الماتىدا مەردىگەرلەردىڭ جاۋاپسىزدىعىنان كوبىنە تۇرعىندار زارداپ شەگەدى. وسى رەتتە شاھار باسشىسى ءقازىر قالادا قۇرىلىس جۇمىستارى قارقىن العانىن، ەگەر زاڭ بۇزۋشىلىقتار ورىن السا، مەردىگەرلەر جاۋاپكەرشىلىككە تارتىلاتىنىن قاتاڭ ەسكەرتتى. دەگەنمەن مەگاپوليستە جۇمىسىنا سالعىرت قارايتىن كومپانيالار ازايماي تۇر.
ماسەلەن، ناۋرىزباي اۋدانىنىڭ «قالقامان-2» شاعىناۋدانىنداعى ن.نۇرماعانبەتوۆ كوشەسى №56 ءۇيدىڭ ماڭىندا ورنالاسقان سپورتتىق الاڭ قيراپ جاتىر. ونىڭ جانىنداعى قىستا جاسالعان برۋسچاتكالار ويىلىپ، جەرگە كىرىپ كەتكەن. ورىندىقتار قۇلاپ، جارامسىز بولىپ قالعان. مۇنداي ساپاسىز سالىنعان دۇنيەلەر اۋداننىڭ كەلىستى كەلبەتىن بۇزىپ، سىرتتان، اسىرەسە، وزگە قالادان كەلەتىن قوناقتارىمىزعا جاعىمسىز كورىنىس قالدىراتىنى ءسوزسىز.
قازىرگى تاڭدا كوشە تۇرعىندارى اۋلاعا اباتتاندىرۋ جۇمىسىن جۇرگىزگەن مەردىگەرلەردىڭ جۇمىسىنا ريزا ەمەس. ونىمەن قوسا، كومپانيا سپورت الاڭىن اياعىنا دەيىن جاساماي، ورتا جولدان تاستاپ كەتكەن ەكەن. ياعني قىستا جاساعان جۇمىس ءالى بىتپەي تۇر. ول جەرگە ادام كوپ كەلمەيدى دەپ ويلاعان با، مەردىگەرلەر ءوز جۇمىسىن تىپتەن ساپاسىز جاساعان. دانەكەرلەگەن تەمىرلەرى سىنىپ، قيراپ تۇر. وسىلايشا قىستا سالىنعان دۇنيە جازعا جەتپەي ءبۇلىنىپ، سيقى كەتە باستادى. ناۋرىزباي اۋدانىنىڭ اكىمدىگى، اتالمىش كوشەنى اباتتاندىرۋدى قانداي مەردىگەر جۇرگىزگەن؟ نەگە ونى اياعىنا دەيىن بىتىرمەي، تاستاپ كەتكەن؟ بۇل باسسىزدىق قاشانعا دەيىن جالعاسادى؟ مۇنداي جاۋاپسىزدىققا توسقاۋىل قوياتىن كەز كەلدى ەمەس پە؟!
قاشان دا ءتارتىپ پەن باقىلاۋ جوق جەردە جۇمىسقا ءجۇردىم-باردىم قاراۋشىلىق ورىن الادى. سوندىقتان اۋدان اكىمدىگى جاسالعان جۇمىستىڭ ساپاسىنا كوڭىل ءبولىپ، باقىلاۋعا السا، دۇرىس-اق بولار ەدى. ورىن العان ولقىلىق دەر كەزىندە قالپىنا كەلسە دەگەن ۇسىنىسىمىز بار.