قازاقستان پرەزيدەنتى قاسىم-جومارت توقايەۆ مەملەكەت جانە قوعام قايراتكەرى، ءبىلىم بەرۋ ءىسىنىڭ قۇرمەتتى قىزمەتكەرى ءشامشا كوپباي قىزى بەركىمبايەۆانىڭ دۇنيەدەن وتۋىنە بايلانىستى كوڭىل ايتتى، دەپ حابارلايدى almaty-akshamy.kz بورت №1 Telegram كانالىنا سىلتەمە جاساپ.
«ءشامشا كوپباي قىزى ەڭبەك جولىن قاتارداعى ۇستازدىقتان باستاپ، ءوزىنىڭ ىسكەرلىگى مەن قابىلەتىنىڭ ارقاسىندا مەملەكەتتىك قىزمەتتىڭ سان ءتۇرلى سالاسىندا ابىرويمەن ەڭبەك ەتتى. مينيستر كەزىندە ءبىلىم مەن عىلىم كوشىن العا جىلجىتىپ، باسەكەگە قابىلەتتى قوعام قالىپتاستىرۋعا مول ۇلەس قوستى. دەپۋتات بولعان تۇستا وتاندىق زاڭنامانى جەتىلدىرۋگە اتسالىستى. قازاق مەملەكەتتىك قىزدار پەدوگوگيكالىق ينستيتۋتىنىڭ رەكتورلىق قىزمەتىن اتقارعان جىلدارى تالاي شاكىرت تاربيەلەپ، دارىندى ماماندارعا باعدار كورسەتە ءبىلدى»، – دەپ جازىلعان مەملەكەت باسشىسىنىڭ جەدەلحاتىندا.
پرەزيدەنت كەڭ پەيىلىمەن اينالا-توڭىرەگىنىڭ شىنايى قۇرمەتىنە بولەنگەن ءشامشا كوپباي قىزىنىڭ جارقىن بەينەسى ۇمىتىلمايتىنىن اتاپ وتكەن.