الماتىدا بيبىگۇل تولەگەنوۆانىڭ 95 جىلدىق مەرەيتويىنا ارنالعان كونسەرت ءوتتى
الماتىنىڭ رەسپۋبليكا سارايىندا وپەرا جانە كينو ونەرىنىڭ ءتىرى اڭىزى، حالىق ءارتيسى ءارى ۇلاعاتتى ۇستاز بيبىگۇل تولەگەنوۆانىڭ 95 جىلدىق مەرەيتويىنا ارنالعان سالتاناتتى كونسەرت ءوتتى. ونەر ساحناسىندا 75 جىل عۇمىرىن ارناعان دارا تۇلعا – قازاقستاننىڭ رۋحاني مادەنيەتىنىڭ سيمۆولىنا اينالعان ونەر يەسى، دەپ حابارلايدى aqshamnews.kz
سالتاناتتى كەشتىڭ شىمىلدىعىن الەكساندر بەلياكوۆ جەتەكشىلىك ەتكەن ەسترادالىق-سيمفونيالىق وركەستر اشتى. ولار قازاقتىڭ ۇلى كومپوزيتورى ءشامشى قالداياقوۆتىڭ ماڭگىلىك شىعارمالارىنا نەگىزدەلگەن ۋۆەرتيۋرانى ورىنداپ، كەشتىڭ مەرەكەلىك رۋحىن ايشىقتادى. وسىدان كەيىن ساحنا تورىنە تانىمال ۆيولونچەليست باقىتجان وكتيابر شىعىپ، قازاقتىڭ حالىق ءانى «ياپۋرايدى» نازىك ۇنمەن اۋەلەتە ورىنداپ، تىڭدارمانداردىڭ جۇرەگىن تەبىرەنتتى.
كونسەرتتە قازاقستاننىڭ مۋزىكالىق ساحناسىنداعى تانىمال ونەرپازدار – «استانا وپەرا» جانە اباي اتىنداعى قازاق ۇلتتىق وپەرا جانە بالەت تەاترىنىڭ سوليستەرى، سونداي-اق حالىقارالىق بايقاۋلاردىڭ لاۋرەاتتارى ونەر كورسەتتى. دامير سادۋاقاسوۆ، دانا تالاسپەكوۆا، ءاليحان زەينۋللا، جانداربەك ەركىنبايەۆ، بالۋان بەركەنوۆ، زارينا التىنبايەۆا، ولەگ تاتاميروۆ، راسۋل جارماعامبەتوۆ جانە تاير ءتاجى سىندى تالانتتار موسارت، جورج بيزە، دجواككينو روسسيني جانە الەكساندر زاسەپيننىڭ وپەرالىق تۋىندىلارىنان ۇزىندىلەر ورىنداپ، كورەرمەندەردى ونەر الەمىنىڭ بيىگىنە سامعاتا ءتۇستى. ال «سالتانات» ءانسامبلىنىڭ ورىنداۋىنداعى «شاشۋ» ءبيى مەرەكەلىك كەشكە ەرەكشە كورىك بەردى.
كەش بارىسىندا لاتيف ءحاميديدىڭ اتاقتى «بۇلبۇل» رومانسى دا ورىندالدى. بۇل شىعارمانىڭ ارقاسىندا بيبىگۇل احمەت قىزى «قازاقتىڭ بۇلب ۇلى» اتاعىن يەلەنىپ، تەك قازاقستاندا عانا ەمەس، الەمنىڭ كوپتەگەن ەلدەرىندە تانىلعان ەدى. وسى جولى بۇلبۇل ءانىن قازاقستاننىڭ ەڭبەك سىڭىرگەن قايراتكەرى تولقىن زابيروۆا ورىنداپ، كورەرمەندەرگە ەرەكشە اسەر سىيلادى.
كونسەرتتىڭ شارىقتاۋ شەگى رەتىندە، مەرەكەنىڭ باستى كەيىپكەرى – بيبىگۇل احمەت قىزى ساحناعا شىعىپ، قاتىسۋشىلارمەن بىرگە ونەر كورسەتتى. ول دجۋزەپپە ۆەرديدىڭ «تراۆياتا» وپەراسىنان «زاستولنايا» ارياسىن جانە بارشاعا تانىس، جۇرەككە جىلى «كوكتەم ءانىن» شىرقادى.
ايتا كەتەيىك، مەرەيتوي قارساڭىندا، 16 جەلتوقسان كۇنى الماتى اكىمى ەربولات دوسايەۆ مەملەكەت باسشىسى قاسىم-جومارت توقايەۆتىڭ اتىنان بيبىگۇل تولەگەنوۆانى 95 جىلدىق مەرەيتويىمەن ارنايى قۇتتىقتاپ، ونىڭ ۇلت مادەنيەتىن دامىتۋداعى ولشەۋسىز ەڭبەگىن اتاپ وتكەن بولاتىن.
بۇل كەش قازاق ونەرىنىڭ بيىك شىڭىنداعى تۇلعانىڭ شىعارماشىلىعىنا دەگەن قۇرمەت پەن ريزاشىلىقتىڭ جارقىن كورىنىسى بولدى.