ەكسپورت كولەمىن ۇلعايتۋ، جاڭا كەلىسىمشارتتار جاساۋ جانە سەرىكتەستىك ورناتۋ.
وسى ماقساتتا گرۋزيانىڭ تبيليسي قالاسىنا قازاقستاننىڭ ساۋدا ميسسياسى كەلدى، دەپ حابارلايدى Almaty-akshamy.kz
بيزنەس-فورۋمعا ەلىمىزدىڭ اتىنان ماكارون، كونديتەرلىك ونىمدەر، تۇز جانە باسقا دا ونىمدەردى ەكسپورتتايتىن جيىرمادان استام كومپانيا قاتىستى. بۇگىنگى تاڭدا كاسىپكەرلەر ءۇشىن ەكى مەملەكەتتىڭ ترانزيتتىك مۇمكىندىكتەرى ەۋروپا ەلدەرىنىڭ نارىعىنا شىعۋعا كوپىر بولىپ تۇر.
«بىزدە قازاقستاندىق سەرىكتەستەرمەن ناقتى شەشىمگە كەلىپ، كەلىسىم-شارتتار جاساۋعا مۇمكىندىك بار. ازىرگە ناقتى قانداي سوماعا كەلىسىمشارت جاساسقانىمىزدى ايتا المايمىن. دەگەنمەن، كەيبىر ءىرى كومپانيالارمەن كەلىسىمدەر جاسالدى. بولاشاقتا كومپانيالار ءۇشىن دە، ءبىزدىڭ ەلدەر ءۇشىن دە ءبارى جاقسى بولادى دەپ سەنەمىز»، - دەيدى «وري نابيدجي» كومپانياسىنىڭ يمپورت بويىنشا مەنەدجەرى ەرەكلە كاندەلاكي.
«بۇگىن جالپى قۇنى 11،2 ميلليون دوللار بولاتىن بەس كەلىسىمشارتقا قول قويىلدى. وتكەن جىلى ەكسپورتتىڭ جالپى كولەمى 25 ميلليون دوللاردى قۇراعانىن ەسكەرسەك، بۇگىنگى شارا ەكسپورتتىق كەلىسىمشارتتارىمىزدىڭ تەڭ جارتىسىن جاپتى. بيىل گرۋزيامەن تاۋار اينالىمىن ەكى ەسەگە ۇلعايتاتىنىمىزعا سەنىمدىمىن»،- دەيدى QazTrade باس ديرەكتورى ازامات اسقار ۇلى.