«مەديسينا قىزمەتكەرلەرىنە قاتىستى زورلىق-زومبىلىققا جول بەرىلمەيدى» – دەنساۋلىق ساقتاۋ ءمينيسترى قوستانايدا فەلدشەردى ۇرۋ وقيعاسىنا پىكىر ءبىلدىردى
اقمارال ءالنازاروۆا انەل بايمۇرزينانىڭ وتباسىنا قولداۋ كورسەتىپ، بۇل جاعداي نازاردان تىس قالمايتىنىن ايتتى.
«جاقىندا قوستانايدا جەدەل جاردەم قىزمەتىنىڭ فەلدشەرلەرىنە جاسالعان شابۋىلدىڭ تاعى ءبىر سوراقى فاكتىسىنە تاپ بولدىق. شاقىرۋعا بارعان جاس مامان اۋىر جاراقاتتار الىپ، ءوزى اۋرۋحاناعا ءتۇستى»، – دەپ جازدى ول ءوزىنىڭ Instagram پاراقشاسىندا.
2019 جىلدان 2023 جىلعا دەيىن قازاقستاندا قىزمەتتىك مىندەتتەرىن اتقارۋ بارىسىندا 158 مەديسينا قىزمەتكەرى زارداپ شەككەن. ونىڭ ىشىندە 46 وقيعا 2022 جىلى، 80 وقيعا 2023 جىلى، ال بيىل 9 شابۋىل تىركەلگەن.
دەنساۋلىق ساقتاۋ ءمينيسترى جەدەل جاردەم قىزمەتىنىڭ ماماندارى كۇندەلىكتى قيىن جاعدايلاردا كومەك كورسەتەتىنىن ەسكە سالدى.
وسى سەبەپتى مينيسترلىك دەپۋتاتتاردىڭ قولداۋىمەن مەديسينا قىزمەتكەرلەرىنە قاتىستى زورلىق-زومبىلىق ءۇشىن قىلمىستىق جاۋاپكەرشىلىك ەنگىزۋدى ۇسىنعانىن اتاپ ءوتتى.
«مۇنداي قىلمىستار ءادىل جازاعا تارتىلۋى ءتيىس، سونىڭ ىشىندە بوستاندىقتى شەكتەۋ مەن قوعامنىڭ ايىپتاۋى قاراستىرىلۋى كەرەك. ءبىز مەديسينا قىزمەتكەرلەرىنە قارسى زورلىق-زومبىلىققا جول بەرىلمەيتىنىن جانە ونىڭ جازاسىز قالمايتىنىن ايقىن كورسەتۋىمىز قاجەت»، – دەدى ا.ءالعازاروۆا.
جەدەل جاردەم فەلدشەرى انەل بايمۇرزينا شاقىرتۋ كەزىندە اۋىر شابۋىلعا ۇشىرادى. زەينەتكەردى رەانيماسيالاۋ ارەكەتى ءساتسىز بولعاننان كەيىن، ەكى ايەل وعان جۇدىرىق الا جۇگىرىپ، اۋىر جاراقاتتار سالعان.