الماتى قالاسى بەلسەندى ۇزاق ءومىر ءسۇرۋ ورتالىعىنىڭ مەدەۋ اۋداندىق بولىمشەسىندە قازاقستان حالقىنىڭ بىرلىگى كۇنى قۇرمەتىنە «بىرلىك بار جەردە تىرلىك بار» تاقىرىبى شەڭبەرىندە مەرەكەلىك كونسەرت ءوتتى.
زەينەتكەرلەر مادەني ءىس-شاراعا ادەمى ساحنالىق كيىمدەرىن كيىپ، جاسانىپ، كوتەرىڭكى كوڭىل كۇيدە كەلىپتى. ولار سوعىس جىلدارىنداعى پاتريوتتىق اندەردى، دوستىق، بىرلىك تۋرالى تۋىندىلاردى شىرقادى. “كييەۆ ءۆالسى”، “شايحانا”، “گرۋزين ءانى”، “بوزجورعا”، “الماتى ءتۇنى” سىندى ءتۇرلى جانرداعى اندەر دە كوپشىلىكتىڭ ىقىلاسىنا بولەندى.
ورتالىقتاعى بي ۇيىرمەسىنە قاتىساتىن اجەلەر ەركىن قيمىلمەن مىڭ بۇرالا بيلەپ شىققاندا، تاڭدانباسقا شاراڭىز قالمايدى.
ايتپاقشى، ورتالىقتا جيىرمادان استام ەتنوستىڭ وكىلدەرى بار.
_”بۇگىندە قالانىڭ بارلىق اۋدانىندا بەلسەندى ۇزاق ءومىر ورتالىقتارى ءساتتى جۇمىس ىستەۋدە. بۇل جوبانىڭ ماقساتى – ۇزاق جىلدار جۇمىس ىستەپ، ەڭبەگىنىڭ زەينەتىن كورەتىن جاسقا جەتىپ، زەينەت دەمالىسىنا شىققان اعا بۋىنعا قولداۋ كورسەتۋ، ولاردىڭ ءومىر ءسۇرۋ ساپاسىن ارتتىراتىن زياتكەرلىك، وسىنداي مادەني-رۋحاني شىعارماشىلىق، قوعامدىق ءىس-شارالارعا كەڭىنەن تارتۋ”، - دەيدى الماتى قالاسى بەلسەندى ۇزاق ءومىر ءسۇرۋ ورتالىعىنىڭ ديرەكتورى ساۋلە بەكەتايەۆا.
ورتالىققا كەلەتىن اتا-اجەلەرگە 40-تان استام قىزمەت ءتۇرى كورسەتىلەدى. دالىرەك ايتساق، كوبىسى ءتىل ۇيرەنىپ، كومپيۋتەرلىك ساۋاتتىلىقتى مەڭگەرۋدى. دەنساۋلىقتى دارى-دارىمەكسىز نىعايتۋ بويىنشا ساباقتار دا سۇرانىسقا يە.
نەگىزى، ەگدە جاستاعى الماتىلىقتار اراسىندا «ايكۋنە» ۇلتتىق جاتتىعۋلارى، كەسكىندەمە كۋرستارى، حور، قولونەر جانە اگروتەراپيا ەرەكشە تانىمال.
بۇگىنگى مەرەكەدە قولونەردەن شەبەرلىك ساباعى ءوتتى.
”مەن بۇل ورتالىقتا قولونەردەن ساباق بەرەمىن. ۇيىرمەگە 25 زەينەتكەر قاتىسىپ ءجۇر. ولار شي توقيدى، ويۋ ويادى، ءجۇن ءتۇتىپ، ۇرشىق ءيىرىپ، تەكەمەت باسادى، جۇننەن، اكريل جىپتەردەن ءتۇرلى بەينەلەر، مونشاقتاردان كادەسىيلار، اشەكەي بۇيىمدار جاسايدى. كوبىسى قولونەرگە وسى ورتالىققا كەلگەندە قىزىعا باستاعانىن ايتادى. ءبىز ۇلكەن كىسىلەردىڭ ءار كۇنىنىڭ ماعىنالى وتكەنىن قالايمىز. مىنە، وزدەرىڭىز دە كۋاسىزدەر، ءان سالىپ، بي بيلەگەن اتا-اجەلەر قۇددى جاسارىپ كەتكەندەي، كوڭىلدەرى كوكتەم. اعا بۋىن قانداي قۇرمەتكە دە لايىقتى، - دەيدى ايجان انيپينا
مەرەكەلىك كەشتى زەينەتكەرلەردەن قۇرالعان “ساندۋعاش” توبى “بەيبىتشىلىك ساقتالادى” انىمەن تۇيىندەدى.