قازاقستان – تۇركى الەمى، تۇركى مەملەكەتتەرى ءۇشىن ءارقاشان قاسيەتتى قاراشاڭىراق، اتاجۇرت.
ازەربايجاننىڭ "ماڭگىلىك بىرلىك" جاستار ۇيىمىنىڭ كەزەكتى قوناعى "Alatau-Aqparat" مەديا حولدينگىنىڭ باس ديرەكتورى ەرجان قالىمباي ۇلى بولدى.
زۋم الەۋمەتتىك جەلىسى ارقىلى وتكەن كەزدەسۋگە ازەربايجان، تۇركيا جانە وزگە دە تۇركى ەلدەرىنىڭ بەلسەندى جاستارى، سونىمەن بىرگە، ءازىربايجاننىڭ Turan مۋزىكالىق توبىنىڭ جەتەكشىسى ەلشاد الەكپەروۆ قاتىسىپ، سۇراقتار قويدى.
ءوز سوزىندە ەرجان قالىمباي ۇلى قازاقستاننىڭ تۇركى الەمىندەگى ءرولى، سونداي-اق ازەربايجان مەن قازاقستان اراسىنداعى بايلانىستىڭ نىعايىپ كەلە جاتقانى تۋرالى ناقتى مىسالدارمەن ايتىپ بەردى.
ونىڭ سوزىنشە، قازاقستان – تۇركى الەمى، تۇركى مەملەكەتتەرى ءۇشىن ءارقاشان قاسيەتتى قاراشاڭىراق، اتاجۇرت. سوندىقتان تۇركى بىرلىگىن قالىپتاستىرۋدا ماڭىزى زور ناقتى باستامالارى ارقىلى ءىرى قادامدار جاساپ كەلەدى. ول سونداي-اق 2009 جىلى ناحچىۆان دەكلاراسياسى ناتيجەسىندە قۇرىلعان تۇرىك مەملەكەتتەرى ۇيىمىنىڭ تۇركىلىك ينتەگراسياعا سونى سەرپىن بەردى دەپ سانايدى.
ءقازىر جىل سايىن قۇرىلتاي وتەدى، بارلىق سالادا مينيسترلەر دەڭگەيىندە ناقتى جۇمىستار كۇرگىزىلىپ جاتىر. تۇركى ەلدەرىنىڭ كوشباسشىلارى تەك اتالعان ۇيىم شەڭبەرىندە عانا ەمەس، ەكىجاقتى كەزدەسۋلەردە دە ءوزارا بايلانىستى كۇشەيتكەن. اسىرەسە، قازاقستان پرەزيدەنتى قاسىم-جومارت توقايەۆ پەن ازەربايجان پرەزيدەنتى يلحام الييەۆ اراسىنداعى قارىم-قاتىناس باۋىرلاس ەلدەر بايلانىسىن جاڭا دەڭگەيگە شىعاردى.
سونىمەن قاتار، ەرجان قالىمباي ۇلى ازەربايجان مەملەكەت باسشىسىنىڭ ۇزاقمەرزىمدى اقىلدى ءارى كورەگەن ساياساتى ارقاسىندا ءوز جەرىن كەرى قايتارىپ الۋىن تۇركى الەمى ءۇشىن، جالپى قازىرگى سىن-قاتەرگە تولى جاھان ساياساتىنداعى ەرەكشە وقيعا دەپ باعالايتىنىن جەتكىزدى.
"ماڭگىلىك بىرلىك" جاستار ۇيىمىنىڭ ءتوراعاسى شاحين الييەۆ تە مول ماعلۇمات بەرگەن قوناققا العىسىن ايتا وتىرىپ باۋىرلاس ەل باسشىلارىنىڭ ەكونوميكالىق، ساياسي جانە مادەني بايلانىستاردى قارقىندى دامىتۋدا ەرەكشە ءرول اتقارىپ وتىرعانىنا توقتالدى.