قانداس مارتەبەسىن الدى.
ۇستىمىزدەگى جىلى ەلگە ورالعان قازاقتاردىڭ سانى ارتتى. جىل باسىنان بەرى قازاقستانعا 18 مىڭعا جۋىق قانداس ەلدە ورالعان، دەپ حابارلايدى Almaty-akshamy.kz.
«2022 جىلعى 1 جەلتوقسانداعى جاعداي بويىنشا، 17 888 ەتنيكالىق قازاق تاريحي وتانىمەن تابىسىپ، قانداس مارتەبەسىن الدى. جالپى، 1991 جىلدان بەرى رەسپۋبليكاعا 1 ميلليون 105،7 مىڭ ەتنيكالىق قازاق ورالدى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
وسى جىلدىڭ باسىنان باستاپ قازاقستانعا ورالعان قانداستاردىڭ جارتىسىنان كوبى (63،5%) وزبەكستاننان، 9،9% – رەسەيدەن، 9،1% – تۇركىمەنستاننان، 8،6% – قحر-دان، 4،9% – موڭعوليادان، 4% – باسقا ەلدەردەن كەلگەن.
ەلگە ورالعان ەتنيكالىق قازاقتار نەگىزىنەن الماتى (27،1%)، ماڭعىستاۋ (17،7%)، تۇركىستان (8،3%) جانە جامبىل (6،1%) وبلىستارىنا، سونداي-اق الماتى (5،5%)، استانا (9،1%) جانە شىمكەنت (6،6%) قالالارىنا قونىستاندى.
بيىلعى جىلدىڭ 1 جەلتوقسانىنداعى جاعداي بويىنشا، ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 59،4%-دى، ەڭبەككە قابىلەتتى جاستان كىشىلەر 26،9%-دى جانە زەينەتكەرلەر 13،7%-دى قۇرايدى.
ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 20%-ى - جوعارى ءبىلىمدى، 39،4%-ى - ورتا كاسىبي ءبىلىمدى، 38،9%-ى - جالپى ورتا ءبىلىمدى جانە 1،7%-ىنىڭ ءبىلىمى جوق.