جۋىردا الماتى تەحنولوگيا جانە فلوريستيكا كوللەدجىندە ناۋرىز مەيرامى مەن قازاقستان حالقى اسسامبلەياسىنىڭ 30 جىلدىعى قاتار اتالىپ ءوتىلدى. اتالعان كوللەدجدە 19 ەتنوستىڭ وكىلى ءبىلىم الۋدا.
اتالعان ءىس-شارا بارىسىندا ستۋدەنتتەر ءار ۇلتتىڭ ۇلتتىق كيىمىن كيىپ، سول ۇلتتىڭ ونەرىن كورسەتتى. الماتى تەحنولوگيا جانە فلوريستيكا كوللەدجىنىڭ ونەرلى ستۋدەنتتەرى اسەم اننەن شاشۋ شاشىپ، مىڭ بۇرالا بيلەسە، كورشىلەس «ءسان جانە مودا ديزاين» كوللەدجىنەن ستۋدەنتتەر ارنايى كەلىپ، كۇمبىرلەگەن كۇيمەن كەشتىڭ ءسانىن كىرگىزدى. مەرەكەگە كەلگەن قوناقتار مەن اتا-انالارعا، ستۋدەنتتەرگە تەگىن كوجە تاراتىلىپ، ىستىق باۋىرساق ۇسىنىلدى. وسىناۋ ۇلىق مەرەكەگە ۇيعىر قىزى تولۋناي نيزاموۆا دا كەلگەن ەكەن. اڭگىمەگە تارتتىق.
– مەن دە وسى كەشتىڭ مەيمانى بولعانىما قۋانىشتىمىن. ۇلتىمنىڭ كيىمىن كيىپ كەلدىم. تالاي ەتنوستىڭ باسىن بىرىكتىرىپ وتىرعان وسىناۋ بەيبىت ەلدە ءوز ءتىلىمىزدى دە، مادەنيەتىمىزدى دە ۇمىتپاي، ءبارىمىز اۋىزبىرشىلىكپەن ءومىر ءسۇرىپ جاتقانىمىزدىڭ ءوزى ۇلكەن جەتىستىك.
قازاق پەن ۇيعىر حالقىنىڭ ۇقساستىعى وتە كوپ. ەڭ ءبىرىنشى ۇقساستىعىمىز – مۇسىلمانبىز. ودان كەيىنگى ۇقساستىعىمىز – ءبىز دە ۇلكەنگە قۇرمەت، كىشىگە ىزەت كورسەتۋدى قاتتى ۇستانامىز. سالت-داستۇرگە بەرىكپىز. كەلىننىڭ سالەم سالۋى، بالانى قىرقىنان شىعارۋ، ۇلدى سۇندەتكە وتىرعىزۋ، بەسىك توي، شىلدەحانا، تۇساۋكەسەر سالتى دا ۇيعىرلاردا بار.
ماعان قازاقتىڭ قىزىنىڭ ارتىنان اكەلەتىن قالىڭمال ءداستۇرى ۇنايدى جانە وتە دۇرىس دەپ ەسەپتەيمىن. بەسىك جىرى، توي جىرى ۇنايدى. «تاسپەن اتقاندى اسپەن ات»، «بەينەت ءتۇبى – زەينەت» سەكىلدى ناقىل سوزدەرىڭىز ماعىنالى.
ءبىز قازاقتان دا، ورىستان دا كەلىن الدىق. قانداي ۇلتپەن قۇدالاساق تا، ءتاتۋ-تاتتىمىز. ەڭ ءبىرىنشى ورىنعا سىيلاستىقتى قويامىز. ەكى قىز، ءبىر ۇل تاربيەلەپ وتىرمىز. ءبىر نەمەرەمىز بار. ءبارى قازاقشا بىلەدى. جۇمىستان تىس ۋاقىتتا سپورتپەن اينالىسقاندى ۇناتامىن، باسسەينگە بارامىن، تاۋعا شىعامىن. ءان سالىپ، بي بيلەيتىن دە ونەرىم بار. ونەر دە ۇلتتاردى بىر-بىرىنە جاقىنداستىرادى دەپ بىلەمىن.
ەلىمىزدەگى ەڭ ۇلكەن مەگاپوليس – الماتىدا تۇرۋ باقىتى بۇيىرعانىنا قۋانىشتىمىن. الماتى قالاسى قىلمىستىق-اتقارۋ جۇيەسى دەپارتامەنتىنە قاراستى №11 مەكەمەدە ادىلەت كاپيتانىمىن. ارىپتەستەرىم تۇگەل قازاق. ۇجىمدا اۋىزبىرشىلىك مول. مەن سوتتالعان جاسوسپىرىمدەردىڭ ەڭبەگىن ۇيىمداستىرۋ توبىنىڭ اعا ينسپەكتورىمىن. بالالار كولونياسىندا جازاسىن وتەپ جاتقان جەتكىنشەكتەردىڭ جۇمىسىن قاداعالايمىن. ولاردى ادال ەڭبەككە باۋليمىز. تاپقان ازىن-اۋلاق تابىسىن ۇيىنە جىبەرۋىنە، وتباسىن قۋانتۋىنا دانەكەر بولامىز. ولاردىڭ دا قوعامعا كەرەك ەكەنىن سەزىندىرۋ، ومىرگە دەگەن قۇشتارلىعىن جوعالتىپ الماي، جاقسى كۇندەردەن ءۇمىتىن ۇزبەۋى ءۇشىن قولداۋ كورسەتىپ وتىرامىز. ءبىز ءۇشىن بارلىق بالا – ورتاق. ولار وسى جەردەن اياعىن جازا باسقان قاتەلىگىن ءتۇسىنىپ، جاقسى ازامات بولىپ، بىزگە العىسىن ايتىپ شىعىپ جاتسا، ءبىز ءۇشىن ۇلكەن مارتەبە سول، – دەيدى الماتى قالاسى قىلمىستىق-اتقارۋ جۇيەسى دەپارتامەنتىنە قاراستى №11 مەكەمە قىزمەتكەرى ادىلەت كاپيتانى تولۋناي نيزاموۆا.