قازاقستان رەسپۋبليكاسىنىڭ قورعانىس ءمينيسترى ماسكەۋدەگى IX حالىقارالىق قاۋىپسىزدىك جونىندەگى كونفەرەنسياعا قاتىستى.
بۇل شارانى 2012 جىلدان بەرى جىل سايىن رەسەي فەدەراسياسىنىڭ قورعانىس مينيسترلىگى وتكىزەدى. اتالمىش كونفەرەنسياعا ۇقشۇ، شىۇ، ناتو-عا مۇشە ەلدەردىڭ، تاياۋ شىعىس، ەۋروپا جانە ازيا ەلدەرىنىڭ قورعانىس ۆەدومستۆولارىنىڭ باسشىلارى، حالىقارالىق ۇيىمداردىڭ باسشىلارى، سونداي-اق اكادەميالىق توپتاردىڭ وكىلدەرى مەن ۇكىمەتتىك ەمەس سەكتوردىڭ ساراپشىلارى قاتىسادى. قازاقستان وكىلدەرى وسى فورۋمدا جىل سايىن وزەكتى تاقىرىپتارعا باياندامالار جاسايدى، دەپ حابارلادى Almaty-akshamy.kz ق ر قورعانىس مينيسترلىگىنىڭ باسپا ءسوز قىزمەتى تاراتقان حابارعا سىلتەمە جاساپ.
ءىس-شارا اسكەري ۆەدومستۆولاردىڭ ءوزارا قارىم-قاتىناسىن نىعايتۋعا، جاڭا قاۋىپ-قاۋىپتەرگە قارسى ءىس-قيمىلدىڭ بىرلەسكەن جولدارىن ىزدەۋگە باعىتتالعان.
كونفەرەنسياعا قاتىسۋشىلار حالىقارالىق اسكەري ساياساتتىڭ، جاھاندىق جانە وڭىرلىك قاۋىپسىزدىكتىڭ ۇردىستەرى مەن ماسەلەلەرىن تالقىلادى. ولاردى شەشۋدەگى قورعانىس ۆەدومستۆولارىنىڭ اتقاراتىن قىزمەتى ماڭىزدى.
قورعانىس ءمينيسترى، گەنەرال-لەيتەنانت نۇرلان ەرمەكبايەۆ COVID-19 كوروناۆيرۋس ينفەكسياسىمەن كۇرەستە اسكەري ۆەدومستۆونىڭ اتقارعان جۇمىسى تۋرالى بايانداما جاسادى. ول پاندەميا كەزىندە ەلدە اسكەردى پايدالانۋدىڭ تاجىريبەسىمەن ءبولىستى.
اتاپ ايتقاندا، اسكەري قىزمەتشىلەر الەۋمەتتىك ماڭىزى بار وبەكتىلەر مەن جولداردى دەزينفەكسيالادى. بلوكپوستاردا قىزمەت ەتتى جانە ەلدى مەكەندەردى پاترۋلدەدى. ازاماتتىق دەنساۋلىق ساقتاۋ مەكەمەلەرىنە كومەك كورسەتۋ ءۇشىن دارىگەرلەردەن قۇرالعان بريگادالار ءبولىندى. اسكەري-مەديسينالىق مەكەمەلەر قايتا جابدىقتالدى. اسكەري-كولىك اۆياسياسىنىڭ كۇشىمەن شەتەلدەن قازاقستاننىڭ ازاماتتارىن اكەلدى، سونداي-اق اسكەرلەر مەن جۇكتەردى تاسىمالدادى. زاپاستاعى اسكەري قىزمەتشىلەردىڭ ارنايى جيىندارى ءوتتى.
اتالعان شارالارعا بارلىعى 13 000-نان استام اسكەري قىزمەتشى جۇمىلدىرىلدى. ساراپشىلاردىڭ ايتۋىنشا، حالىقتىڭ جالپى سانىنا شاققاندا جۇمىلدىرىلعان اسكەري قىزمەتشىلەر سانى جاعىنان قازاقستان الەمدە ءبىرىنشى ورىنداردىڭ ءبىرىن الادى. بۇل قازاقستاندىق ارميانىڭ كوروناۆيرۋس ينفەكسياسىنىڭ تارالۋىنا قارسى ءىس-قيمىلعا قوسقان ەلەۋلى ۇلەسىن كورسەتەدى.
توتەنشە جاعداي كەزەڭىندە ءىس-قيمىلدار ناتيجەلەرى بويىنشا ۇيىمداستىرۋ سيپاتىندا ءبىرقاتار شەشىمدەر قابىلداندى. اتاپ ايتقاندا، رادياسيالىق، حيميالىق، بيولوگيالىق قورعاۋ جانە ەكولوگيالىق قاۋىپسىزدىك اسكەرلەرىنىڭ دەپارتامەنتى قۇرىلدى. رحبق اسكەرلەرى، اسكەري مەديسينا، اسكەري-كولىك اۆياسياسىنىڭ مۇمكىندىكتەرى كۇشەيتىلدى. «قوس ماقساتتاعى» كومپونەنتتەردىڭ مۇمكىندىكتەرى ارتىپ، ولار تەك سوعىستا عانا ەمەس، بەيبىت ۋاقىتتا دا سۇرانىسقا يە بولدى.
وسى ورايدا، قارۋلى كۇشتەر ازاماتتىق قورعانىس ورگاندارىنىڭ مىندەتتەرىن ورىندادى. ەلىمىزدە توتەنشە جاعدايلار مينيسترلىگى جۇمىسىن قايتا باستادى.
كونفەرەنسياعا قاتىسۋشىلار قازاقستان رەسپۋبليكاسى قارۋلى كۇشتەرىنىڭ COVID-19 پاندەمياسى كەزەڭىندەگى ارەكەتتەرىن جوعارى باعالادى.
قازاقستان قورعانىس ۆەدومستۆوسىنىڭ باسشىسى قارۋلى كۇشتەردەگى جەكە قۇرامنىڭ دەنساۋلىعىن ساقتاۋدا اسكەري دارىگەرلەردىڭ جوعارى كاسىبيلىگى مەن ءتيىمدى جۇمىسىن، سونداي-اق ولاردىڭ پاندەميا كەزىندە كورونوۆيرۋسقا قارسى ءىس-قيمىلعا قوسقان زور ۇلەسىن جەكە اتاپ ءوتتى. ەل اسكەرىندە ەكپە سالۋ جالعاسۋدا. COVID-19-عا قارسى قاجەتتى دەڭگەيدە ۇجىمدىق يممۋنيتەت قالىپتاستى.
بۇدان وزگە، ساپار اياسىندا گەنەرال-لەيتەنانت نۇرلان ەرمەكبايەۆ ماسكەۋ وبلىسىندا ورنالاسقان ارنايى ماقساتتاعى اسكەري بولىمدەردىڭ ءبىرىن ارالادى. مينيستر جاۋىنگەرلىك دايارلىقتىڭ بارىسىمەن جانە وقۋ-ماتەريالدىق بازاسىمەن تانىستى.
