ۇستىمىزدەگى جىل الماتى تۇرعىندارى ءۇشىن ەرەكشە جەتىستىكتەرمەن جانە وڭ وزگەرىستەرمەن ەستە قالدى. قالانىڭ ينفراقۇرىلىمى جاقسارىپ، مەديسينالىق جانە الەۋمەتتىك سالالاردا جاڭا باستامالار جۇزەگە اسىرىلدى. الماتىنىڭ تىنىسى اشىلىپ، قالا تۇرعىندارى جايلى ءومىر سۇرۋگە مۇمكىندىك الدى. بۇل تۋرالى قالا تۇرعىندارى نە دەيدى؟
سەرىك قۋانىش، كاسىپكەر:
- بيىل كوكتوبە تەلەمۇناراسىنىڭ جارىقتاندىرىلۋى ەرەكشە اسەر قالدىردى. تۇنگى الماتىنىڭ كوركىنە كورىك قوسىپ قانا قويماي، قالانىڭ تۋريستىك تارتىمدىلىعىن ارتتىردى. مۇنارانىڭ جاڭا مەديافاسادى ءتۇرلى تۇستەرمەن كومكەرىلىپ، قالانىڭ سيمۆولىنا اينالدى دەسەم ارتىق ايتپايمىن. ءقازىر كوپشىلىك بۇل جەرگە ارنايى بارىپ، سۋرەتكە ءتۇسۋدى ادەتكە اينالدىردى. الەۋمەتتىك جەلىدە كوكتوبە فونىندا جاسالعان فوتولار كوپتەپ جاريالانىپ جاتىر. مۇنداي وزگەرىستەر قالامىزدىڭ كەلبەتىن جاڭارتىپ، الماتىنىڭ زاماناۋي مەگاپوليس ەكەنىن تاعى ءبىر دالەلدەدى.
بەكزات ساحيداۆلەتوۆا، پەداگوگ:
– بيىل الماتىدا جاڭا مەكتەپتەردىڭ قۇرىلىسى قولعا الىندى. بۇل مەكتەپتەر وقۋشى سانى كوپ اۋدانداردا سالىنىپ جاتىر. ناتيجەسىندە بالالاردىڭ جولعا كەتەتىن ۋاقىتى قىسقارىپ، ءبىلىم ساپاسىنا وڭ اسەرىن تيگىزەدى دەپ سەنەمىن. سونىمەن قاتار، جاڭا مەكتەپتەر زاماناۋي جابدىقتارمەن قامتىلىپ، پەداگوگيكالىق كادرلارعا قوسىمشا جۇمىس ورىندارى اشىلادى. مۇنىڭ بارلىعى ءبىلىم بەرۋ جۇيەسىنىڭ دامۋىنا سەرپىن بەرەدى.
2024 جىلى الماتىدا كوپتەگەن ماڭىزدى باستامالار جۇزەگە استى. قالاداعى وزگەرىستەر قالا تۇرعىندارىنىڭ ءومىرىن جەڭىلدەتىپ، مەگاپوليستىڭ زاماناۋي كەلبەتىن قالىپتاستىرۋدا. تۇرعىندار بۇل جەتىستىكتەردى جوعارى باعالاپ، الماتىنىڭ دامۋىنا وڭ كوزقاراس ءبىلدىردى.
اۋەلاي ءارىپ قىزى، تۇرعىن: جول قاتىناسى جاقساردى
بۇل جىل قالاعا قاتىنايتىن اۆتوبۋستاردىڭ كوبەيگەنىمەن ەستە قالدى. كەزىندە قالادان پاتەرگە قول جەتكىزۋ قيىن بولعاندىقتان، بالالارىم الماتىدان تىسقارى تۇرىپ جاتىر. ءبىر قىزىم ەسىك قالاسىندا، ەكى ۇلىم تالعاردا تۇرادى. ءبارىنىڭ دە جۇمىس ورنى - الماتىدا.
بۇرىندارى ولار ءجيى تاكسيگە وتىراتىن. 2-3 جىل بولدى، ولار "وڭاي" تولەمجۇيەسى قوسىلعان اۆتوبۋستارمەن جۇرەدى. قالاارالىق جول قاتىناسىن جۇيەلى تۇردە قولعا العانى ءۇشىن الماتى اكىمدىگىنە العىسىمىزدى ايتامىز. قانشاما ادام قارجىسىن ۇنەمدەۋدە. بۇل - ەلەۋلى كومەك.
ەسىك پەن تالعارعا "وڭاي" تولەممەن اۆتوبۋستار ەرتەرەك قاتىناعانىمەن، بۇل جۇيەمەن قوعامدىق كولىكتەر قاسكەلەڭگە كەشتەۋ قوسىلدى. انا-جۇرەك الاڭداعىش كەلەدى، كەنجە قىزىم قاسكەلەڭنىڭ ار جاعىندا تۇراتىن. ونىڭ دا جۇمىسى الماتىدا. قاتىناۋ قيىنعا سوققان. ءبىر جىلدان استى، بۇل جاققا دا "وڭايمەن" اۆتوبۋستار جۇرە باستاعان. 230-باعىتتىق اۆتوبۋس قاتىناي باستادى. ءبىراق، اۆتوبۋس سانى از بولدى. بيىل، جىل سوڭىنا تامان، قاسكەلەڭ ارقىلى جۇرەتىن 254، 257-باعىتتىق اۆتوبۋستار قوسىلىپ، جاعداي جاقساردى. قىزىم دا ءماز.
"جول مۇراتى - جەتۋ" دەگەندەي، الماتىلىق باسشىلىققا ايتار العىسىمىز مول.
"الماتى اگلومەراسياسى" باعدارلاماسى اياسىندا قوعامدىق كولىكتەردىڭ كوبەيۋى قۋانتادى. بۇل دا بولسا، بيىلعى جەتىستىك. بۇل جىل ءوزى قالارالىق قوعامدىق كولىكتەر قاتارىنىڭ قاۋىرت ارتۋىمەن ەستە قالىپ وتىر. ءلايىم، جول قاتىناسى جاقسارا بەرسىن.
جاڭىل اپەتوۆا، حالىقارالىق "جاناشىر" قوعامدىق قورىنىڭ پرەزيدەنتى: حالىقتىڭ قاۋىپسىزدىگى ماڭىزدى
– الماتى كوشەلەرىندە كولىكتەر ءجۇرىسىن باقىلايتىن كامەرالار كوبەيدى. حالىقتىڭ باس-اماندىعى ماڭىزدى. بۇل جۇرگىزۋشىلەردىڭ جول ەرەجەسىن ساقتاۋعا جاقسى نەگىز بولدى. كوشەلەر كەڭەيتىلدى. ادەمى، زاماناۋي عيمارتتار بوي كوتەرۋدە.
قالانىڭ بوس جەرلەرىنە كوپ جەمىس اعاشتارى وتىرعىزىلدى بيىل. ەندى سونىڭ ءارى قاراي ءوسىپ-ونۋى قاداعالانىپ وتىرسا. الماتىنىڭ بارلىق سەگىز اۋدانىندا دا جاستاردىڭ كوميۋنيتي ورتالىقتارى ىسكە قوسىلىپ، ۇل-قىزدارىمىزدىڭ بوس ۋاقىتىن ءتيىمدى پايدالانۋىنا جاعدايلار جاسالعانى قۋانتادى.قاتتى تۇرمىستىق قالدىقتار تاستاۋعا ارنالعان زاماناۋي كونتەينەرلەر قوندىرىلدى بيىل. بۇل دا قالانىڭ كەلبەتىن بۇزباي، اسەمدىگىن ساقتاۋعا ارنالعان قادام دەپ ويلايمىن.
ءبىزدىڭ اۋەزوۆ اۋدانىندا بيىل جاڭعىرتۋ-جاڭارتۋ، جوندەۋ جۇمىستارى كوپ جۇرگىزىلدى. اسىرەسە، "سايران" جاساندى كولىن زاماناۋي ۇلگىدە قايتا جاساپ جاتقانى قۋانتادى.
ءلاززات ءامىرجانوۆا، الاتاۋ اۋدانىنىڭ تۇرعىنى: الماتىمنىڭ بارلىق جەتىستىگىنە تىلەكشىمىن
– الماتى ىرگەسىندەگى وبلىستا تۋىپ ءوستىم. اسەم قالاعا بالا كۇنىمىزدە اتا-انامىزبەن قىدىرىپ كەلەتىنبىز. ال ءقازىر تۇراقتى تۇرىپ جاتقانىما وتىز بەس جىلدان استى. ادەمى جاستىق شاعىمىزدىڭ كۋاسى بولعان الماتى ءقازىر جىل ساناپ كوركەيۋدە.
بۇرىن ءبىز تۇرىپ جاتقان الاتاۋ اۋدانى مەگاپوليستىڭ شەت اۋدانى بولىپ سانالاتىن. ءبىر جىلدارى "شەتسىز قالا" دەگەن جوبا قابىلدانعانى ەسىمدە. سونىڭ ناتيجەسىندە ءبىزدىڭ اۋداننىڭ اۋماعى بۇرىنعىدان دا ۇلكەيىپ، مادەنيەت ورىندارى، بالالار شىعارماشىلىعى ورتالىعى اشىلدى. اۋلالاردىڭ كوركەيگەنى ءوز الدىنا بولەك اڭگىمە. نەمەرەلەرىممەن ءجيى قىدىرامىن. ۇيدە انام بار. ءبىز قىدىراتىن جەر كوپ.
ءبىر ءۇيلى جان بولعاسىن، اۋىرماي-سىرقاماي تۇرمايمىز. جۋىردا عانا ءبىزدىڭ الاتاۋ اۋدانىنداعى №23 ەمحانا بازاسىنان "ۇزدىك تاجىريبە ورتالىعى" اشىلدى. بۇل – الماتى بويىنشا اشىلعان العاشقى مەديسينالىق ورتالىق. تۇرعىندار مەن دارىگەرلەر اراسىنداعى بايلانىستى نىعايتۋعا باعىتتالعان اتالمىش جوبا حالىقارالىق ستاندارتتارعا نەگىزدەلگەن. مۇندا حالىققا كەشەندى مەديسينالىق، الەۋمەتتىك جانە پسيحولوگيالىق كومەكتەر كورسەتىلەدى.
الماتىمنىڭ بارلىق جەتىستىگىنە تىلەكشىمىن.