جالپى مۋزىكا – عالىمداردىڭ اراسىندا ەڭ تارتىستى ماسەلەلەردىڭ ءبىرى.
ويتكەنى مۋزىكانى اشىق حارام دەپ كەلگەن حابارلار ساحيح ەمەس، ال ول جايىندا كەلگەن ساحيح حاديستەردە اشىق حارام دەپ ايتىلماعان.
حاديستەردە پايعامبارىمىزدىڭ (وعان اللانىڭ سالاۋاتى مەن سالەمى بولسىن) دۋففپەن ايتىلعان اندەردى تىڭداعانى، حاسسان (ر.ا.) اللا ەلشىسىن دارىپتەپ، قورعاعان ۋاقىتىندا ونى قۇپتاعانى ت.ب. ءدىندى ناسيحاتتاۋ، حالىقتى وتانسۇيگىشتىككە، يماندىلىققا، بىرلىك پەن ادامگەرشىلىككە شاقىراتىن اندەرگە رۇقسات ەكەندىگىنە دالەل بولادى. سونداي-اق بۇعان ءبىرقاتار ساحابالار، تابيعيندەر جانە بىرنەشە عالىمدار رۇقسات بەرگەن.
يمام ءابدۋ ءال-عاني ءان-نابۋلۋسي ءال-حانافي: «مۋزىكالىق اسپاپتار – ونىڭ كورىنىسى، ودان شىعاتىن دىبىس سەبەپتى حارام ەمەس. ويتكەنى قۇستاردىڭ سايراعانى دا اۋەن. عالىمدار قۇستىڭ اۋەنى حارام ەمەستىگىنە ءبىراۋىزدان كەلىسكەن. ەگەر ول بەكەرشىلىك، حارام نارسەلەرمەن ارالاسسا سول ۋاقىتتا تىيىم سالىنادى»، – دەگەن.
دەمەك ءدىندى ناسيحاتتايتىن، حالىقتى وتانسۇيگىشتىككە، يماندىلىققا، بىرلىك پەن ادامگەرشىلىككە شاقىراتىن اندەر مەن مۋزىكاعا رۇقسات. ەگەر مۋزىكا پاسىقتىققا، بۇزعىنشىلىققا، جامانشىلىققا، ازعىندىققا، ت.س.س. شاريعاتىمىزدا تىيىم سالىنعان ىستەرگە الىپ بارسا تىيىم سالىنادى.
سان عاسىردان بەرى يسلام ءدىنىن ۇستانىپ كەلە جاتقان قازاق حالقىنىڭ ۇلتتىق اسپابى – دومبىرا ارقىلى ءان، تەرمە-تولعاۋ شىرقاپ، تىڭداۋشىنى يماندىلىققا، ىزگىلىككە، ادامگەرشىلىككە، وتاندى قورعاۋعا، اتا-انامىزدى قادىرلەۋگە شاقىرعان. سوندىقتان دومبىرانى تارتۋعا بولادى.
(قمدب شاريعات جانە ءپاتۋا ءبولىمى)