قازاقستان – كوپۇلتتى مەملەكەت. ءاربىر ۇلتقا ءوز ءدىني نانىم-سەنىمىن ۇستانىپ، ءوز تىلىندە سويلەپ، اتادان بالاعا ميراس بولىپ كەلە جاتقان ءسالت-داستۇرىن ساقتاۋعا جاعداي جاسالعان. ءبىراق قازاق توپىراعىندا تۋىپ، قازاقى ورتادا وسىپ-ونگەن وزگە ەتنوس وكىلدەرىنىڭ اراسىندا قازاقشا ماقالداپ سويلەپ، ولەڭدەردى جاتقا وقىپ، تەك قازاق تىلىندە سويلەپ جۇرگەندەر كوپ ەمەس. بۇگىن ءبىز قازاقشاسى تاپ-تازا مۋستافايەۆ انار مەحتي-وگلى تۋرالى ايتاتىن بولامىز.
الماتى قالاسى، الماتى جانە جەتىسۋ وبلىستارى بويىنشا قىلمىستىق-اتقارۋ جۇيەسى دەپارتامەنتىنە قاراستى №11 مەكەمەسىندە ابىرويلى قىزمەت ەتىپ جۇرگەن انار مەحتي-وگلى گرۋزيا جەرىندە، دمانينسكيي اۋدانىندا دۇنيەگە كەلگەن. اكەسى – ءازىربايجان، اناسى –قازاق، قىزىلوردا قالاسىنىڭ تۋماسى.
الماتى قالاسىنداعى قازاق ەڭبەك جانە الەۋمەتتىك قاتىناستار اكادەمياسىن زاڭتانۋ ماماندىعى بويىنشا جانە ماگيستراتۋراسىن بىتىرگەن. انار مەحتي-وگلى قازاق تىلىندە ءبىلىم العان. سوندىقتان ەركىن سويلەيدى. ءتىل تۇرعىسىندا وتكەن تالاي جارىسقا قاتىسىپ، توپ جارعان ازامات. العاشقى ەڭبەك جولىن ءوز قالاۋىمەن قىلمىستىق اتقارۋ جۇيەسىنەن، ياعني الماتى وبلىسى بويىنشا لا-155/18 كولونياسىندا رەجيم جانە كۇزەت ءبولىمىنىڭ باقىلاۋشىسى بولىپ باستاعان. 2015-2017 جىلدار ارالىعىندا لا-155/8 مەكەمەسىنىڭ تاربيە بولىمىندە تاربيەشى مامان بولىپ قىزمەت اتقاردى. ودان 2017-2020 جىلدارى لا-155/6 تۇزەۋ مەكەمەسىندە تاربيەشى جانە تەولوگ-مامان بولىپ ەڭبەك ەتتى. ال ءقازىر №11 مەكەمەسىندە، ياعني جاسوسپىرىمدەر كولونياسىندا رەجيم جانە كۇزەت ءبولىمىنىڭ، مەكەمە باستىعىنىڭ كەزەكشى كومەكشىسى دەگەن ابىرويلى لاۋازىمى بار.
ادىلەت مايورى انار مۋستافايەۆ بولىمىندەگى قىزمەتكەرلەردىڭ جۇيەلى، تىڭعىلىقتى، ناقتى جۇمىس اتقارۋىنا ەرەكشە كوڭىل بولەدى. سوندىقتان دا 13 جىلدىق تاجىربيەسى بار ازامات بۇكىل ۇجىم الدىندا الدىندا بەدەلدى. مەكەمەگە جاڭادان كەلگەن تىڭداۋشىلارعا دا تالىمگەر رەتىندە بىلگەنىمەن ءبولىسىپ، جول كورسەتىپ وتىرادى.
تەمىردەي تارتىپكە توسەلگەن ادىلەت مايورى ءمىنسىز ەڭبەگى ءۇشىن قازاقستان پوليسياسىنىڭ 30 جىلدىق مەرەكەسىندە قر-نىڭ «پوليسيا» توسبەلگىسىمەن ماراپاتتالعان.
ارىپتەستەرى انار مەحتي-وگلىنىڭ بويىنان ۇنەمى جىلى جۇرەك، نۇرلى اقىل، ىستىق قايرات كورەتىنىنىن ايتادى. ۇلگىلى وتاعاسى، مەيىرىمدى اكە. ءبىر قىز، ءبىر ۇل تاربيەلەپ وتىر. بالالارى دا قازاق تىلىندە ەركىن سويلەيدى. وتباسىندا قازاقى سالت-داستۇرگە دە ەرەكشە ءمان بەرىلەدى.
قاراپايىم باقىلاۋشىدان مەكەمە باستىعىنىڭ كەزەكشى كومەكشىسىنە دەيىنگى دارەجەگە كوتەرىلگەن ازاماتتىڭ الار اسۋى ءالى الدا دەپ بىلەمىز. الماتىنىڭ تىنىشتىعىنا، قاۋىپسىزدىگىنە ۇلەس قوسىپ جۇرگەن جىگىتتىڭ ءومىر جولى، ۇستانىمى جاستارعا ۇلگى بولارى ءسوزسىز.