ەسىرتكى جاسىرۋشىلاردىڭ قاتارىندا كوكشەتاۋ قالاسىنىڭ 17 جاستاعى تۇرعىنى دا بار
وتكەن دەمالىس كۇندەرى ارنايى قۇرىلعان جەدەل-تەرگەۋ توپتارى ارنايى ماقساتتاعى بولىمشە جاۋىنگەرلەرىنىڭ كۇشتىك قولداۋىمەن استانا، قاراعاندى جانە كوكشەتاۋ قالالارىنىڭ اۋماعىندا وسى قىلمىستىق بيزنەسكە قاتىسۋشىلاردى ۇستادى، دەپ حابارلايدى Almaty-akshamy.kz.
جەدەل ۋاكىلدەر استانا، كوكشەتاۋ جانە قاراعاندى قالالارىنىڭ اۋماعىندا ەسىرتكىنى جاسىرىپ كەتۋ ارقىلى تاراتۋمەن اينالىسقان 12 ادامدى انىقتادى. ولار “Telegram” قوسىمشاسىندا جۇمىس ىستەيتىن ءۇش ينتەرنەت-دۇكەن ارقىلى ارەكەت ەتكەن.
ولاردىڭ قاتارىندا ۇيىمداستىرۋشى، وپەراتور، بۋحگالتەر، ينتەرنەت-ەسىرتكى دۇكەنىنىڭ اكىمشىسى، سونداي-اق 7 ەسىرتكى جاسىرىپ كەتۋشى (“ولشەپ، وراۋشىلار”، “قويماشىلار”، “كلادمەندەر”) بار.
12 مەكەنجاي بويىنشا جۇرگىزىلگەن ءتىنتۋ ناتيجەسىندە 3 كەلىدەن استام گاشيش، سونىمەن قاتار دايىن ورامدار، ەسىرتكىنى بۋىپ-تۇيۋگە جانە قولدانۋعا ارنالعان ءتۇرلى قۇرىلعىلار، قىلمىستىق بيزنەسكە قاتىستى قۇجاتتامالىق راستاماسى بار تەحنيكا مەن ۇيالى تەلەفوندار، سونداي-اق ينتەرنەت-دۇكەندەردىڭ قاراجات قوزعالىسى تۋرالى جازبالار تاركىلەندى.
ۇستالعان ەسىرتكى جاسىرۋشىلاردىڭ قاتارىندا كوكشەتاۋ قالاسىنىڭ 17 جاستاعى تۇرعىنى دا بار. سونىمەن قاتار، جەدەل ۋاكىلدەر ەسىرتكى جاسىرۋشىلاردىڭ ءبىرىنىڭ اناسىن، ياعني توپتىڭ قىلمىستىق بيزنەسىنە قاتىسى بار 42 جاستاعى ايەلدى ۇستادى.
"قازىرگى تاڭدا ۋاقىتشا ۇستاۋ يزولياتورىنا قىلمىستىق توپتىڭ 10 مۇشەسى قاماۋعا الىندى. ەكى ادامعا قاتىستى “كەلۋ تۋرالى مىندەتتەمە” پروسەسسۋالدىق ماجبۇرلەۋ شاراسى قولدانىلدى. ق ر قك-نىڭ 297-بابى 3-بولىگى بويىنشا سوتقا دەيىنگى ءىس جۇرگىزۋ باستالدى (ەسىرتكى زاتتارىن وتكىزۋ ماقساتىندا زاڭسىز دايىنداۋ، ساقتاۋ، تاسىمالداۋ نەمەسە وتكىزۋ). ادامدار توبىنىڭ الدىن الا ءسوز بايلاسۋىمەن بىرنەشە رەت، اسا ءىرى مولشەردە، ەلەكتروندىق اقپاراتتىق رەسۋرستاردى پايدالانۋ ارقىلى جاسالعان بۇل قىلمىستار ءۇشىن مۇلكى تاركىلەنىپ، ون جىلدان ون بەس جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلادى. تەرگەۋ شارالارى جالعاسۋدا. ءتيىستى ساراپتامالار تاعايىندالدى"، – دەدى ق ر ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ ورىنباسارى اسقار مۇحامەتقالييەۆ.