قوناقاسى بەرۋگە تىيىم سالۋ ۇسىنىلدى

قوستانايدا ءدىني راسىمدەردەگى ىسىراپشىلدىقتى ازايتۋ ءۇشىن جاڭا تالاپتار ەنگىزىلگەن، دەپ حابارلايدى aqshamnews.kz

قمدب مالىمەتىنشە، بۇل شەشىم "ايماعانبەت قاجى سپان ۇلى" مەشىتىندە وتكەن كونفەرەنسيا بارىسىندا قابىلدانعان.

ءىس-شارانى قازاقستان مۇسىلماندارى ءدىني باسقارماسىنىڭ قوستاناي وبلىستىق وكىلدىگى ۇيىمداستىردى.

قوستاناي وبلىسىنىڭ باس يمامى بەكتۇرسىن قاجى تورعايباي ۇلىنىڭ ايتۋىنشا، جاڭا شەشىمدەر ءدىني راسىمدەردەگى ارتىق شىعىنداردى قىسقارتۋعا باعىتتالعان.

ولاردىڭ نەگىزگىلەرى: قوناق اسىن (جانازادان ءبىر كۇن بۇرىنعى بەرىلەتىن كەشكى استى) توقتاتۋ؛

اس ءمازىرىن (باۋىرساق، نان، قانت، كامپيت-پىسپەنان، سۋ، ءشاي، ىستىق تاماق) بىرىزدىلىككە سالۋ؛

قمدب-نىڭ "قامقور-شاراپات" سالتتىق قىزمەت كورسەتۋ ورتالىعىنىڭ بەكىتكەن نورمالارى بويىنشا زيرات كوتەرۋ؛

مارقۇمنىڭ جىلدىق استارىندا كورسەتىلەتىن بەينەروليكتەردىڭ اۋەنىنە نازار اۋدارۋ، بەينەدە الكوگولدى ىشىمدىگى بار فوتو نە ۆيدەو كورىنىستەردىڭ، اۋرەتى اشىق كيىمدەردىڭ بولماۋىن قاداعالۋ؛

جانازا استارىن جينالىسقا اينالدىرماۋ، سايكەسىنشە، وندا ءۇش ادامنان ارتىق كىسىگە ءسوز بەرمەۋ.