18 جاستاعى قىز اۋرۋحاناعا بىرنەشە جاراقاتپەن تۇسكەن
شىمكەنتتەگى جانتۇرشىگەرلىك جول اپاتىنان كەيىن اۆتوبۋس تيەسىلى كومپانيا ليسەنزياسىنان ايىرىلۋى مۇمكىن. قالالىق پوليسيا دەپارتامەنتى اكىمدىككە وسىنداي ۇسىنىس جولدادى، دەپ حابارلايدى Almaty-akshamy.kz Almaty.tv-گە سىلتەمە جاساپ.
بىرنەشە ادامنىڭ ءومىرىن جالماعان جانتۇرشىگەرلىك جول اپاتىنان امان قالعان داريعا سەيدالييەۆا ءقازىر اۋرۋحانادا. اناسى ونىڭ 6 بالانىڭ ۇلكەنى، وتباسىنىڭ اسىراۋشىسى ەكەنىن ايتادى. قىزىنىڭ ومىرىنە الاڭدايدى. سوزىنشە، 2 كۇن وتسە دە، ەشكىم كەلىپ كەشىرىم سۇراپ، قىزدىڭ حال-جاعدايىن بىلۋگە تىرىسپاپتى.
«پاتەراقىسى، ءتۇرلى تولەم، ازىق-تۇلىك بار – ءبارى وسى قىزدىڭ موينىندا، وتباسىن اسىراپ وتىر. مەندە ءبىر-اق بۇيرەك بار، جۇمىسقا جارامايمىن. ءقازىر 8 ايلىق سابيمەن وتىرمىن. ەندى قىزىم جاقىن ارادا جۇمىسقا شىقپايدى. قالاي كۇن كورەمىز؟ اۆتوبۋس يەلەرى جاۋاپ بەرسىن. قىزىمنىڭ ەمىنە قاجەتتى دارى-دارمەگى بار. دەنساۋلىعى بىر-ەكى جىلدان كەيىن سىر بەرسە، كىم جاۋاپ بەرەدى؟» – دەدى جابىرلەنۋشىنىڭ اناسى مادينا سەيدالييەۆا.
18 جاستاعى قىز اۋرۋحاناعا بىرنەشە جاراقاتپەن تۇسكەن. اق حالاتتىلار وعان وتانىڭ قاجەت بولماعانىن ايتتى. دەگەنمەن ول ءالى بىرنەشە كۇن اۋرۋحانادا ەم قابىلداپ، دارىگەردىڭ باقىلاۋىندا بولادى.
«8 ساۋىردە مەن اۋرۋحانادا جاۋاپتى دارىگەر بولدىم. سول كۇنى وقيعا ورنىنان سەيدالييەۆا داريعا دەيتىن 18 جاسار قىز جەتكىزىلدى. دەرەۋ جانساقتاۋ بولىمىنە كىرگىزىلىپ، تولىق تەكسەرۋدەن ءوتتى. تەكسەرۋ بارىسىندا باس ميىنىڭ شايقالۋى، كەۋدەسىنىڭ اۋىرسىنىپ قالعانى جانە قولى مەن اياعىندا جاراقات انىقتالدى. ءقازىر ناۋقاستىڭ جاعدايى ورتاشا دەڭگەيدە، نەيروحيرۋرگيا بولىمىندە كەرەكتى ەمىن قابىلداپ جاتىر»، – دەدى №1 قالالىق كلينيكالىق اۋرۋحاناسىنىڭ ءبولىم مەڭگەرۋشىسى ەلدار سماعۇلوۆ.
ال جول-كولىك اپاتىندا قازا تاپقانداردىڭ ۇشەۋى ءبىر ساۋدا ورنىندا ساتۋشى بولىپ ىستەگەن. ءبىرىنىڭ ارتىندا شيەتتەي 5 بالاسى، ەندى ءبىرىنىڭ مۇمكىندىگى شەكتەۋلى اناسى قاراۋسىز قالدى. قايتىس بولعانداردىڭ جاقىندارىنا كومەك قولىن سوزۋ ءۇشىن جۇمىس ورنىنىڭ قىزمەتكەرلەرى ارنايى قور اشىپ، قارجى جيناپ جاتىر.
«ازيزا دەگەن اپكەمىز ساتۋشى بولىپ ىستەيتىن. ارتىندا 5 بالاسى قالدى. وسى قالادا جالدامالى پاتەردە تۇراتىن، كۇيەۋى جوق. ال ەكىنشى ازاتحان، ايزادا دەپ ايتامىز. ول قىزدىڭ مۇمكىندىگى شەكتەۋلى اناسى بار، ول كىسىنىڭ جالعىز اسىراۋشىسى ايزادا ەدى. ەندى ماماسى جالعىز قالدى. ول دا جالدامالى پاتەردە تۇراتىن. ارىپتەستەرمەن بىرىگىپ، اقشا جيناپ جاتىرمىز. جينالعان سۋممانى وسى مارقۇمداردىڭ وتباسىنا ءبولىپ بەرەمىز»، – دەدى شىمكەنت قالاسىنىڭ تۇرعىنى ايدانا راحىمبايەۆا.
بۇل ءىس بويىنشا ءقازىر سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر. قالالىق پوليسيا دەپارتامەنتى اكىمدىككە تاسىمالداۋشى كومپانيانى ليسەنزياسىنان ايىرۋ جونىندە ۇسىنىس جولداپتى.
«ساراپتامالار تاعايىندالدى. اۆتوبۋس جۇرگىزۋشىسى قاماۋدا. شىمكەنت قالالىق اكىمشىلىگىنە Shymkent bus فيرماسىن جولاۋشىلار تاسىمالداۋ ليسەنزياسىنان ايىرۋ تۋرالى ۇسىنىس جولداندى. ۇسىنىستى ءبىز جولدايمىز، قاراۋ مەرزىمى ءبىر اي كولەمىندە»، – دەدى پوليسيا دەپارتامەنتى انىقتاۋ باسقارماسىنىڭ باستىعى نۇرداۋلەت سۇيەۋبەكوۆ.
ءقازىر بۇل ىسكە قاتىستى سوت-مەديسينالىق ساراپتاما تاعايىندالدى. قوعامدىق كولىك اۆتوتەحنيكالىق تەكسەرىستەن ءوتىپ جاتىر.