الماتى قالاسىندا قازاقستاننىڭ تاۋەلسىزدىك مەرەكەسىنە وراي بيلياردتان رەسپۋبليكالىق ءتۋرنيردىڭ اشىلۋى ءوتتى. شارانى الماتى قالاسى اكىمدىگى مەن ع.مۇسىرەپوۆ اتىنداعى قوعامدىق قورى ۇيىمداستىردى. بۇل تۋرنير قازاقستاننىڭ ەڭبەك سىڭىرگەن قايراتكەرى، اقىن، "بارىس" جانە "پاراسات" وردەندەرىنىڭ يەگەرى، سونداي-اق "فرانس كافكا" اتىنداعى حالىقارالىق سىيلىقتىڭ لاۋرەاتى ءشومىشباي سارييەۆتىڭ قۇرمەتىنە ارنالدى.
ءتۋرنيردى ق ر ەڭبەك ەرى ءاسانالى ءاشىم ۇلى اشىپ بەردى. ونان سوڭ، "قازاق ادەبيەتى" گازەتىنىڭ باس رەداكتورى باۋىرجان جاقىپ باستاعان جازۋشىلار مەن قوعام قايراتكەرلەرى ءسوز سويلەدى. قوناقتاردىڭ قاتارىندا ءاسانالى ءاشىموۆ، بەيبىت ورال ۇلى، ەستاي الەكەيەۆ، سۇلەيمەن يبراگيموۆ، قادىرعالي كوبەنتايەۆ سىندى تانىمال تۇلعالار بولدى.
باۋىرجان جاقىپ ءوز سوزىندە:
– ءشومىشباي اعامىزدىڭ شىعارماشىلىعى مەن ءومىرى ءبىز ءۇشىن ۇلكەن مەكتەپ. ول تەك اقىن ەمەس، مادەنيەتكە، سپورتقا جانى جاقىن، كەڭ جۇرەكتى ادام ەدى. ونىڭ ولەڭدەرى مەن اندەرى ءالى كۇنگە دەيىن حالىقتىڭ جۇرەگىنەن ورىن تاپقان. بۇل تۋرنير اعامىزدىڭ رۋحىنا دەگەن قۇرمەتتىڭ بەلگىسى، – دەپ اتاپ ءوتتى.
ءىس-شارا بارىسىندا ع.مۇسىرەپوۆ اتىنداعى قوعامدىق قوردىڭ ديرەكتورى عابيدەن جاكەيەۆ قازاقستاننىڭ حالىق جازۋشىسى ولجاس سۇلەيمەنوۆتىڭ ارنايى قۇتتىقتاۋ حاتىن وقىدى. سونىمەن قاتار، ءشومىشباي سارييەۆتىڭ جارى ارنايى مەدالمەن ماراپاتتالدى. شارانىڭ وتۋىنە اتىراۋدان كەلگەن ەرلان تابىلدييەۆ پەن سابىرجان يبراگيموۆ سەكىلدى ازاماتتار دەمەۋشىلىك كورسەتتى.
تۋرنيرگە 32 قاتىسۋشى ب ا ق سىناستى. باسەكە قىزىقتى ءارى تارتىستى ءوتتى. جارىستىڭ قورىتىندىسى بويىنشا، "قازاق ادەبيەتى" گازەتىنىڭ باس رەداكتورى باۋىرجان جاقىپ ءبىرىنشى ورىندى جەڭىپ الدى.
بۇل تۋرنير – اقىن، قوعام قايراتكەرى ءشومىشباي سارييەۆتىڭ رۋحىنا دەگەن قۇرمەت قانا ەمەس، سونداي-اق شىعارماشىلىق پەن سپورتتى ۇشتاستىرعان ەرەكشە شارا بولدى.