الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ ەرتە ارالاسۋ الەۋمەتتىك قىزمەتتەر ورتالىعىندا ارت-تەراپيا ساباعى ءوتتى. وعان وسى ورتالىقتان تەگىن قىزمەت الىپ جۇرگەن بالالار اتا-اناسىمەن قاتىستى.
ارت-تەراپيانىڭ قازاقستان حالقىنىڭ بىرلىگى كۇنىنە ورايلاستىرىلعانى دا جايدان-جاي ەمەس. بۇل ورتالىققا ءتۇرلى ەتنوس وكىلدەرى كەلەدى. ءبارى تاتۋ، بىر-بىرىنە تىلەكشى. سەبەبى ءبارى دە كۇندە جەتەكتەپ جۇرگەن، دەنساۋلىعىندا كىناراتى بار بالاسىنىڭ تولىققاندى ومىرگە ارالاسىپ كەتۋىنە جانىن سالىپ ءجۇر. ولار كۇندە ورتالىققا كەلگەندە بىر-بىرىمەن شۇرقىراي امانداسىپ، حال-جاعداي سۇراسىپ قاۋقىلداسىپ جاتادى. بۇگىنگى ارت-تەراپيا دا بالالاردى، اتا-انالاردى جانە ورتالىق قىزمەتكەرلەرىن بىر-بىرىنە تاعى دا جاقىنداستىرا تۇسكەندەي. بالدىرعاندار ماماندار كومەگىمەن بەينەتەراپيا مەن ويىن تەراپياسىنا قاتىستى. الاقانمەن سۋرەت سالدى. ءار بالاعا جەكە-جەكە كوڭىل ءبولىندى. ورتالىق قىزمەتكەرلەرى كىشكەنتاي دوستارىن ساباق كەزىندە ماقتاپ، ماداقتاپ، كوتەرمەلەپ وتىرۋدى دا ۇمىتقان جوق.
– ارت-تەراپيا كەزىندە ءوز جۇمىسىنا ريزا بولعان كىشكەنتاي بالدىرعاندارمەن بىرگە ءوزىمىز دە ءماز بولا قۋاندىق. بالالار ءوزىن ەركىن سەزىندى. ارت-تەراپيالىق ساباقتىڭ ماقساتى دا سول – ول جۇمىس ۇستىندە ءوزىن جايلى سەزىنىپ، مازاسىزدىعى باسىلىپ، وي-ارەكەتى ءبىر ارناعا شوعىرلانىپ، ءوزى سوزبەن جەتكىزە المايتىن نەمەسە داۋىستاپ ايتا المايتىن نارسەسىن بوياۋ، سۋرەت ارقىلى ءبىلدىرىپ، ناتيجەسىندە ءوز ءىس-قيمىلىنان قۋات الادى. بالالارعا ىنتىماقتاسا ىستەگەن توپتىق جۇمىس تا ۇنادى دەپ ويلايمىن. ارت-تەراپيا ولاردىڭ ۇساق موتوريكاسىن، شىعارماشىلىق ويلاۋ قابىلەتىن، سويلەۋىن دامىتادى. ءبىزدىڭ كىشكەنتاي دوستارىمىزعا جانە اتا-انالارىنا ءبىر ساتتىك قۋانىش سىيلاي العانىمىزدىڭ ءوزى ۇلكەن جەتىستىك، – دەيدى الماتى قالاسى
ەرتە ارالاسۋ الەۋمەتتىك قىزمەتتەر ورتالىعىنىڭ ديرەكتورى نۇرزيا اعابەك قىزى.