ەلىمىزدە ايەلدەر سانى ءبىر جىلدا1،2%-عا ارتقان.
2022 جىلدىڭ 1 ناۋرىزىنداعى ەسەپ بويىنشا، ەلدەگى ايەل سانى 9،9 ميلليون بولدى، بۇل ءبىر جىل بۇرىنعىدان 1،2 پايىزعا كوپ، دەپ حابارلايدى Almaty-akshamy.kz Finprom.kz سايتىنا سىلتەمە جاساپ.
قازاقستاندىق ايەلدەردىڭ سانى جىل سايىن تۇراقتى تۇردە 1،2%-1،3%-عا ءوسىپ كەلەدى.
قازاقستان رەسپۋبليكاسى حالقىنىڭ جالپى سانىنداعى ايەلدەردىڭ ۇلەسى ازداپ تومەندەدى. ماسەلەن، 2017 جىلعى 1 ناۋرىزدا قازاقستان حالقىنىڭ جالپى سانىنداعى ايەلدەردىڭ ۇلەسى 51،62%، 2018 جىلى – 51،58%، 2019 جىلى – 51،54%، 2020 جىلى – 51،51%، 2021 جىلى – 51،48%، 2022 جىلى – 51،43% بولدى. الايدا 5 جىل ىشىندە كورسەتكىشتىڭ 0،18 پايىزعا ازايۋى ستاتيستيكالىق تۇرعىدان قاراعاندا وتە ماڭىزدى ەمەس.
ايەلدەردىڭ كوپشىلىگى، جالپى قازاقستان رەسپۋبليكاسىنداعى حالىق تىعىز قونىستانعان وڭىرلەردە – الماتى، الماتى وبلىسى جانە تۇركىستان وبلىستارىندا، ەڭ ازى – سولتۇستىك قازاقستان وبلىسىندا تۇرادى.
قازاقستانداعى جالپى حالىق سانىنداعى ايەلدەردىڭ ۇلەسى ايتارلىقتاي وزگەرىپ وتىراتىن اتاپ وتكەن ءجون. وسىلايشا، قازاقستان رەسپۋبليكاسىنداعى ايەلدەر كوپ تۇراتىن وڭىرلەر الماتى (الماتىلىقتاردىڭ جالپى سانىنىڭ 54،2%-ى ايەلدەر)، پاۆلودار (52،5%) جانە قوستاناي (52،4%) وبلىستارى بولىپ وتىر. ال، تۇركىستان جانە قىزىلوردا وبلىستارىندا ەرلەر سانى، كەرىسىنشە، ايەلدەر سانىنان باسىم بولسا، قازاقستاندىق ايەلدەر وسى ەكى وبلىس حالقىنىڭ سايكەسىنشە 49،2% جانە 49،7%-ىن قۇرايدى.
ايتا كەتەرلىك جايت: جاس بويىنشا گەندەرلىك تەڭگەرىم قازاقستان رەسپۋبليكاسى بويىنشا ورتاشا دەڭگەيدەن ايتارلىقتاي ەرەكشەلەنەدى. سونىمەن، 29 جاسقا دەيىن، ياعني، بالالىق جانە جاستىق شاقتاعى كورسەتكىش بويىنشا قازاقستان رەسپۋبليكاسى حالقىنىڭ جالپى سانىندا ەر ادامدار باسىم.
قازاقستانداعى 30 بەن 49 جاس ارالىعىنداعى ايەلدەر مەن ەرلەر سانى شامامەن تەڭ كورسەتكىشتە.
تەك 50 جاستان كەيىن گەندەرلىك تەپە-تەڭدىك ايەلدەرگە قاراي ىعىسا باستايدى. وسىلايشا، 50-دەن 59 جاسقا دەيىنگى قازاقستاندىقتاردىڭ جالپى سانىنداعى ايەلدەردىڭ ۇلەسى ءالى دە ونشا كوپ ەمەس – 53،6%، ءبىراق كەيىننەن ول ايتارلىقتاي وسەدى، ال 85 جانە ودان جوعارى جاستا ول 72،1%-عا دەيىن جوعارىلايدى.
ياعني، قازاقستاندا قىز بالالار مەن بويجەتكەندەر ۇلدار مەن جىگىتتەرگە قاراعاندا از بولسا، ەلىمىزدە 80 جاستان اسقان ەگدە جاستاعى ايەلدەر سول جاستاعى ەرلەرگە قاراعاندا ەكى جارىم ەسە كوپ.
جۇمىسپەن قامتۋعا كەلەتىن بولساق: 2021 جىلى ەلدە جۇمىس ىستەيتىن ايەلدىڭ سانى 4،3 ميلليون بولعان، بۇل ءبىر جىل بۇرىنعى 4،2 ميلليونمەن سالىستىرعاندا، جىل سايىنعى ءوسىم 0،9% بولىپ وتىر.
ايەلدەردىڭ باسىم بولىگى ساۋدا جانە اۆتوكولىك جوندەۋ سالاسىندا جۇمىس ىستەيدى: 828،7 مىڭ ادام – ءبىر جىل بۇرىنعىدان 0،4%-عا ارتىق. «تانىمال» سالالاردىڭ قاتارىندا ءبىلىم بەرۋ مەن اگروونەركاسىپ سالاسى دا اتالدى. جالپى، ەلىمىزدەگى جۇمىسپەن قامتىلعان ايەلدەردىڭ 50،4 پايىزى وسى ءۇش سالا بويىنشا جۇمىسپەن قامتىلعان.
2021 جىلى قازاقستان رەسپۋبليكاسىنداعى ەر ازاماتتاردىڭ باسىم بولىگى اۋىل شارۋاشىلىعى سالاسىندا جۇمىسپەن قامتىلعان. ۇزدىك ۇشتىككە ساۋدا جانە اۆتوكولىك جوندەۋ، سونداي-اق قۇرىلىس سالاسى كىرەدى. ۇزدىك ءۇش سالا بويىنشا بارلىق جۇمىسپەن قامتىلعانداردىڭ 39،5%-ىن ەر ازاماتتار قۇرايدى.
ەسكە سالا كەتەيىك، قازاقستاندا 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسى جۇزەگە اسىرىلۋدا، دەپ حابارلايدى ق ر پرەمەر-مينيسترىنىڭ رەسمي رەسۋرسى. قازىرگى ۋاقىتتا قوعامداعى ايەلدەردىڭ قۇقىقتارى مەن مۇمكىندىكتەرىن ىلگەرىلەتۋ جونىندەگى تۇجىرىمدامانى جانە ول بويىنشا ءىس-شارالار جوسپارىن جاڭارتۋ جۇمىستارى جۇرگىزىلۋدە.
