تاربيەنىڭ جاقسى قۇرالىنىڭ ءبىرى – ۇلگى-ونەگە كورسەتۋ.
عارىشكەرلەر كۇنى قارساڭىندا قازاقستاننىڭ تۇڭعىش ۇشقىش-عارىشكەرى، كەڭەس وداعىنىڭ باتىرى، حالىق قاھارمانى، اۆياسيا گەنەرال-مايورى توقتار اۋباكىروۆ «جاس سارباز» رەسپۋبليكالىق اسكەري-پاتريوتتىق قوزعالىسىنىڭ تاربيەلەنۋشىلەرىمەن كەزدەستى، دەپ حابارلايدى Almaty-akshamy.kz.
ۇلتتىق اسكەري-پاتريوتتىق ورتالىعىندا وتكەن شاراعا اۋە قورعانىسى كۇشتەرىنىڭ باس قولباسشىسى، اۆياسيا گەنەرال-لەيتەنانتى نۇرلان ورمانبەتوۆ، «جاس سارباز» قوزعالىسىنىڭ ءتوراعاسى مەيىربەك مەڭدىعالييەۆ، ەلوردانىڭ جاستار ساياساتى ماسەلەلەرى باسقارماسىنىڭ باسشىسى قايرات قامباروۆ قاتىستى.
توقتار اۋباكىروۆ جاس پاتريوتتارعا ءوزىنىڭ ۇشقىش بولامىن دەگەن بالا كۇنگى ارمانى، ماقساتقا قول جەتكىزۋ ءۇشىن جۇمساعان كۇش-جىگەرى، عارىش كەمەسىمەن ۇشۋى جانە جەر وربيتاسىندا بولعان ساتتەرى جونىندە اڭگىمەلەپ بەردى.
«تاربيەنىڭ جاقسى قۇرالىنىڭ ءبىرى – ۇلگى-ونەگە كورسەتۋ. بالالار ەرلىكتىڭ، باتىلدىقتىڭ جانە ەڭبەكتىڭ ارقاسىندا ارمانعا قول جەتكىزگەن ادامدى كوردى. بۇنداي ونەگە ولاردىڭ ەسىندە قالىپ، ارمانىنا اينالادى، بولاشاعىنا جول سىلتەيدى. مەنىڭ ويىمشا، ەرەسەكتەردىڭ مىندەتى – وسكەلەڭ ۇرپاقپەن ءجيى كەزدەسۋ، ولارعا ۇلگى-ونەگە كورسەتۋ، بالالاردى پاتريوتيزمگە باۋلۋ، ولارعا دۇرىس جولدى تاڭداۋعا كومەكتەسۋ»، – دەپ اتاپ ءوتتى جاستارمەن كەزدەسۋدەن كەيىن قازاقستاندىق تۇڭعىش عارىشكەر.
جاس پاتريوتتار توقتار اۋباكىروۆكە جىلى لەبىزدەرىن ءبىلدىرىپ، «جاس سارباز» قوزعالىسىنىڭ سيمۆولى ورنەكتەلگەن جەيدە مەن باس كيىم تارتۋ ەتتى.
