارالىق ديالوگ پەن ىنتىماقتاستىقتى دامىتۋ كونتەكستىندە ماڭىزدى مانگە يە بولدى.
تۇساۋكەسەر ءىس-شارا قوناقتارىنىڭ كوڭىلىنەن شىعىپ، قازاقستان مادەنيەتىنە ۇلكەن قىزىعۋشىلىق تۋدىردى.