قازاقستان رەسپۋبليكاسى پرەمەر-مينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ حورۆاتيانىڭ سىرتقى جانە ەۋروپالىق ىستەر ءمينيسترى گوردان گرليچ-رادماننىڭ شاقىرۋىمەن حورۆاتيا رەسپۋبليكاسىنا رەسمي ساپارمەن كەلدى.
قازاقستاننىڭ سىرتقى ساياسي ۆەدومستۆوسى باسشىسىنىڭ زاگرەبكە ساپارى قازاق-حورۆات ىنتىماقتاستىعىنىڭ دامۋىنا جاڭا ساپالى سەرپىن بەرەتىن ەكىجاقتى قاتىناستار تاريحىنداعى العاشقى ساپار، دەپ حابارلايدى aqshamnews.kz سىرتقى ىستەر مينيسترلىگىنە سىلتەمە جاساپ.
تاراپتار ساياسي ديالوگتى، ساۋدا-ەكونوميكالىق جانە ينۆەستيسيالىق ءوزارا ءىس-قيمىلدى، سونداي-اق مادەني-گۋمانيتارلىق بايلانىستاردى نىعايتۋدى قوسا العاندا، ەكىجاقتى ىنتىماقتاستىقتىڭ كەڭ اۋقىمدى ماسەلەلەرىن تالقىلادى. قازاقستان مەن حورۆاتيا ەنەرگەتيكا، كولىك، سونىڭ ىشىندە ازاماتتىق اۆياسيا، اۋىل شارۋاشىلىعى، سيفرلاندىرۋ جانە يننوۆاسيا، سونداي-اق ءبىلىم بەرۋ جانە تۋريزم سياقتى سالالاردا ءوزارا ءتيىمدى ىنتىماقتاستىقتى تەرەڭدەتۋ ءۇشىن ايتارلىقتاي الەۋەتكە يە ەكەندىگى اتالىپ ءوتتى.
ق ر ءسىم باسشىسى حورۆاتيا قازاقستاننىڭ بالقان مەن ەۋروپالىق وداقتاعى بۇرىننان كەلە جاتقان جانە جاقىن سەرىكتەسى ەكەنىن مالىمدەدى.
«ءبىز دوستىق پەن ءوزارا سەنىمگە نەگىزدەلگەن بارلىق دەڭگەيدەگى ماعىنالى ساياسي ديالوگىمىزدى جوعارى باعالايمىز. ەكونوميكالىق ءوزارا ءىس-قيمىل – قازاق-حورۆات قاتىناستارىنىڭ نەگىزگى باعىتتارىنىڭ ءبىرى»، – دەدى م.نۇرتىلەۋ.
حورۆاتيا قازاقستاننىڭ وڭتۇستىك شىعىس ەۋروپاداعى ساۋدا سەرىكتەستەرى اراسىندا ءۇشىنشى ورىنعا يە. 2023 جىلدىڭ قورىتىندىسى بويىنشا ءوزارا تاۋار اينالىمى 432 ملن اقش دوللارىن قۇرادى.وسى تۇرعىدا ەكىنشى وتىرىسى 2025 جىلى استانادا ءوتۋى جوسپارلانعان ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ جۇمىسىن جانداندىرۋ تۋرالى ۋاعدالاستىققا قول جەتكىزىلدى.
ءوز كەزەگىندە حورۆاتيانىڭ ءمينيسترى زاگرەب استانامەن قارىم-قاتىناستى ودان ءارى ىلگەرىلەتۋگە مۇددەلى ەكەنىن جانە ءوزارا قىزىعۋشىلىق تۋدىراتىن بارلىق سالالاردا ءوزارا ءتيىمدى ارىپتەستىكتى ىلگەرىلەتۋ ءۇشىن بارلىق كۇش-جىگەردى جۇمساۋعا دايىن ەكەنىن جەتكىزدى.
حالىقارالىق كۇن ءتارتىبىنىڭ وزەكتى ماسەلەلەرى، سونداي-اق بۇۇ، ەقىۇ جانە باسقا دا كوپجاقتى قۇرىلىمدار اياسىنداعى ءوزارا ءىس-قيمىل جونىندە پىكىر الماسىلدى. ورتالىق ازيا مەن بالقانداعى ارىپتەستىك اسپەكتىلەرىنە، جاھاندىق جانە وڭىرلىك تۇراقتىلىقتى قامتاماسىز ەتۋ ماسەلەلەرىنە ەرەكشە نازار اۋدارىلدى.
كەزدەسۋ قورىتىندىسى بويىنشا قازاقستان سىرتقى ىستەر مينيسترلىگى مەن حورۆاتيا سىرتقى جانە ەۋروپالىق ىستەر مينيسترلىگى اراسىنداعى 2025-2027 جىلدارعا ارنالعان ىنتىماقتاستىق باعدارلاماسىنا، سونداي-اق ق ر مەملەكەتتىك باسقارۋ اكادەمياسى جانىنداعى ديپلوماتيا ينستيتۋتى مەن حورۆاتيا ديپلوماتيالىق اكادەمياسى اراسىنداعى ىنتىماقتاستىق تۋرالى مەموراندۋمعا قول قويىلدى.