"قازاقستاننىڭ ۇزدىك تاۋارى": جەڭىمپاز كاسىپورىندار ماراپاتتالدى

جەڭىسكە ءتۇرلى كاسىپورىندار قول جەتكىزدى.

استانادا "قازاقستاننىڭ ۇزدىك تاۋارى" رەسپۋبليكالىق كورمە-بايقاۋىنىڭ جەڭىمپازدارى ماراپاتتالدى، دەپ حابارلايدى Almaty-akshamy.kz Inbusiness.kz سىلتەمە جاساپ. 

وسى جىلدىڭ قورىتىندىسى بويىنشا "وندىرىستىك ماقساتتاعى ۇزدىك تاۋارلار" اتالىمى بويىنشا "KazTigerTape" ج ش س جەڭىمپاز دەپ تانىلدى. بۇل كاسىپورىن سكوچ، جاپسىرما لەنتالاردى وندىرۋمەن اينالىسادى. جەڭىسكە جەتكەن كاسىپورىندار اراسىندا تەلەكوممۋنيكاسيا جانە ەلەكتر ەنەرگەتيكاسى جەلىلەرىنە كابەل وندىرەتىن "Kazcentrelectroprovod" ج ش س، جول سالۋ، كارىز جەلىسىن سالۋعا ارنالعان تەمىربەتون بۇيىمدارىن شىعاراتىن "ساپا سۋ" ج ش س دا بار.

"حالىققا ارنالعان ۇزدىك تاۋارلار" نوميناسياسى بويىنشا ۇزدىكتەر – "سەميراميدا" تىگىن فابريكاسىنىڭ ايەلدەرگە ارنالعان كۇزگى-قىسقى سىرت كيىم توپتاماسى، "اديلي تەكستيل" ج ش س ماتادان تىگىلگەن داستارحاندارى، "ەدەم" برەندىمەن "حابيبۋللا-اتا" جەكە كاسىپكەرلىگى شىعاراتىن جيھاز.

"ۇزدىك ازىق-تۇلىك تاۋارلارى" اتالىمىندا "زەنچەنكو جانە كومپانيا" كوممانديتتىك سەرىكتەستىگى، ءسۇت وڭدەۋ جانە ءسۇت ونىمدەرىن شىعاراتىن "AYKAN" ج ش س، تاۋىق ەتىن وندىرۋمەن اينالىساتىن "ECO-Chicken" اكك جەڭىسكە جەتتى.