قازاقستان سىرتقى ىستەر ءمينيسترىنىڭ ءبىرىنشى ورىنباسارى قايرات وماروۆ پەن اقش مەملەكەتتىك حاتشىنىڭ وڭتۇستىك جانە ورتالىق ازيا ىستەرى جونىندەگى كومەكشىسى دونالد لۋدىڭ تەڭ توراعالىعىمەن كەڭەيتىلگەن ستراتەگيالىق سەرىكتەستىك كوميسسياسىنىڭ (كسسك) كەزەكتى وتىرىسى ءوتتى، دەپ حابارلايدى Almaty-akshamy.kz.
بۇل تۋرالى قازاقپارات ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
باسپا ءسوز قىزمەتىنىڭ مالىمەتىنشە، سىندارلى جانە سەنىمدى پىكىر الماسۋ بارىسىندا تاراپتار 2022 جىلدىڭ بىرلەسكەن جۇمىستارىنىڭ قورىتىندىلارىن قاراستىرىپ، قازاقستان رەسپۋبليكاسى مەن امەريكا قۇراما شتاتتارى اراسىنداعى كەڭەيتىلگەن ستراتەگيالىق سەرىكتەستىكتى ودان ءارى دامىتۋ جوسپارلارىن بەلگىلەپ، ساياسات، قاۋىپسىزدىك، ساۋدا جانە ينۆەستيسيا، سونداي-اق ادامي ولشەم سالالارىنداعى ەكىجاقتى باسىمدىقتارىنىڭ ورتاقتىعىنا نازار اۋداردى.
قازاقستاندىق ديپلومات پرەزيدەنت قاسىم-جومارت توقايەۆتىڭ «ادىلەتتى قازاقستاندى» قۇرۋ جونىندەگى كۇن تارتىبىندەگى مىندەتتەردى كەشەندى تۇردە جۇزەگە اسىرۋدى قامتاماسىز ەتۋدەگى تاباندىلىعىن اتاپ ءوتتى. ءوز كەزەگىندە امەريكالىق تاراپ قازاقستانداعى دەموكراتيالىق رەفورمالارعا پراكتيكالىق كومەك كورسەتۋگە دەگەن نيەتىن قۋاتتادى.
تاراپتار دجەكسون-ۆەنيك تۇزەتۋىنەن باس تارتۋدىڭ جانە قازاقستان مەن امەريكا قۇراما شتاتتارى اراسىندا تۇراقتى قالىپتى ساۋدا قاتىناستارىن ورناتۋدىڭ ماڭىزدىلىعىن اتاپ ءوتتى، بۇل ساۋدا-ينۆەستيسيالىق ىنتىماقتاستىقتى دامىتۋعا ايتارلىقتاي سەرپىن بەرەدى.
كوميسسيا جۇمىسىنىڭ قورىتىندىلارى بويىنشا تاراپتار كسسك بىرلەسكەن مالىمدەمەسىن قابىلدادى.
ق.وماروۆتىڭ ساپارى بارىسىندا اقش مەملەكەتتىك دەپارتامەنتى مەن ۇلتتىق قاۋىپسىزدىك كەڭەسىنىڭ باسشىلىعىمەن وتكەن كەزدەسۋلەر ەكى ەل اراسىنداعى ساياسي ديالوگتى جانداندىرۋعا ەكى جاقتىڭ دا ۇمتىلىسىن اتاپ ءوتتى.
اقش مەملەكەتتىك حاتشىسىنىڭ حالىقارالىق قاۋىپسىزدىك جانە يادرولىق قارۋدى تاراتپاۋ جونىندەگى كومەكشىسى ەليوت كانگپەن جانە ەنەرگەتيكا ءمينيسترىنىڭ كومەكشىسى ەندريۋ لايتپەن وتكەن كەلىسسوزدەر تاراپتاردىڭ جاھاندىق ەنەرگەتيكالىق قاۋىپسىزدىكتى قامتاماسىز ەتۋ، اتوم ەنەرگەتيكاسىن دامىتۋداعى تۇراقتىلىق جانە يادرولىق قارۋدى تاراتپاۋ رەجيمىن قامتاماسىز ەتۋدەگى پراكتيكالىق ءوزارا ءىس-قيمىلىنا ارنادى. تاراپتار حالىقارالىق ۇيىمدار مەن رەجيمدەر شەڭبەرىندە كۇش-جىگەردى ۇيلەستىرۋدىڭ ماڭىزدىلىعى تۋرالى كەلىستى، سونداي-اق مەملەكەت باسشىسىنىڭ حالىقارالىق بيوقاۋىپسىزدىك اگەنتتىگىن قۇرۋ تۋرالى باستاماسىن جۇزەگە اسىرۋدىڭ تاسىلدەرىن ەگجەي-تەگجەيلى تالقىلادى.
ق. وماروۆتىڭ اقش ساۋدا وكىلىنىڭ كومەكشىسى كريستوفەر ۋيلسونمەن كەزدەسۋى قازاقستاندىق تاۋارلاردىڭ امەريكالىق نارىققا قول جەتكىزۋىن قامتاماسىز ەتۋ، زياتكەرلىك مەنشىك قۇقىعىن قورعاۋ، سيفرلىق كوممەرسيانى دامىتۋ ماسەلەلەرىن تالقىلاۋعا مۇمكىندىك بەردى.
كونگرەستىڭ وكىلدەر پالاتاسى حالىقارالىق ىستەر كوميتەتى ءتوراعاسىنىڭ ورىنباسارى مايكل ماككوللمەن كەزدەسۋدە تاراپتار ستراتەگيالىق سەرىكتەستىكتى ارتتىرۋ ءۇشىن پارلامەنتارالىق بايلانىستاردىڭ ماڭىزدىلىعىن اتاپ ءوتتى.
ساپار بارىسىندا قازاقستاندىق ديپلومات دجوردج ۆاشينگتون ۋنيۆەرسيتەتىندە وتكەن «ورتالىق ازيا: XXI عاسىرداعى ەنەرگيا كوزى» زەرتتەۋىنىڭ تۇساۋكەسەرىندە دە باس سپيكەر بولدى.